ಮಂಡ್ಯ ಲೋಕಸಭಾ ಎಲೆಕ್ಷನ್ನ್ನು ರಾಜ್ಯದ ಜನ ಮರೆಯೋಕೆ ಸಾಧ್ಯವೇ ಇಲ್ಲ. ಕಳೆದ ಲೋಕಸಭಾ ಚುನಾವಣೆಯಲ್ಲಿ ರಾಜ್ಯದಲ್ಲಿ 28 ಕ್ಷೇತ್ರಗಳಿದ್ದರೂ ಹೈಲೈಟ್ ಆಗಿದ್ದು ಕೇವಲ ಮಂಡ್ಯ. ಸುಮಲತಾ ಅಂಬರೀಷ್ ಮತ್ತು ನಿಖಿಲ್ ಕುಮಾರಸ್ವಾಮಿ ನಡುವಿನ ಕದನದಲ್ಲಿ ಕೊನೆಗೆ ಗೆಲುವಿನ ನಗು ಬೀರಿದ್ದು ಸುಮಲತಾ.
ಕೆಲವು ಸ್ವಯಂತಪ್ಪುಗಳು ಹಾಗೂ ಸಂಚಿನಿಂದ ನಿಖಿಲ್ ಸೋಲಬೇಕಾಯ್ತು ಎಂದು ಕುಮಾರಸ್ವಾಮಿ ಕೂಡಾ ಹೇಳಿದ್ದಾರೆ. ನಿಖಿಲ್ ಸೋಲಿನ ನಂತರವೂ ಆಗಾಗ್ಗೆ ಮಂಡ್ಯಕ್ಕೆ ಭೇಟಿ ಕೊಡುತ್ತಿರುತ್ತಾರೆ. ಇದರ ನಡುವೆ ರಾಮನಗರ ಕ್ಷೇತ್ರದಿಂದ ಈ ಬಾರಿ ವಿಧಾನಸಭೆಗೆ ಸ್ಪರ್ಧಿಸುವುದೂ ಖಚಿತವಾಗಿದೆ. ಕ್ಷೇತ್ರದ ಶಾಸಕಿಯಾಗಿದ್ದ ಅನಿತಾ ಕುಮಾರಸ್ವಾಮಿ, ಕ್ಷೇತ್ರವನ್ನು ಮಗನಿಗೆ ಬಿಟ್ಟುಕೊಟ್ಟಿದ್ದಾರೆ. ಈ ನಡುವೆಯೇ ಮಂಡ್ಯದಲ್ಲಿ ಮತ್ತೊಮ್ಮೆ ನಿಖಿಲ್ ಅಖಾಡಕ್ಕಿಳಿಯುವ ಸೂಚನೆ ದೊರಕಿದೆ.
ಮಂಡ್ಯದಲ್ಲಿ ಲೋಕಸಭಾ ಚುನಾವಣೆಯಲ್ಲಿ ನಿಖಿಲ್ ಸ್ಪರ್ಧಿಸುತ್ತಾರೆ ಎಂದಿರುವುದು ಶಾಸಕ ಸಿ.ಎಸ್.ಪುಟ್ಟರಾಜು. ಮಂಡ್ಯದಲ್ಲಿ ಪುಟ್ಟರಾಜು ಅವರಿಗೆ ದೊಡ್ಡ ಸ್ಥಾನಮಾನವಿದೆ. ಅಂತಹ ಪುಟ್ಟರಾಜು ಅವರೇ ಪಂಚರತ್ನ ಯಾತ್ರೆಯಲ್ಲಿ ತುಂಬಿದ ವೇದಿಕೆಯಲ್ಲಿ ನಿಖಿಲ್ 2024ರ ಲೋಕಸಭೆಗೆ ಮಂಡ್ಯದಿಂದಲೇ ಸ್ಪರ್ಧಿಸುತ್ತಾರೆ ಎಂದಿರುವುದು ಕುತೂಹಲ ಮೂಡಿಸಿದೆ.
ಎಲ್ಲಿ ಸೋತಿದ್ದೇವೆಯೋ.. ಅಲ್ಲಿಯೇ ಗೆಲ್ಲಬೇಕು. ಯಾರ ವಿರುದ್ಧ ಸೋತಿದ್ದೇವೆಯೋ ಅವರ ವಿರುದ್ಧವೇ ಗೆಲ್ಲಬೇಕು ಎನ್ನುವ ಸೂತ್ರವನ್ನೇನಾದರೂ ನಿಖಿಲ್ ಹಾಗೂ ಕುಮಾರಸ್ವಾಮಿ ಪಾಲಿಸುತ್ತಿದ್ದಾರಾ?
ಮಂಡ್ಯದಲ್ಲಿ ಕಳೆದ ಬಾರಿಯ ಚುನಾವಣೆಯಲ್ಲಿ ಪಕ್ಷೇತರರಾಗಿ ಸ್ಪರ್ಧಿಸಿದ್ದ ಸುಮಲತಾ 7 ಲಕ್ಷದ 3 ಸಾವಿರದ 660 ಮತಗಳನ್ನು ಪಡೆದಿದ್ದರು. ಜೆಡಿಎಸ್-ಕಾಂಗ್ರೆಸ್ ಮೈತ್ರಿಕೂಟದ ಅಭ್ಯರ್ಥಿಯಾಗಿದ್ದ ನಿಖಿಲ್ ಕುಮಾರಸ್ವಾಮಿ 5 ಲಕ್ಷದ 77 ಸಾವಿರದ 784 ಮತಗಳನ್ನು ಪಡೆದಿದ್ದರು. ಒಂದು ಲಕ್ಷದ 25 ಸಾವಿರದ 876 ಮತಗಳ ಅಂತರದಲ್ಲಿ ಸುಮಲತಾ ಗೆದ್ದಿದ್ದರು. ಮಂಡ್ಯ ಲೋಕಸಭೆ ವ್ಯಾಪ್ತಿಯ ಎಲ್ಲ ಕ್ಷೇತ್ರಗಳಲ್ಲಿ ಜೆಡಿಎಸ್ ಶಾಸಕರಿದ್ದರೂ ನಿಖಿಲ್ಗೆ ಲೀಡ್ ಸಿಕ್ಕಿರಲಿಲ್ಲ. 2024ಕ್ಕೆ ನಡೆಯುವ ಎಲೆಕ್ಷನ್ ವೇಳೆ ಖಂಡಿತಾ ರಾಜ್ಯ ರಾಜಕೀಯ ಬದಲಾಗಿರುತ್ತೆ. ಏಕೆಂದರೆ ಅದಕ್ಕೂ ಮುನ್ನ ಇನ್ನೇನು ಕೆಲವೇ ತಿಂಗಳಲ್ಲಿ ವಿಧಾನಸಭೆ ಚುನಾವಣೆ ನಡೆಯಬೇಕಿದೆ. ಅದಾದ ಮೇಲೆ 1 ವರ್ಷದ ನಂತರ ಬರುವ ಲೋಕಸಭೆಯಲ್ಲಿ ರಾಜಕೀಯ ಚಿತ್ರಣ ಯಾವ್ಯಾವ ರೀತಿ ಇರುತ್ತೆ ಅನ್ನೋದೇ ಒಂದು ಕುತೂಹಲ. ಮಂಡ್ಯ ಮತ್ತೊಮ್ಮೆ ರಾಜ್ಯಾದ್ಯಂತ ಸುದ್ದಿಯಾಗಲಿದೆ.
