ಕರ್ನಾಟಕ ಸರ್ಕಾರದ ಗೃಹ ಜ್ಯೋತಿ ಯೋಜನೆಯ ಮನೆ-ಮನೆ ಮರು ಪರಿಶೀಲನೆ (Door-to-Door Verification) ಪ್ರಕ್ರಿಯೆ ಸ್ಟಾರ್ಟ್ ಆಗಿದೆ. ಅಧಿಕಾರಿಗಳು ಮನೆ ಮನೆಗೆ ಬರ್ತಾರೆ. ಅಕ್ರಮಗಳನ್ನು ತಡೆದು, ಕೇವಲ ಅರ್ಹರಿಗೆ ಮಾತ್ರ ಯೋಜನೆಯ ಫಲ ತಲುಪಬೇಕು ಎನ್ನುವುದು ಕಾಂಗ್ರೆಸ್ ಸ್ಕೀಂ. ಈ ವೇಳೆ ತಿಂಗಳಿಗೆ 200 ಯೂನಿಟ್ ಒಳಗೆ ಉಚಿತ ವಿದ್ಯುತ್ ಪಡೆಯುತ್ತಿರುವವರು ತಮ್ಮೊಂದಿಗೆ ಕೆಲವು ದಾಖಲೆಗಳನ್ನು ಇಟ್ಟುಕೊಂಡಿರಲೇಬೇಕು. ಇದು ಅನಿವಾರ್ಯ.
ಕಡ್ಡಾಯವಾಗಿ ಇರಬೇಕಾದ ಮುಖ್ಯ ದಾಖಲೆಗಳು
ಆಧಾರ್ ಕಾರ್ಡ್ (ಕೇವಲ ಗುರುತಿನ ಪರಿಶೀಲನೆಗಾಗಿ ಮಾತ್ರ)
ಇತ್ತೀಚಿನ ವಿದ್ಯುತ್ ಬಿಲ್ (ಗ್ರಾಹಕರ ಐಡಿ / ಅಕೌಂಟ್ ಐಡಿ ಮತ್ತು RR ಸಂಖ್ಯೆ ಸ್ಪಷ್ಟವಾಗಿರಬೇಕು)
ಫಲಾನುಭವಿಯ ಪಾಸ್ಪೋರ್ಟ್ ಅಳತೆಯ ಭಾವಚಿತ್ರ (ಒಂದು ಕಲರ್ ಫೋಟೋ)
ಮತದಾರರ ಗುರುತಿನ ಚೀಟಿ (ವೋಟರ್ ಐಡಿ)
ಪ್ಯಾನ್ ಕಾರ್ಡ್ (PAN Card)
ಪಡಿತರ ಚೀಟಿ (ರೇಷನ್ ಕಾರ್ಡ್)
ಬಾಡಿಗೆದಾರರಾಗಿದ್ದರೆ..
ಚಾಲ್ತಿಯಲ್ಲಿರುವ ಬಾಡಿಗೆ ಒಪ್ಪಂದ ಪತ್ರ (Rental / Lease Agreement) ಇಟ್ಟುಕೊಳ್ಳಿ.
ಜಾತಿ ಪ್ರಮಾಣ ಪತ್ರವನ್ನೂ ಕೇಳ್ತಾರಂತೆ. ಯಾಕೆ ಎನ್ನುವುದು ಗೊತ್ತಿಲ್ಲ.
ತೆರಿಗೆ ಪಾವತಿದಾರರಾಗಿದ್ದರೆ: ಪ್ಯಾನ್ ಸಂಖ್ಯೆ ಮತ್ತು ವೃತ್ತಿಪರ ವಿವರಗಳ (Professional Details) ಬಗ್ಗೆ ಮಾಹಿತಿ ಕೇಳಿ ಪಡೆಯುತ್ತಾರೆ.
ಪರಿಶೀಲನೆ ಹೇಗೆ ನಡೆಯುತ್ತದೆ..?
