ವೋಲಾ, ಉಬರ್ ಆಟೋಗಳ ಹಗಲು ದರೋಡೆಗೆ ಯಾತ್ರಿ ಉತ್ತರವಾಗುತ್ತಾ? : ನಂದನ್ ನಿಲೇಕಣಿ ಯೋಜನೆ

ಬೆಂಗಳೂರಿನಲ್ಲಿ ಆಟೋ ಮೀಟರ್ ರೇಟ್ ಗೊತ್ತಿದೆ. ಸರ್ಕಾರ ನಿಗದಿ ಪಡಿಸಿರುವ ದರಗಳ ಪ್ರಕಾರ ಮಿನಿಮಮ್ ಚಾರ್ಜ್ 30 ರೂ. ಅಂದರೆ ಒಮ್ಮೆ ಆಟೋ ಹತ್ತಿದರೆ 30 ರೂ. ಕೊಡಲೇಬೇಕು. ಎರಡು ಕಿ.ಮೀ.ವರೆಗೆ 30 ರೂ. ದರ ಇರುತ್ತದೆ. 2 ಕಿ.ಮೀ.ಗಿಂತ ಕಡಿಮೆ ದೂರ ಹೋದರೂ 30 ರೂ. ಕೊಡಬೇಕು. ಅದಾದ ನಂತರ ಪ್ರತಿ ಕಿ.ಮೀ.ಗೆ 15 ರೂ. ದರ ವಿಧಿಸಲಾಗುತ್ತದೆ. ಅಷ್ಟೇ ಅಲ್ಲ, ಆರಂಭದ 5 ನಿಮಿಷಗಳ ಕಾಲಕ್ಕೆ ವೇಯ್ಟಿಂಗ್ ಚಾರ್ಜ್ ಕೂಡಾ ಇಲ್ಲ. ಅದಾದ ನಂತರ ವೇಯ್ಟಿಂಗ್ ಚಾರ್ಜ್ 5 ರೂ. ಕೊಡಬೇಕು. ಇದು ಸಾರಿಗೆ ಇಲಾಖೆಯೇ ರೂಪಿಸಿರುವ ನಿಯಮ. ಆದರೆ ಇತ್ತೀಚೆಗೆ ವೋಲಾ, ಉಬರ್, ರಾಪಿಡೋ ಸೇವೆಗಳೆಲ್ಲ ಲೂಟಿ ಹೊಡೆಯುತ್ತಿವೆ.
2 ಕಿ.ಮೀ. ದೂರಕ್ಕೂ ಅಥವಾ ಕಡಿಮೆ ದೂರಕ್ಕೂ ವೋಲಾದಲ್ಲಿ 100 ರೂ.ಗೂ ಹೆಚ್ಚು ದರ ವಿಧಿಸುತ್ತಿದ್ದರೆ ಉಬರ್ ಆಟೋಗಳಲ್ಲಿ 80 ರಿಂದ 90 ರೂ.ಗಳಿವೆ. ರ್ಯಾಪಿಡೋಗಳಲ್ಲಿ ಸುಮಾರು 80ರಿಂದ 90ರೂ. ಇದೆ. ಅದನ್ನೇನು ಓಲಾ, ಉಬರ್ ನವರು ನಿರಾಕರಿಸುವುದೂ ಇಲ್ಲ. ಒಪ್ಪಿಕೊಳ್ಳೋದೂ ಇಲ್ಲ. ಪೀಕ್ ಅವರ್‍ನಲ್ಲಿ ಅದೆಲ್ಲ ಸಾಮಾನ್ಯ. ಆದರೆ ನಾವು ದರ ಹೆಚ್ಚಿಸಿಲ್ಲ ಎನ್ನುತ್ತಾರೆ ಓಲಾ ಮತ್ತು ಉಬರ್ ಕಂಪೆನಿಯವರು. ಓಲಾ ಅಥವಾ ಉಬರ್‍ಗಳಲ್ಲಿ ಬುಕ್ ಮಾಡಿದರೆ ಆಪ್ ಮೂಲಕವೇ ದುಬಾರಿ ದರ ತೋರಿಸುತ್ತಾರೆ.
