ತಮ್ಮನ ಪರ ನಿಂತ ಅಣ್ಣ. ಚಿಕ್ಕಪ್ಪನನ್ನೇ ಪ್ರಶ್ನಿಸಿದ್ದ ಮಕ್ಕಳಿಗೆ ಬುದ್ದಿವಾದ. ಅಣ್ಣನ ಮಕ್ಕಳನ್ನು ಇರಲಿ ಬಿಡು, ನಮ್ಮ ಕುಟುಂಬದ ಸಮಸ್ಯೆ. ನಾವೇ ಬಗೆಹರಿಸುತ್ತೇವೆ ಎಂಬಂತೆ ಮಾತನಾಡಿ ವಿವಾದ ತಪ್ಪಿಸಿದ ತಮ್ಮ. ಇದು ಹೆಚ್.ಡಿ.ಕುಮಾರಸ್ವಾಮಿ-ಪ್ರಜ್ವಲ್ ರೇವಣ್ಣ-ಸೂರಜ್ ರೇವಣ್ಣ-ಭವಾನಿ ರೇವಣ್ಣ-ಹೆಚ್.ಡಿ.ರೇವಣ್ಣ ಅವರ ನಡುವೆ ನಡೆದ ವಾಕ್ ಸಮರದ ಓವರ್ ಆಲ್ ಪಿಕ್ಚರ್.
ವಿಧಾನಸಭಾ ಎಲೆಕ್ಷನ್ ಹತ್ತಿರವಾಗುತ್ತಿದ್ದಂತೆಯೇ ಹಾಸನ ಇಡೀ ರಾಜ್ಯದ ಗಮನ ಸೆಳೆಯುತ್ತಿದೆ. ಸೆಂಟರ್ ಆಫ್ ಬ್ಯಾಟಲ್ ಆಗುತ್ತಿದೆಯೇನೋ ಎಂಬ ಭಾವ. ಭವಾನಿ ರೇವಣ್ಣ ಅವರ ಬಹಿರಂಗ ಹೇಳಿಕೆಯಿಂದಾಗಿ ಶುರುವಾಗಿರುವ ಜ್ವಾಲಾಗ್ನಿ ಇದು. ಕುಮಾರಸ್ವಾಮಿ ಅವರಿಗೆ ಮಾಜಿ ಶಾಸಕ ಪ್ರಕಾಶ್ ಅವರ ಪುತ್ರ ಸ್ವರೂಪ್ ಅವರನ್ನೇ ನಿಲ್ಲಿಸುವ ಬಗ್ಗೆ ಮನಸ್ಸಿದೆ. ಟಿಕೆಟ್ ಘೋಷಿಸದೇ ಹೋದರು, ಅದನ್ನು ತಮ್ಮ ಇನ್ನಿತರ ವರ್ತನೆಗಳ ಮೂಲಕ ತೋರ್ಪಡಿಸಿದ್ದಾರೆ. ಇದಕ್ಕೆ ಪ್ರತಿಯಾಗಿ ಭವಾನಿ ರೇವಣ್ಣ ನಾನೇ ಅಭ್ಯರ್ಥಿ ಎಂದು ಯಾವಾಗ ಹೇಳಿದರೋ ಹಾಸನ ರಣರಂಗ ರಂಗೇರಿತು. ಸಾಮಾನ್ಯ ಕಾರ್ಯಕರ್ತನನ್ನು ನಿಲ್ಲಿಸಿ ಗೆಲ್ಲಿಸುತ್ತೇನೆ ಎನ್ನುವ ಮೂಲಕ ಕುಮಾರಸ್ವಾಮಿ ಅತ್ತಿಗೆಯ ಮಾತಿಗೆ ತಿರುಗೇಟು ಕೊಟ್ಟರು.
ಆರಂಭದಲ್ಲಿ ದೊಡ್ಡ ಗೌಡ್ರು ತೀರ್ಮಾನ ಮಾಡುತ್ತಾರೆ ಎಂದಿದ್ದ ಪ್ರಜ್ವಲ್ ಮತ್ತು ಸೂರಜ್ ರೇವಣ್ಣ, ಕುಮಾರಸ್ವಾಮಿ ಹೇಳಿಕೆ ನಂತರ ಸ್ವಲ್ಪ ಗರಂ ಆದಂತೆ ಕಂಡುಬಂದಿದ್ದು ಹೌದು. ಹಾಸನಕ್ಕೆ ರೇವಣ್ಣ ಸಾಹೇಬ್ರು, ದೇವೇಗೌಡರೇ ಫೈನಲ್.
