ಐಶ್ವರ್ಯ ಮಹದೇವು. ಮಾಜಿ ಶಾಸಕ ಮಂಚನಹಳ್ಳಿ ಮಹದೇವು ಪುತ್ರಿ. ಬೆಂಕಿ ಮಹದೇವು ಎಂದೇ ಖ್ಯಾತರಾಗಿದ್ದ ಮಹದೇವು, ಈಗಿಲ್ಲ. ಒಂದು ಕಾಲದಲ್ಲಿ ಸಿದ್ದರಾಮಯ್ಯ ಹಾಗೂ ಡಿಕೆ ಶಿವಕುಮಾರ್ ಇಬ್ಬರಿಗೂ ಆತ್ಮೀಯರಾಗಿದ್ದ ಮಹದೇವು, ಸಿದ್ದರಾಮಯ್ಯ ಜೊತೆ ಜೆಡಿಎಸ್`ನಲ್ಲಿದ್ದವರೇ. ಹೆಚ್.ವಿಶ್ವನಾಥ್ ವಿರುದ್ಧ ಗೆದ್ದಿದ್ದ ಅವರಿಗೆ ನಂತರದ ಚುನಾವಣೆಯಲ್ಲಿ ಟಿಕೆಟ್ ಸಿಕ್ಕಿರಲಿಲ್ಲ. ಸ್ವತಃ ಅದನ್ನು ಸಿದ್ದರಾಮಯ್ಯ ಬಹಿರಂಗ ವೇದಿಕೆಯಲ್ಲಿ ಹೇಳಿಕೊಂಡಿದ್ದರು ಸಿದ್ದರಾಮಯ್ಯ.
ನಾನು ವಿಶ್ವನಾಥನಿಗಾಗಿ ಮಹದೇವುಗೆ ಟಿಕೆಟ್ ತಪ್ಪಿಸಿದ್ದೆ. ನನ್ನಿಂದ ಯಾರಿಗಾದರೂ ಅನ್ಯಾಯವಾಗಿದೆ ಎಂದರೆ ಅದು ಮಹದೇವುಗೆ ಎಂದಿದ್ದರು ಸಿದ್ದರಾಮಯ್ಯ. ಅಷ್ಟೇ ಅಲ್ಲ, ಅವರ ಪುತ್ರಿ ಐಶ್ವರ್ಯ ಮಹದೇವು ಅವರನ್ನು ದೊಡ್ಡ ಎತ್ತರಕ್ಕೆ ಬೆಳೆಸುವ ಹೊಣೆ ನನ್ನ ಮೇಲಿದೆ ಎಂದು ಕೂಡಾ ಹೇಳಿದ್ದರು ಸಿದ್ದರಾಮಯ್ಯ. ಅವರಷ್ಟೇ ಅಲ್ಲ, ಕೆಪಿಸಿಸಿ ಅಧ್ಯಕ್ಷರಾಗಿರುವ ಡಿಕೆ ಶಿವಕುಮಾರ್ ಕೂಡಾ ಹಾಗೆಯೇ ಹೇಳಿದ್ದರು. ಕೆ.ಆರ್.ಪೇಟೆಯಲ್ಲಿ ನಡೆದ ಪ್ರಜಾಧ್ವನಿ ಕಾರ್ಯಕ್ರಮದಲ್ಲಿ ಕೂಡಾ ಅದನ್ನೇ ಹೇಳಿದ ಡಿಕೆಶಿ, ವೇದಿಕೆಯಲ್ಲಿ ಮಹದೇವು ಅವರನ್ನು ಸ್ಮರಿಸಿದರು. ಐಶ್ವರ್ಯ ನನ್ನ ಮಗಳಿದ್ದ ಹಾಗೆ ಎಂದರು. ಆದರೆ ಟಿಕೆಟ್ ಘೋಷಣೆಯಾಗಿದ್ದು ಮಾತ್ರ ರವಿ ಶಂಕರ್ ಅವರಿಗೆ. ಐಶ್ವರ್ಯಾ ಕಣ್ಣೀರಾದರು. ಅಂದಹಾಗೆ ಐಶ್ವರ್ಯ ಮಹದೇವು ಕೂಡಾ ಟಿಕೆಟ್`ಗೆ ಅರ್ಜಿ ಹಾಕಿದ್ದರು. 5 ಸಾವಿರ ರೂ. ಅರ್ಜಿ ಶುಲ್ಕ ಹಾಗೂ 2 ಲಕ್ಷದ ಡಿಡಿ ಕೊಟ್ಟೇ ಅರ್ಜಿ ಸಲ್ಲಿಸಿದ್ದರು.
ಐಶ್ವರ್ಯ ಮಹದೇವು ಕಣ್ಣೀರು ಹಾಕಿದ್ದೇಕೆ?
