ಬಿಗ್ ಬಾಸ್ ಗೆದ್ದ ಮೇಲೆ ಗಿಲ್ಲಿ ನಟನ ಕ್ರೇಜ್, ಖದರ್, ಇಮೇಜ್ ಎಲ್ಲವೂ ಬದಲಾಗಿದೆ ಹೋಗಿದೆ. ಅವರೀಗ ಕನ್ನಡ ಸಿನಿಮಾವೊಂದರಲ್ಲಿ ಹೀರೋ ಆಗಿ ಎಂಟ್ರಿ ಕೊಡ್ತಿದ್ಧಾರೆ. ಸ್ಯಾಂಡಲ್ವುಡ್ನ ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆಯಾದ ಕೆವಿಎನ್ ಪ್ರೊಡಕ್ಷನ್ಸ್ (KVN Productions) ಈ ಹೊಸ ಚಿತ್ರವನ್ನು ಅರ್ಪಿಸುತ್ತಿದೆ. ನಿರ್ಮಾಣ ಬೇರೆಯವರದ್ದು. ಹೀರೋಯಿನ್ ಶ್ರೀಲೀಲಾ ಎಂದು ತೋರಿಸಿದ್ದಾರೆ. ಆದರೆ ಚೇಂಜ್ ಆಗಿದೆ. ವಿಶೇಷ ಎಂದರೆ ಇದು ಪ್ಯಾನ್ ಕರ್ನಾಟಕ ಸಿನಿಮಾ. ಜೊತೆಗೆ ಇಲ್ಲಿ ʻಟವೆಲ್ ಒಳಗೆ ದನದ ವ್ಯಾಪಾರʼವೂ ನಡೆದಿದೆ. ಗ್ರಾಮೀಣ ಭಾಗದ ದನದ ಸಂತೆಗಳಲ್ಲಿ ನಡೆಯುವ ಈ ಟವೆಲ್ ವ್ಯಾಪಾರ, ಇಲ್ಲಿ ಸೀರಿಯಸ್ ಆಗಿ ನಡೆದಿದೆ.
ಗಿಲ್ಲಿ ನಟ ನಟಿಸುತ್ತಿರುವ ಹೊಸ ಸಿನಿಮಾಗೆ ಡೈರೆಕ್ಟರ್ ಚಂದ್ರಮೋಹನ್. ಕೆವಿಎನ್ ಪ್ರೊಡಕ್ಷನ್ಸ್ನ ಕಾರ್ಯಕಾರಿ ನಿರ್ಮಾಪಕರಾದ ನವೀನ್ ಮತ್ತು ಹರೀಶ್ ಈ ಸಿನಿಮಾವನ್ನು ಜಂಟಿಯಾಗಿ ನಿರ್ಮಿಸುತ್ತಿದ್ದಾರೆ. ವಾಸುಕಿ ವೈಭವ್ ಸಂಗೀತ ನೀಡಲಿದ್ದಾರೆ. ಈ ಚಿತ್ರದ ಅಧಿಕೃತ ಮುಹೂರ್ತ ಸಮಾರಂಭವು ಜೂನ್ 21, 2026 ರಂದು ಅದ್ಧೂರಿಯಾಗಿ ನೆರವೇರಲಿದೆ.
ಇಲ್ಲಿಯವರೆಗೆ ಕಾಮಿಡಿ ಕಿಲಾಡಿಗಳು ಮತ್ತು ಬಿಗ್ ಬಾಸ್ ಮೂಲಕ ಹಾಸ್ಯ ನಟನಾಗಿ ಪ್ರಸಿದ್ಧಿ ಪಡೆದಿದ್ದ ಗಿಲ್ಲಿ ನಟ, ಈ ಚಿತ್ರದ ಮೂಲಕ ಮಾಸ್ ಹಾಗೂ ವಿಭಿನ್ನ ಶೇಡ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇದಲ್ಲದೆ, ಅವರು ನಟಿಸಿರುವ ಗ್ರಾಮೀಣ ಹಿನ್ನೆಲೆಯ ‘ಸರ್ವೇ ನಂಬರ್ 45’ ಚಿತ್ರದ ಅಪ್ಡೇಟ್ಗಳು ಸಹ ಹೊರಬಂದಿವೆ.
ಅಂದಹಾಗೆ ವಿಡಿಯೋದಲ್ಲಿ ಗಿಲ್ಲಿ ನಟನಿಗೆ ಶ್ರೀಲೀಲಾ ನಾಯಕಿ ಎಂದು ಡೈರೆಕ್ಟರ್ ತೋರಿಸ್ತಾರೆ. ಗಿಲ್ಲಿ ನಟ ಒಂದಲ್ಲ..ಎರಡಲ್ಲ.. ಹಲವು ಬಾರಿ ಕೇಳಿ ಕೇಳಿ ಕನ್ಫರ್ಮ್ ಮಾಡಿಕೊಂಡ ಮೇಲೆ ಕನಸು ಕಾಣೋಕೆ ಶುರು ಮಾಡಿದಾಗ ಹೀರೋಯಿನ್ ಚೇಂಜ್ ಅಂತಾರೆ. ಯಾರು ಅನ್ನೋದನ್ನ ಹೇಳೋದಿಲ್ಲ. ಇದರ ನಡುವೆ ಗಮನ ಸೆಳೆಯೋದು ಟವೆಲ್ ವ್ಯಾಪಾರ.