ಇಲ್ಲಿನ ರಾಜಕೀಯ ನಮಗೆ ಗೊತ್ತು. ಹಾಸನದ ತಂಟೆಗೆ ಬರಬೇಡಿ. ಹಾಸನದಲ್ಲಿ ಭವಾನಿ ರೇವಣ್ಣ ನಿಂತರೆ ಖಂಡಿತಾ ಗೆಲ್ಲುತ್ತಾರೆ ಎಂದು ಹೇಳಿದರು ಪ್ರಜ್ವಲ್ ಮತ್ತು ಸೂರಜ್ ರೇವಣ್ಣ. ಯಾರ ಸಮರ್ಥನೆಗಳೇನೇ ಇದ್ದರೂ ಅದು ಕುಮಾರಸ್ವಾಮಿಯವರ ಸಾರಥ್ಯವನ್ನೇ ಪ್ರಶ್ನಿಸುವಂತಿದ್ದುದು ಹೌದು. ಸಹಜವಾಗಿಯೇ ಕನಲಿದವರು ಜೆಡಿಎಸ್ ಕಾರ್ಯಕರ್ತರೇ. ಅದರಲ್ಲೂ ಹಾಸನದ ಜೆಡಿಎಸ್ ಕಾರ್ಯಕರ್ತರು.
ರೇವಣ್ಣ ಪ್ರತಿಜ್ಞೆ.. ಕಾರ್ಯಕರ್ತರಿಗೆ ರಿಲೀಫ್ : ಭಾನುವಾರ ಸುದ್ದಿಗಾರರ ಜತೆಗೆ ಮಾತನಾಡಿದ ಅವರು, ಮುಂದಿನ ವಿಧಾನಸಭಾ ಚುನಾವಣೆಯಲ್ಲಿ ಹಾಸನ ಕ್ಷೇತ್ರದ ಟಿಕೆಟ್ ವಿಚಾರವಾಗಿ ಕುಮಾರಸ್ವಾಮಿ ನಿರ್ಣಯವೇ ಅಂತಿಮ. ಹಾಸನ ಹಾಗೂ ಜಿಲ್ಲೆಯ ಉಳಿದ ಕ್ಷೇತ್ರಗಳಲ್ಲಿ ಟಿಕೆಟ್ ಕೊಡುವ ವಿಚಾರದಲ್ಲಿ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ, ಕುಮಾರಸ್ವಾಮಿ, ಜೆಡಿಎಸ್ ರಾಜ್ಯಾಧ್ಯಕ್ಷ ಸಿ.ಎಂ.ಇಬ್ರಾಹಿಂ ಹಾಗೂ ಜಿಲ್ಲೆಯ ಜೆಡಿಎಸ್ ಶಾಸಕರ ನಿರ್ಣಯಕ್ಕೆ ನಾನು ಮತ್ತು ನನ್ನ ಕುಟುಂಬ ಬದ್ಧರಾಗಿರುತ್ತದೆ. ನಾನು ಬದುಕಿರುವವರೆಗೂ ಕುಮಾರಸ್ವಾಮಿ ಮತ್ತು ನಾನು ಹೊಡೆದಾಡುವ ಪ್ರಶ್ನೆಯೇ ಉದ್ಭವಿಸಲ್ಲ.