BESCOM, MESCOM, HESCOM, GESCOM ಅಥವಾ CESC ಸಂಸ್ಥೆಯ ಅಧಿಕೃತ ಮೀಟರ್ ರೀಡರ್ಗಳು ಮತ್ತು ಸಿಬ್ಬಂದಿ ನಿಮ್ಮ ಮನೆಗೆ ನೇರವಾಗಿ ಭೇಟಿ ನೀಡಲಿದ್ದಾರೆ. ಸಿಬ್ಬಂದಿಯು ಸ್ಥಳದಲ್ಲೇ ಮೊಬೈಲ್ ಆ್ಯಪ್ ಮೂಲಕ ನಿಮ್ಮ ದಾಖಲೆಗಳನ್ನು ಪರಿಶೀಲಿಸಿ, ನಿಮ್ಮಿಂದ ಸಹಿ ಪಡೆದ ಘೋಷಣಾ ಪತ್ರದ (Declaration Form) ಅಪ್ಡೇಟ್ ಕೊಡ್ತಾರೆ. ಪ್ರಕ್ರಿಯೆಗೆ ಮೀಟರ್ ರೀಡರ್ ಮೂಲಕ ಸ್ಥಳದಲ್ಲೇ ಪರಿಶೀಲನೆ ಮಾಡುವುದು ಏಕೈಕ ಮಾರ್ಗವಾಗಿದ್ದು, ಗ್ರಾಹಕರು ಮತ್ತು ಫಲಾನುಭವಿಗಳು ಮೀಟರ್ ರೀಡರ್ ಗಳಿಗೆ ಸಂಪೂರ್ಣ ಸಹಕಾರ ನೀಡಿ, ಪರಿಶೀಲನೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಇಂಧನ ಇಲಾಖೆ ಮನವಿ ಮಾಡಿದೆ.
ರಾಜ್ಯದ ಪ್ರತಿಯೊಂದು ಮನೆಗೆ ಪ್ರತಿ ತಿಂಗಳು ಗರಿಷ್ಠ 200 ಯೂನಿಟ್ಗಳವರೆಗೆ ಉಚಿತ ವಿದ್ಯುತ್ ನೀಡುವುದು ಗೃಹಜ್ಯೋತಿ ಯೋಜನೆಯ ಮುಖ್ಯ ಉದ್ದೇಶವಾಗಿತ್ತು. ಈ ಯೋಜನೆಯು ಕೇವಲ ಗೃಹ ಬಳಕೆದಾರರಿಗೆ ಮಾತ್ರ ಅನ್ವಯಿಸುತ್ತದೆ. ವಾಣಿಜ್ಯ ಉದ್ದೇಶದ ಮಳಿಗೆಗಳಿಗೆ ಇದು ಅನ್ವಯಿಸುವುದಿಲ್ಲ. ಜತೆಗೆ ಕರ್ನಾಟಕ ರಾಜ್ಯದ ನಿವಾಸಿಯಾಗಿರಬೇಕು. ಬಾಡಿಗೆ ಮನೆಯಲ್ಲಿ ವಾಸಿಸುವವರು ಕೂಡ ಈ ಯೋಜನೆಯ ಲಾಭ ಪಡೆಯಬಹುದು. ಒಂದು ಆಧಾರ್ ಕಾರ್ಡ್ ಸಂಖ್ಯೆಗೆ ಕೇವಲ ಒಂದು ಮೀಟರ್ಗೆ ಮಾತ್ರ ರಿಯಾಯಿತಿ ಸಿಗುತ್ತದೆ.
ಯಾವುದೇ ಆನ್ಲೈನ್ ವಂಚನೆಗೆ ಒಳಗಾಗಬೇಡಿ; ಈ ಪ್ರಕ್ರಿಯೆಯು ಕೇವಲ ಭೌತಿಕವಾಗಿ ಮನೆಗೆ ಬರುವ ಸಿಬ್ಬಂದಿ ಮೂಲಕ ಮಾತ್ರ ನಡೆಯುತ್ತದೆ. ಏಕೆಂದರೆ ಇದು ಆನ್ ಲೈನ್ ಮೂಲಕ ನಡೆಯುವುದೇ ಇಲ್ಲ.