ಸಂತೆಗಳಲ್ಲಿ ಎಮ್ಮೆ, ಆಕಳು ಹಾಗೂ ಎತ್ತುಗಳ ಮಾರಾಟದ ವೇಳೆ ದಲ್ಲಾಳಿಗಳು ಮತ್ತು ಮಾಲೀಕರು ಅಥವಾ ಗ್ರಾಹಕರು ಟವಲ್ ಒಳಗೆ ಕೈ ಮುಚ್ಚಿಟ್ಟುಕೊಂಡು ಬೆಲೆ ಚೌಕಾಸಿ ಮಾಡ್ತಾರೆ. ದಲ್ಲಾಳಿ ಮತ್ತು ಮಾರಾಟಗಾರ (ಅಥವಾ ಕೊಳ್ಳುವವನು) ಇಬ್ಬರೂ ತಮ್ಮ ಕೈಗಳನ್ನು ಒಂದು ಟವಲ್, ಲುಂಗಿ ಅಥವಾ ಶಾಲಿನ ಒಳಗೆ ಚಾಚುತ್ತಾರೆ. : ಟವಲ್ ಒಳಗಡೆ ಒಬ್ಬರ ಕೈಯನ್ನು ಮತ್ತೊಬ್ಬರು ಸ್ಪರ್ಶಿಸುತ್ತಾ ಬೆರಳುಗಳ ಮೂಲಕ ಬೆಲೆಯನ್ನು ಸಂಕೇತಿಸುತ್ತಾರೆ. ಉದಾಹರಣೆಗೆ ಒಂದು ಬೆರಳನ್ನು ಒತ್ತಿದರೆ ₹10,000 ಅಥವಾ ₹1,000 (ಅಲ್ಲಿನ ಮಾರುಕಟ್ಟೆಯ ಮೌಲ್ಯಕ್ಕೆ ತಕ್ಕಂತೆ) ಎಂದರ್ಥ. ಬೆರಳುಗಳನ್ನು ಮಡಚುವುದು, ಬಿಡುವುದು ಅಥವಾ ಹಸ್ತವನ್ನು ಹಿಡಿಯುವ ಮೂಲಕ ಎಷ್ಟು ಸಾವಿರ ಅಥವಾ ಎಷ್ಟು ಲಕ್ಷಕ್ಕೆ ವ್ಯಾಪಾರ ಕುದುರಿಸಬೇಕು ಎಂಬುದನ್ನು ಪರಸ್ಪರ ಸಂವಹನ ನಡೆಸುತ್ತಾರೆ.
ವಿಡಿಯೋದಲ್ಲಿಯೂ ಗಿಲ್ಲಿ ನಟ ಮತ್ತು ಪ್ರೊಡ್ಯೂಸರ್ ಮಧ್ಯೆ ಇಂಥದ್ದೇ ಮಾತುಕತೆ ನಡೆಯುತ್ತದೆ. ಅಂದಹಾಗೆ ಇದು ಪ್ಯಾನ್ ಇಂಡಿಯಾ ಅಲ್ಲ, ಪ್ಯಾನ್ ಕರ್ನಾಟಕ ಸಿನಿಮಾ ಅಂತೆ. ಉತ್ತರ ಕರ್ನಾಟಕದ ಶೈಲಿಗೆ ಒಂದು, ಮೈಸೂರು-ಮಂಡ್ಯ ಭಾಗದ ಕನ್ನಡಕ್ಕೆ ಒಂದು ಹಾಗೂ ಕರಾವಳಿ ಶೈಲಿಗೆ ಒಂದು.. ಹೀಗೆ ಕನ್ನಡದಲ್ಲಿಯೇ ವಿವಿಧ ರೀತಿಯ ಭಾಷೆಗೆ ತಕ್ಕಂತೆ ಸಿನಿಮಾ ಮಾಡೋಣ ಎಂದು ಗಿಲ್ಲಿ ನಟ ಹೇಳ್ತಾರೆ. ಒಟ್ಟಿನಲ್ಲಿ ಗಿಲ್ಲಿ ನಟನ ಹೀರೋಯಿನ್ ಫಿಕ್ಸ್ ಆಗಿಲ್ಲ, ಆದರೆ ಸಂಚಲನವಂತೂ ಸೃಷ್ಟಿಯಾಗಿದೆ.