ಸಾರಿಗೆ ಇಲಾಖೆಯವರಿಗೆ ಇದು ಗೊತ್ತೇ ಇಲ್ಲವಂತೆ. ಅವರ ಪ್ರಕಾರ ಮಿನಿಮಮ್ ಚಾರ್ಜ್ 30 ರೂ. ರಾತ್ರಿ ವೇಳೆ 10 ಗಂಟೆಯಿಂದ ಬೆಳಗ್ಗೆ 5ರ ವರೆಗೆ ಒಂದೂವರೆ ಪಟ್ಟು. ಅದು ನಿಯಮಬದ್ಧ ಎನ್ನುತ್ತಾರೆ. ಕಂಪ್ಲೇಂಟ್ ಕೊಟ್ಟರೆ ನಾವು ನಿಯಮಗಳ ಪ್ರಕಾರ ಆಟೋ ಸೀಝ್ ಮಾಡಬಹುದು. ಕಂಪೆನಿಯ ವಿರುದ್ಧ ಕ್ರಮ ತೆಗೆದುಕೊಳ್ಳೋಕೆ ನಮಗೆ ಅಧಿಕಾರವಿಲ್ಲ ಎನ್ನುವುದು ಸಾರಿಗೆ ಇಲಾಖೆಯವರ ಅಸಹಾಯಕತೆ. ಏಕೆಂದರೆ ಈ ಕುರಿತು ವಿವಾದವೊಂದು ಹೈಕೋರ್ಟಿನಲ್ಲಿದೆ. ಇತ್ಯರ್ಥವಾಗಿಲ್ಲ. ಹೀಗಾಗಿ ಸಾರಿಗೆ ಇಲಾಖೆಯವರೂ ಅಸಹಾಯಕತೆ ವ್ಯಕ್ತಪಡಿಸುತ್ತಾರೆ.
ಅಕಸ್ಮಾತ್ ಯಾರಾದರೂ ದೂರು ಕೊಟ್ಟರೆ ಆಟೋವನ್ನು ಸೀಝ್ ಮಾಡಬಹುದು. ಅಷ್ಟೆ. ಬಿಡಿಸಿಕೊಂಡು ಹೋಗಬೇಕಾದವರು ಆಟೋದವರೇ ಹೊರತು ಓಲಾ ಅಥವಾ ಉಬರ್ ಕಂಪೆನಿಯವರಲ್ಲ. ಈಗೇನೋ ವೋಲಾ, ಉಬರ್ ಆಟೋಗಳ ಮಾರ್ಕೆಟ್ ಶೇ.60ರಷ್ಟು ಕುಸಿದಿದೆಯಂತೆ.
ಹೀಗಾಗಿಯೇ ನವೆಂಬರ್ 1ರಿಂದ ಯಾತ್ರಿ ಅನ್ನೋ ಆಪ್ ಓಪನ್ ಆಗುತ್ತಿದೆ. ಇದನ್ನು ರೂಪಿಸಿರುವುದು ಆಧಾರ್ ವ್ಯವಸ್ಥೆಯನ್ನು ರೂಪಿಸಿದ್ದ ನಂದನ್ ನಿಲೇಕಣಿ. ಆಟೋ ರಿಕ್ಷಾ ಡ್ರೈವರುಗಳೇ ಇದನ್ನು ನಂದನ್ ನಿಲೇಕಣಿಯವರ ಜೊತೆಗೂಡಿ ಇದನ್ನು ರೂಪಿಸಿರುವುದು ವಿಶೇಷತೆ.
ವೋಲಾ ಬಂದಾಗ ಆಟೋ ಪ್ರಯಾಣಿಕರು ಖುಷಿ ಪಟ್ಟಿದ್ದರು. ಅತ್ತ ಆಟೋದವರಿಗೂ ನಷ್ಟವಾಗದಂತೆ ಇತ್ತ ಪ್ರಯಾಣಿಕರಿಗೂ ಹೊರೆಯಾಗದಂತೆ ರೂಪಿಸಿದ್ದ ಸಿಸ್ಟಂ ಬಹುಬೇಗನೆ ಜನಪ್ರಿಯವಾಗಿತ್ತು. ಈಗ ಕಂಪೆನಿ ಸಕ್ಸಸ್ ಆದ ಮೇಲೆ ಲೂಟಿಗಿಳಿದಿರೋದು ಕಂಪೆನಿಯನ್ನೇ ಮುಳುಗಿಸಿದರೂ ಅಚ್ಚರಿಯಿಲ್ಲ. ಏಕೆಂದರೆ ಗ್ರಾಹಕರ ಆಕ್ರೋಶವನ್ನು ಗಮನಕ್ಕೆ ತೆಗೆದುಕೊಳ್ಳದೆ ಯಾವ ಸಂಸ್ಥೆಯೂ ಉದ್ಧಾರವಾದ ಇತಿಹಾಸವಿಲ್ಲ. ಈಗ ಯಾತ್ರಿ ಬೇರೆ ಬರುತ್ತಿದೆ. ಅದೂ ಆಟೋ ಚಾಲಕರ ಸಂಘಟನೆಯವರೇ ರೂಪಿಸಿರುವ ಆಪ್. ಬೆನ್ನ ಹಿಂದೆ ನಂದನ್ ನಿಲೇಕಣಿ ಇದ್ದಾರೆ. ನವೆಂಬರ್ 1ರಿಂದ ಜಾರಿಯಾಗುತ್ತಿದೆ. ಹಂತ ಹಂತವಾಗಿ ಯಾತ್ರಿ ಜನಪ್ರಿಯವಾಗುವ ನಿರೀಕ್ಷೆಯೂ ಇದೆ.