ಬ್ರಾಹ್ಮಣರ ಪತ್ರಿಕೆಗಳಿಗೆ ಸರ್ಕಾರಿ ಜಾಹೀರಾತು : ನಿಜವಾದ ಕಥೆ ಇದು

ಬ್ರಾಹ್ಮಣರ ಮಾಲೀಕತ್ವದ ಪತ್ರಿಕೆಗಳಿಗೆ ಪ್ರತೀ ತಿಂಗಳೂ ಜಾಹೀರಾತು. ಪತ್ರಿಕೆಗಳ ಮಾಲೀಕರ ಜಾತಿ ಮೂಲ ಹುಡುಕಲು ಹೊರಟಿದೆ ರಾಜ್ಯ ಸರ್ಕಾರ. ಬ್ರಾಹ್ಮಣರ ಪತ್ರಿಕೆಗಳು ಮಾತ್ರವೇ ಪತ್ರಿಕೆಗಳೇ.. ಬೇರೆ ಜಾತಿಯವರ ಪತ್ರಿಕೆ ಪತ್ರಿಕೆಗಳಲ್ಲವೇ.. ಇಂಥಾದ್ದೊಂದು ಟ್ವೀಟ್ ಮಾಡಿದವರು ಪ್ರಿಯಾಂಕ್ ಖರ್ಗೆ. ಇದು ಆರ್.ಎಸ್.ಎಸ್. ಆದೇಶ. ಬೊಮ್ಮಾಯಿಯವರು ಆ ಆದೇಶವನ್ನು ಚಾಚೂ ತಪ್ಪದೆ ಪಾಲಿಸುತ್ತಿದ್ದಾರೆ ಎಂದು ಟೀಕಿಸಿದ್ದರು. ಅದಕ್ಕೆ ಪ್ರತಿಯಾಗಿ ಸರ್ಕಾರಿ ಅಧಿಸೂಚನೆಯನ್ನೂ ಪ್ರತಿಯಾಗಿ ತೋರಿಸಿದ್ದರು.
ಪ್ರಿಯಾಂಕ್ ಖರ್ಗೆ ಟ್ವೀಟ್ ಮಾಡುವ ಮೊದಲೇ ಸರ್ಕಾರಿ ಆದೇಶ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡಿತ್ತು. ಬ್ರಾಹ್ಮಣರು, ಬ್ರಾಹ್ಮಣ ಪತ್ರಕರ್ತರು, ಸಂಪಾದಕರನ್ನು ಹಿಗ್ಗಾಮುಗ್ಗಾ ಟೀಕಿಸಲಾಗಿತ್ತು. ಇದಕ್ಕೆಲ್ಲ ಕಾರಣ ಆರ್.ಎಸ್.ಎಸ್. ಎಂದೂ ಜರೆಯಲಾಗಿತ್ತು. ಆದರೆ ಸುದ್ದಿಯೇನು?

ನಿಜವಾದ ಜಾಹೀರಾತಿನ ಕಥೆ ಇದು : ರಾಜ್ಯ ಸರ್ಕಾರ ಕಳೆದ ಬಜೆಟ್`ನಲ್ಲಿ ಪತ್ರಿಕೆಗಳಿಗೆ ಪ್ರತಿ ತಿಂಗಳು ಎರಡು ಪುಟಗಳ ಜಾಹೀರಾತನ್ನು ನೀಡುವುದಾಗಿ ಘೋಷಿಸಿತ್ತು. ಜಿಲ್ಲಾ ಮತ್ತು ಪ್ರಾದೇಶಿಕ ಪತ್ರಿಕೆಗಳಿಗೆ ಘೋಷಿಸಲಾಗಿದ್ದು ಈ ಪಟ್ಟಿಯಲ್ಲಿ ಹಿಂದುಳಿದ ಮತ್ತ ದಲಿತರ ಪತ್ರಿಕೆಳಿದ್ದವು. ಎಸ್ಸಿ, ಎಸ್ಟಿ ಹಾಗೂ ಒಬಿಸಿ ಒಡೆತನದವರ ಮಾಲೀಕತ್ವದ ಪತ್ರಿಕೆಗಳಿಗೆ ಜಾಹೀರಾತು ನೀಡುವುದಕ್ಕೆ ಸರ್ಕಾರ ಸುತ್ತೋಲೆ ಹೊರಡಿಸಿತ್ತು. ಇವುಗಳಿಗೆ ಬ್ರಾಹ್ಮಣ, ಆರ್ಯವೈಶ್ಯ ಸೇರಿದಂತೆ ಇನ್ನಿತರ ಜಾತಿ ಸಮುದಾಯಗಳ ಪತ್ರಿಕೆಗಳನ್ನೂ ಸೇರಿಸಿ. ಎಲ್ಲ ಪತ್ರಿಕೆಗಳ ವೆಚ್ಚವೂ ಒಂದೇ ಎಂದು ಕರ್ನಾಟಕ ರಾಜ್ಯ ಜಿಲ್ಲಾ ಮತ್ತು ಪ್ರಾದೇಶಿಕ ಪತ್ರಿಕೆಗಳ ಮಾಲೀಕರ ಸಂಘ ಮನವಿ ಸಲ್ಲಿಸಿತ್ತು. ಸರ್ಕಾರ ನೀಡುವ ವಿಶೇಷ ಜಾಹೀರಾತುಗಳನ್ನು ಜಿಲ್ಲಾ ಮಟ್ಟದ ಪತ್ರಿಕೆಗಳಿಗೂ ವಿಸ್ತರಿಸಬೇಕು ಎಂದು ಮನವಿ ಮಾಡಿತ್ತು. ಈ ಮವನಿಗೆ ಸ್ಪಂದಿಸಿದ ರಾಜ್ಯ ಸರ್ಕಾರ ಜಾಹೀರಾತು ಕುರಿತಂತೆ ತಿದ್ದುಪಡಿ ಸುತ್ತೋಲೆ ಹೊರಡಿಸಿತ್ತು.
ರಾಜ್ಯ ಸರ್ಕಾರದ ವಿಶೇಷ ಜಾಹೀರಾತುಗಳನ್ನು ಸರ್ಕಾರ ನೀಡುವುದು ಸಂಪಾದಕರ ಜಾತಿ ನೋಡಿಯೇ ಎನ್ನುವುದು ಹೊಸದಲ್ಲ.