ಹೆಚ್.ಡಿ.ರೇವಣ್ಣ ಅವರ ಇದೊಂದು ಹೇಳಿಕೆ ಜೆಡಿಎಸ್ ಕಾರ್ಯಕರ್ತರನ್ನು ಸ್ವಲ್ಪ ರಿಲ್ಯಾಕ್ಸ್ ಮಾಡಿರುವುದು ಹೌದು. ಹಾಸನ ವಿಧಾನಸಭಾ ಕ್ಷೇತ್ರದ ಟಿಕೆಟ್ ವಿಚಾರವಾಗಿ ಕುಮಾರಸ್ವಾಮಿ ಮತ್ತು ರೇವಣ್ಣ ಹೊಡೆದಾಟಕ್ಕೆ ಇಳಿಯಲಿದ್ದಾರೆಂದು ಕಳೆದ ಮೂರು ದಿನಗಳಿಂದ ಚರ್ಚೆ ಆಗುತ್ತಿದೆ. ಯಾರೇ ಆದರೂ ಆ ರೀತಿ ಅಂದುಕೊಂಡಿದ್ದರೆ ಅಂಥವರಿಗೆ ಭ್ರಮನಿರಸನ ಆಗುವುದು ಖಚಿತ. ಕುಮಾರಸ್ವಾಮಿ ಅವರಿಗೆ ಎರಡು ಬಾರಿ ಬೈಪಾಸ್ ಸರ್ಜರಿ ಆಗಿದೆ. ಯಾವುದೇ ಕಾರಣಕ್ಕೂ ಕುಮಾರಸ್ವಾಮಿ ಮತ್ತು ನನ್ನನ್ನು ಬೇರ್ಪಡಿಸಲು ಸಾಧ್ಯವಿಲ್ಲ. ಹಾಸನ ಜಿಲ್ಲೆಯ ಎಲ್ಲಾ ಟಿಕೆಟ್ಗಳ ಬಗ್ಗೆ ಕುಮಾರಸ್ವಾಮಿ, ಜಿಲ್ಲೆಯ ಶಾಸಕರು, ಪಕ್ಷದ ರಾಜ್ಯಾಧ್ಯಕ್ಷರು, ದೇವೇಗೌಡರ ಅಭಿಪ್ರಾಯ ಪಡೆದು ತೀರ್ಮಾನ ಮಾಡುತ್ತೇವೆ. ಈ ವಿಚಾರವಾಗಿ ನಾನಾಗಲಿ, ಪ್ರಜ್ವಲ್, ಸೂರಜ್ ಆಗಲಿ ಏನು ಮಾತನಾಡುತ್ತೇವೆ ಎನ್ನುವುದು ಮುಖ್ಯ ಅಲ್ಲ ಎಂದಿರೋ ರೇವಣ್ಣ ಎಲ್ಲದಕ್ಕೂ ಫುಲ್ ಸ್ಟಾಪ್ ಇಡುವ ಮಾತನ್ನಾಡಿದ್ದಾರೆ. ತಮ್ಮ ಮಕ್ಕಳನ್ನೇ ಗದರಿಸುವ ಧ್ವನಿಯಲ್ಲಿ ಮಾತನಾಡಿರುವ ರೇವಣ್ಣ ನಮ್ಮದು ಕುಟುಂಬ ರಾಜಕಾರಣ ಎನ್ನುವುದಾದರೆ ಎಲ್ಲಾ ರಾಜಕೀಯ ಪಕ್ಷಗಳಲ್ಲೂ ಕುಟುಂಬ ರಾಜಕಾರಣ ಇಲ್ಲವೇ? ನಮ್ಮ ಮಕ್ಕಳ ಮೇಲೆ ಅಷ್ಟೊಂದು ಕಣ್ಣಿದ್ದರೆ ಸಂಸದ ಪ್ರಜ್ವಲ್, ಎಂಎಲ್ಸಿ ಸೂರಜ್ ಅವರಿಂದ ರಾಜೀನಾಮೆ ಕೊಡಿಸುತ್ತೇನೆ ಎಂದು ಗುಡುಗಿದ್ಧಾರೆ.
