ಆರ್.ಎಸ್.ಎಸ್. ಮುಖ್ಯಸ್ಥ ಮೋಹನ್ ಭಾಗವತ್ ಅವರ ಒಂದು ಹೇಳಿಕೆ ವಿವಾದ ಸೃಷ್ಟಿಸಿದೆ.
ಭಾರತದ ಮುಸ್ಲಿಮರು ಭಯಪಡುವ ಅಗತ್ಯ ಇಲ್ಲ. ಹಿಂದೂಸ್ಥಾನ ಹಿಂದೂಸ್ಥಾನವಾಗಿಯೇ ಉಳಿಯಬೇಕು ಎಂದರೆ ಭಾರತದ ಮುಸ್ಲಿಮರು ತಮ್ಮ ಶ್ರೇಷ್ಟತೆಯ ಭ್ರಮೆ ಬಿಡಬೇಕು. ಮುಸಲ್ಮಾನರಿಗೆ ಭಾರತದಲ್ಲಿ ಯಾವುದೇ ಭಯವಿಲ್ಲ. ಇದು ಆರ್ಗನೈಜರ್ ಹಾಗೂ ಪಾಂಚಜನ್ಯ ಮ್ಯಾಗಜಿನ್`ಗಳಿಗೆ ನೀಡಿದ ಸಂದರ್ಶನದಲ್ಲಿ ಆಯ್ದ ಭಾಗ. ಇದು ವಿವಾದದ ಕಿಡಿ ಹೊತ್ತಿಸಿದೆ.
ಕಾಂಗ್ರೆಸ್ ಮುಖಂಡ ಕಪಿಲ್ ಸಿಬಲ್, ಎಐಎಎಂಎಂ ಮುಖಂಡ ಅಸಾದುದ್ದೀನ್ ಓವೈಸಿ, ಸಿಪಿಎಂ, ಮೊದಲಾದವರು ಕಿಡಿ ಕಾರಿದ್ದಾರೆ. ಹಿಂದೂಸ್ತಾನ ಹಿಂದೂಸ್ತಾನವಾಗಿಯೇ ಉಳಿಯಬೇಕ ಎಂಬ ಭಾಗವತ್ ವಾದವನ್ನು ಒಪ್ಪುತ್ತೇನೆ. ಆದರೆ ಮೊದಲು ಮನುಷ್ಯರು ಮನುಷ್ಯರಾಗಿ ಉಳಿಯಬೇಕು ಎಂದಿದ್ದಾರೆ. ಓವೈಸಿಯವರಂತೂ ನಮಗೆ ಹೀಗೇ ಬದುಕಬೇಕು ಎಂದು ಅನುಮತಿ ನೀಡೋಕೆ ಈ ಭಾಗವತ್ ಯಾರು? ಮುಸ್ಲಿಮರು ಹೀಗೇ ಬದುಕಬೇಕು ಎಂದು ಷರತ್ತು ವಿಧಿಸಲು ಅವರಿಗೆ ಎಷ್ಟು ಧೈರ್ಯ ಎಂದು ಭಾಗವತ್ ಅವರನ್ನು ಪ್ರಶ್ನಿಸಿದ್ದಾರೆ. ಇಷ್ಟಕ್ಕೂ ಭಾಗವತ್ ಅವರು ಹೇಳಿದ್ದೇನು? ಅವರು ಕೇವಲ ಮುಸ್ಲಿಮರನ್ನು ಗುರಿಯಾಗಿಸಿಕೊಂಡು ಈ ಮಾತು ಹೇಳಿದ್ದಾರೆಯೇ ಎಂಬುದನ್ನು ಹುಡುಕಿದಾಗ ಕಂಡಿದ್ದೇ ಬೇರೆ.
