ಶಾಸಕ ಸೂರಜ್ ರೇವಣ್ಣ ಹಾಗೂ ಸಂಸದ ಪ್ರಜ್ವಲ್ ರೇವಣ್ಣ ಅವರು ನೀಡಿರುವ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿರುವ ಕುಮಾರಸ್ವಾಮಿ, ಮಕ್ಕಳ ತಲೆ ಕೆಡಿಸುವ ಶಕುನಿಗಳಿದ್ದಾರೆ ಎಂದು ಟೀಕೆ ಮಾಡಿದ್ದಾರೆ.
ಹಾಸನಕ್ಕೆ ರೇವಣ್ಣ ಸಾಹೇಬ್ರು, ದೇವೇಗೌಡರೇ ಫೈನಲ್. ಇಲ್ಲಿನ ರಾಜಕೀಯ ನಮಗೆ ಗೊತ್ತು. ಹಾಸನದ ತಂಟೆಗೆ ಬರಬೇಡಿ. ಹಾಸನದಲ್ಲಿ ಭವಾನಿ ರೇವಣ್ಣ ನಿಂತರೆ ಖಂಡಿತಾ ಗೆಲ್ಲುತ್ತಾರೆ ಎಂದು ಹೇಳಿದರು ಪ್ರಜ್ವಲ್ ಮತ್ತು ಸೂರಜ್ ರೇವಣ್ಣ. ತಾಲೂಕಿನಲ್ಲಿ ರೇವಣ್ಣ ಸಾಹೇಬ್ರು 6-7 ಶಾಸಕರನ್ನು ಹಲವು ಚುನಾವಣೆಗಳಿಂದ ಗೆಲ್ಲಿಸಿಕೊಂಡು ಬರುತ್ತಿದ್ದಾರೆ ಎಂದಿದ್ದರು ಸೂರಜ್ ರೇವಣ್ಣ.
ಇದಕ್ಕೆ ಕುಮಾರಸ್ವಾಮಿ ಪ್ರತಿಕ್ರಿಯೆ ನೀಡಿರುವುದು ಮಂತ್ರಾಲಯದಲ್ಲಿ. ಪತ್ನಿ ಅನಿತಾ ಕುಮಾರಸ್ವಾಮಿಯವರ ಜೊತೆ ಮಂತ್ರಾಲಯಕ್ಕೆ ಭೇಟಿ ನೀಡಿದ್ದರು. ಅಲ್ಲಿ ತಮ್ಮ ಮಕ್ಕಳನ್ನು ಹಾಲಲ್ಲಾದರೂ ಹಾಕು, ನೀರಲ್ಲಾದರೂ ಹಾಕು ಎಂದು ಅನಿತಾ ಬೇಡಿಕೊಂಡರು. ಕುಮಾರಸ್ವಾಮಿ ಅಣ್ಣನ ಮಕ್ಕಳು ನೀಡಿರುವ ಹೇಳಿಕೆಯಿಂದಾಗಿ ನೊಂದಿದ್ದಾರೆ ಎನ್ನಲಾಗಿದ್ದು, ತಮ್ಮ ಕುಟುಂಬದ ಗೊಂದಲ ಬಗೆಹರಿಸುವಂತೆ ಬೇಡಿಕೊಂಡಿದ್ದಾರೆ ಎಂದು ಮೂಲಗಳು ಹೇಳಿವೆ.
ಮಂತ್ರಾಲಯಕ್ಕೆ ಭೇಟಿ ನೀಡುವ ಮುನ್ನ ಸೂರಜ್ ಮತ್ತು ಪ್ರಜ್ವಲ್ ಹೇಳಿಕೆ ಬಗ್ಗೆ ಭಾವುಕರಾಗಿಯೇ ಮಾತನಾಡಿದ್ದ ಕುಮಾರಸ್ವಾಮಿ ತಮ್ಮ ಮಕ್ಕಳ ಕಿವಿ ಕಚ್ಚುತ್ತಿರುವ ಶಕುನಿಗಳ ಬಗ್ಗೆಯೂ ಗೊತ್ತು. ನಮ್ಮ ಮನೆ ಮಕ್ಕಳು. ನಮ್ಮ ಬಗ್ಗೆ ಮಾತನಾಡದೆ ಇನ್ಯಾರ ಬಗ್ಗೆ ಮಾತನಾಡ್ತಾರೆ. ಇದು ಕಲಿಯುಗದ ರಾಜಕೀಯ. ನೂರಾರು ಜನ ಶಕುನಿಗಳಿರ್ತಾರೆ ಎಂದಿದ್ದಾರೆ.
ಅಷ್ಟೇ ಅಲ್ಲ, ನನ್ನ ಮತ್ತು ರೇವಣ್ಣ ಮಧ್ಯೆ ಹೊಡೆದಾಟದ ಕನಸು ಕಾಣುವುದು ಕೇವಲ ಭ್ರಮೆ ಎಂದಿದ್ದಾರೆ ಕುಮಾರಣ್ಣ. ನಾವು ಅಣ್ಣ-ತಮ್ಮ ಒಂದೇ ಎಂಬ ಸಂದೇಶ ರವಾನಿಸಿದ್ದಾರೆ ರೇವಣ್ಣ.