ನನ್ನ ರೇವಣ್ಣ ಮಧ್ಯೆ ಗೊಂದಲ ಸಾಧ್ಯವಿಲ್ಲ. ಮಕ್ಕಳ ಮಾತನ್ನು ದೊಡ್ಡದು ಮಾಡುವ ಆಗತ್ಯವಿಲ್ಲ : ಕುಮಾರಸ್ವಾಮಿ
ಹಾಸನ ಕ್ಷೇತ್ರಕ್ಕೆ ಭವಾನಿ ರೇವಣ್ಣ ಅವರು ಟಿಕೆಟ್ ಕೇಳಿರುವುದು ದೊಡ್ಡ ವಿಷಯವಲ್ಲ. ಆ ಕುರಿತ ಗೊಂದಲವೇನಿದ್ದರೂ ಮನೆಯ ನಾಲ್ಕು ಗೋಡೆಗಳ ಮಧ್ಯೆ ಮಾತನಾಡಿ ಬಗೆಹರಿಸಿಕೊಳ್ಳುತ್ತೇವೆ. ಮಕ್ಕಳಾಡಿದ ಮಾತುಗಳನ್ನು ದೊಡ್ಡದನ್ನಾಗಿ ಮಾಡುವ ಅಗತ್ಯವಿಲ್ಲ. ನನ್ನ ಮತ್ತು ಸೋದರ ಎಚ್.ಡಿ.ರೇವಣ್ಣ ನಡುವೆ ಗೊಂದಲ ಸೃಷ್ಟಿಸಲು ಸಾಧ್ಯವಿಲ್ಲ ಎಂದಿದ್ದಾರೆ ಕುಮಾರಸ್ವಾಮಿ.
ಮೂಲ ಎಲ್ಲಿದೆ ಗೊತ್ತಾ?
ಕಳೆದ ಚುನಾವಣೆಯಲ್ಲಿ ನಮ್ಮ ಕುಟುಂಬದಿಂದ ನಾವಿಬ್ಬರೇ ಎಂದಿದ್ದರು ಕುಮಾರಸ್ವಾಮಿ. ಆಗಲೂ ಭವಾನಿ ರೇವಣ್ಣ ಅವರಿಗೆ ಹಾಸನ ಟಿಕೆಟ್ ಕೊಡಬೇಕು ಎನ್ನುವ ಕೂಗು ಕೇಳಿಬಂದಿತ್ತು. ಆಗ ತಾವು ಮತ್ತು ರೇವಣ್ಣ ಮಾತ್ರ ಅವರು ಮಾತ್ರ ನಿಲ್ಲುತ್ತೇವೆ ಎಂದ ಕುಮಾರಸ್ವಾಮಿ, ತಾವು ರಾಮನಗರ ಮತ್ತು ಚೆನ್ನಪಟ್ಟಣ ಎರಡೂ ಕಡೆ ಎಲೆಕ್ಷನ್ನಿಗೆ ನಿಂತರು. ಎರಡೂ ಕಡೆ ಗೆದ್ದರು. ಸಹಜವಾಗಿಯೇ ಒಂದು ಕ್ಷೇತ್ರ ತೆರವು ಮಾಡಬೇಕಾದಾಗ ಚೆನ್ನಪಟ್ಟಣ ಉಳಿಸಿಕೊಂಡು, ತಾವು ನಿಲ್ಲುತ್ತಿದ್ದ ಚೆನ್ನಪಟ್ಟಣವನ್ನು ಅನಿತಾ ಕುಮಾರಸ್ವಾಮಿ ಅವರಿಗೆ ಬಿಟ್ಟುಕೊಟ್ಟರು. ಅನಿತಾ ಶಾಸಕಿಯಾದರು. ಭವಾನಿ ರೇವಣ್ಣ ಅವರಿಗೆ ಇದು ತಂತ್ರವಾಗಿ ಕಾಣಿಸಿತು. ಅದಾದ ಮೇಲೆ ಮಂಡ್ಯದಲ್ಲಿ ನಿಖಿಲ್ ನಿಂತು ಸೋತರೆ, ಹಾಸನದಲ್ಲಿ ಪ್ರಜ್ವಲ್ ನಿಂತು ಲೋಕಸಭೆಗೆ ಹೋದರು. ಈಗ ಮತ್ತೊಮ್ಮೆ ಚುನಾವಣೆ ಬಂದಿದೆ. ಅನಿತಾ ಕುಮಾರಸ್ವಾಮಿ ಕ್ಷೇತ್ರವನ್ನು ಮಗ ನಿಖಿಲ್ ಅವರಿಗೆ ಬಿಟ್ಟುಕೊಟ್ಟಿದ್ಧಾರೆ. ತಮಗೆ ಹಾಸನ ಬಿಟ್ಟುಕೊಡಲಿ ಎನ್ನುವುದು ಭವಾನಿ ರೇವಣ್ಣ ಅವರ ಬಯಕೆ.