ಆರ್ಗನೈಜರ್ ಮ್ಯಾಗಜಿನ್ ಹೆಡ್ಲೈನಿನಲ್ಲೇ ವಿಸ್ತಾರವಾಗಿದೆ. ಭಾರತದಲ್ಲಿ ವಾಸಿಸುವ ಎಲ್ಲರೂ.. ಅವರು ಹಿಂದುವೇ ಆಗಿರಲಿ, ಮುಸ್ಲಿಂ ಆಗಿರಲಿ, ಕಮ್ಯುನಿಸ್ಟರೇ ಆಗಿರಲಿ.. ಮೊದಲಿಗೆ ಅವರು ತಾವೇ ಶ್ರೇಷ್ಟ ಎಂದು ವಾದಿಸುವುದನ್ನು ಬಿಡಬೇಕು. ಇದು ಹೆಡ್ ಲೈನ್ ವಿಷಯ. ಇನ್ನು ಸಂದರ್ಶನದ ಒಳಗೆ ಮಾತನಾಡುತ್ತಾ ಮೋಹನ್ ಭಾಗವತ್ ನಾನು ಹೇಳುತ್ತಿರುವುದೇ ಸರಿ. ನೀನು ಹೇಳುತ್ತಿರುವುದೆಲ್ಲ ಸುಳ್ಳು ಎಂದು ಹಿಂದೂಗಳು ಎಂದಿಗೂ ಹೇಳುವುದಿಲ್ಲ. ನೀವು ನಿಮ್ಮ ಪ್ರಕಾರ ಸರಿ. ನಾವು ನಮ್ಮ ಪ್ರಕಾರ ಸರಿ ಎಂದು ನಂಬುವವರು ನಾವು. ಹೊಂದಾಣಿಕೆಯೇ ಹಿಂದುತ್ವ ಎಂದಿದ್ದಾರೆ. ಶ್ರೇಷ್ಟತೆಯ ವ್ಯಸನ ಬಿಡಬೇಕು ಎಂಬುದು ಕೇವಲ ಮುಸ್ಲಿಮರಿಗೆ ಹೇಳಿರುವ ಮಾತೂ ಅಲ್ಲ.
ಮುಸ್ಲಿಮರಿಗೇ ಹೇಳಿರುವ ಮಾತುಗಳು ಇವು. ನಾವು ಹಿಂದೊಮ್ಮೆ ಈ ದೇಶದ ಮೇಲೆ ಪ್ರಭುತ್ವ ಸಾಧಿಸಿದ್ದೆವು. ಮುಂದೊಂದು ದಿನ ಮತ್ತೆ ಪ್ರಭುತ್ವ ಸ್ಥಾಪಿಸುತ್ತೇವೆ. ನಾವು ವಿಭಿನ್ನ. ನಾವಿರೋದೇ ಹೀಗೇ. ನಾವು ಹೇಳಿದ್ದೇ ನಡೆಯಬೇಕು ಎಂಬ ಭ್ರಮೆ ಬಿಡಬೇಕು ಎಂದು ಹೇಳಿರುವ ಬಾಗವತ್, ಅದಾದ ನಂತರ ಶ್ರೇಷ್ಟತೆಯ ಭ್ರಮೆಯನ್ನು ಹಿಂದೂಗಳೂ ಬಿಡಬೇಕು. ಮುಸ್ಲಿಮರೂ ಬಿಡಬೇಕು. ಕಮ್ಯುನಿಸ್ಟರೂ ಬಿಡಬೇಕು ಎಂದಿದ್ದಾರೆ. ಹಿಂದುತ್ವ ಎಂದರೇನೇ ಹೊಂದಾಣಿಕೆ ಮಾಡಿಕೊಳ್ಳುವುದು. ಎಲ್ಲರನ್ನೂ ಗೌರವಿಸುವುದು ಎಂದಿದ್ದಾರೆ ಮೋಹನ್ ಭಾಗವತ್.
ಆರ್.ಎಸ್.ಎಸ್.ನಿಂದಾಗಿ ಹಿಂದೂಗಳಲ್ಲಿ ಜಾಗೃತಿ ಮೂಡಿದೆ ಎಂದು ವಾದಿಸಿರುವ ಮೋಹನ್ ಭಾಗವತ್, ಹಿಂದೂಗಳ ವಿರುದ್ಧ ಸಂಚು, ಪಿತೂರಿಯೂ ನಡೆಯುತ್ತಿದ್ದು, ಅದಕ್ಕೆ ವಿದೇಶದ ಕುಮ್ಮಕ್ಕು ಇದೆ ಎಂದೂ ಹೇಳಿದ್ದಾರೆ.