ಸರ್ಕಾರದ ಅಧಿಕೃತ ಮಾಹಿತಿಯ ಪ್ರಕಾರವೇ ಪರಿಶಿಷ್ಟ ಜಾತಿ ಸಂಪಾದಕರ ಮತ್ತು ಮಾಲೀಕತ್ವದ ಪತ್ರಿಕೆಗಳಿಗೆ ವಾರ್ಷಿಕ 10 ಕೋಟಿ ರೂ. ಪರಿಶಿಷ್ಠ ಪಂಗಡದ ಸಂಪಾದಕರ ಮತ್ತು ಮಾಲೀಕತ್ವದ ಪತ್ರಿಕೆಗಳಿಗೆ ವಾರ್ಷಿಕ 1.20 ಕೋಟಿ ರೂ. ಹಿಂದುಳಿದ ವರ್ಗದವ ಸಂಪಾದಕರ ಮತ್ತು ಮಾಲೀಕತ್ವದ ಪತ್ರಿಕೆಗಳಿಗೆ ವಾರ್ಷಿಕ 20 ಕೋಟಿ ರೂ.
ರಾಜ್ಯ ಗಡಿ ಭಾಗದ ತಾಲ್ಲೂಕುಗಳಿಂದ ಪ್ರಕಟವಾಗುವ ಪತ್ರಿಕೆಗಳಿಗೆ 8 ಕೋಟಿ ರೂ. ನೀಡಲಾಗುತ್ತಿದೆ.

ಬ್ರಾಹ್ಮಣ ಸಮುದಾಯದ ಮಾಲೀಕತ್ವ ಮತ್ತು ಸಂಪಾದಕ್ವತ್ವ ಇರುವ ಪತ್ರಿಕೆಗಳಿಗೆ ವಾರ್ಷಿಕ ನೀಡುವ ಜಾಹೀರಾತಿನ ಲೆಕ್ಕ 1.50 ಕೋಟಿ ರೂ. ಒಟ್ಟಾರೆ 40.70 ಕೋಟಿ ರೂ.ಗಳನ್ನು ನೀಡಲಾಗುತ್ತದೆ. ಇದು ರಿಯಾಲಿಟಿ.

ಅಭಿನಂದನೆ ಮತ್ತು ಸ್ಪಷ್ಟನೆ : ಪರಿಶಿಷ್ಟಜಾತಿ ಹಾಗೂ ಹಿಂದುಳಿದ ವರ್ಗದ ವ್ಯಕ್ತಿಗಳ ಮಾಲೀಕತ್ವದ ಪತ್ರಿಕೆಗಳಿಗೆ ನೀಡುವಂತೆ ಬ್ರಾಹ್ಮಣ ಸಮುದಾಯದ ವ್ಯಕ್ತಿಗಳ ಮಾಲೀಕತ್ವದ ಪತ್ರಿಕೆಗಳಿಗೂ ‘ಪ್ರೋತ್ಸಾಹಕ ಜಾಹೀರಾತು’ ನೀಡಲು ಆದೇಶಿಸಿರುವ ರಾಜ್ಯ ಸರ್ಕಾರಕ್ಕೆ ಅಖಿಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾ ಅಭಿನಂದನೆ ಸಲ್ಲಿಸಿದೆ.

ಇದೇ ವೇಳೆ, ಈ ಸವಲತ್ತು ಕೇವಲ ಬ್ರಾಹ್ಮಣ ಸಮುದಾಯದ ಒಡೆತನದ ಪತ್ರಿಕೆಗಳಿಗಷ್ಟೇ ಸೀಮಿತ ಎಂಬಂತೆ ಬಿಂಬಿಸುತ್ತಿರುವ ಬಗ್ಗೆ ವಿಷಾದ ವ್ಯಕ್ತಪಡಿಸಿದೆ. ತಮಗೆ ನೀಡಿರುವ ಈ ಸೌಲಭ್ಯದಿಂದ ಯಾವುದೇ ವರ್ಗ ಸೌಲಭ್ಯದಿಂದ ವಂಚಿತವಾಗಿಲ್ಲ. ಎಲ್ಲ ಸಮುದಾಯದವರ ಪತ್ರಿಕೆಗಳಿಗೂ ಜಾಹೀರಾತು ಸಿಗುತ್ತಿದೆ. ಇದೇ ಮೊದಲ ಬಾರಿಗೆ ಬ್ರಾಹ್ಮಣರ ಮಾಲೀಕತ್ವದ ಪತ್ರಿಕೆಗಳು ಸರ್ಕಾರದ ಪ್ರಯೋಜನ ಪಡೆದಿವೆ ಎಂದು ಮಾಹಿತಿ ನೀಡಿದೆ.