ಸಾಲಿಗ್ರಾಮದಲ್ಲಿ ನಡೆದ ಸಮಾವೇಶದಲ್ಲಿ ಐಶ್ವರ್ಯ ಮಹದೇವು ಡಿಕೆ ಶಿವಕುಮಾರ್ ಅವರು ನನ್ನ ತಂದೆಯಂತೆ. ತಂದೆಯನ್ನು ಕಳೆದುಕೊಂಡು 17 ವರ್ಷವಾಗಿದೆ. ಆಗಿನಿಂದಲೂ ನನಗೆ ಬೆಂಬಲವಾಗಿರುವುದು ಡಿಕೆ ಶಿವಕುಮಾರ್ ಎಂದು ಬಹಿರಂಗವಾಗಿ ಹೇಳಿದ್ದರು. ಅದು ಡಿಕೆ ಶಿವಕುಮಾರ್ ಭಾಷಣ ಆರಂಭವಾಗುವುದಕ್ಕೆ ಮುನ್ನ. ಅಷ್ಟೇ ಅಲ್ಲ, ಅದೇ ವೇದಿಕೆಯಲ್ಲಿ ರಾಜಕೀಯ ಅಂದ್ರೆ ಜವಾಬ್ದಾರಿ. ಒಬ್ಬ ವ್ಯಕ್ತಿಗೆ ವೋಟ್ ಹಾಕಿದರೆ, ಆ ವ್ಯಕ್ತಿ ಪರವಾಗಿಯೇ ಇರಬೇಕು. 
ಐದು ವರ್ಷಕ್ಕೊಮ್ಮೆ ಬರುವ, ಕ್ಷೇತ್ರದಲ್ಲಿ ಏನಾಗುತ್ತಿದೆ ಎಂದು ಗೊತ್ತಿಲ್ಲದ ವ್ಯಕ್ತಿಗೆ ಅಲ್ಲ ಎಂದು ಬಹಿರಂಗವಾಗಿಯೇ ಟೀಕಿಸಿದ್ದರು. ಕಾಂಗ್ರೆಸ್ಸಿನಲ್ಲಿದ್ದವರಿಗೆ, ಸ್ಥಳೀಯ ಕಾರ್ಯಕರ್ತರಿಗೆ ಅದು ಇನ್ನೊಬ್ಬ ಟಿಕೆಟ್ ಆಕಾಂಕ್ಷಿ ರವಿಶಂಕರ್ ಅವರಿಗೇ ಹೇಳಿದ ಮಾತು ಎಂದು ಅರ್ಥವಾಗಿತ್ತು. ಆದರೆ ವೇದಿಕೆಯೇರಿದ ಡಿಕೆ ಶಿವಕುಮಾರ್ ಮಾಡಿದ್ದೇ ಬೇರೆ. ಯಾವ ರವಿಶಂಕರ್ ಬಗ್ಗೆ ಐಶ್ವರ್ಯ ಮಹದೇವು ಪರೋಕ್ಷವಾಗಿ ಸಿಟ್ಟಾಗಿದ್ದರೋ, ಅವರಿಗೇ ಟಿಕೆಟ್ ಕೊಟ್ಟುಬಿಟ್ಟರು. ಐಶ್ವರ್ಯ ಮಹದೇವು ಕಣ್ಣೀರು ಹಾಕಿದ್ದು ಆವಾಗ. ಸಾಮಾನ್ಯವಾಗಿ ಭಾವನೆಗಳನ್ನು ಅದುಮಿಟ್ಟುಕೊಳ್ಳುವ, ಹೊರಗೆ ತೋರ್ಪಡಿಸಿಕೊಳ್ಳದ ಐಶ್ವರ್ಯ ಮಹದೇವು ವೇದಿಕೆಯ ಮೇಲೆ ಇರುವಷ್ಟು ಹೊತ್ತು ಭಾವುಕರಾಗುತ್ತಲೇ.. ಕಣ್ಣೊರೆಸಿಕೊಂಡೇ ಕುಳಿತಿದ್ದರು.
ಡಿಕೆಶಿ ಸಿಎಂ ಆಸೆಗೆ ಐಶ್ವರ್ಯ ಮಹದೇವು ಚಪ್ಪಾಳೆ
ವಿಶೇಷವೆಂದರೆ ಇದೇ ವೇದಿಕೆಯಲ್ಲಿ ರವಿಶಂಕರ್ ಅವರ ಹೆಸರು ಘೋಷಿಸಿದ ಡಿಕೆ ಶಿವಕುಮಾರ್, ವೇದಿಕೆಯಲ್ಲಿಯೇ ಬೆಂಕಿ ಮಹದೇವು ಅವರನ್ನು ನೆನಪಿಸಿಕೊಂಡರು. ಐಶ್ವರ್ಯ ಮಹದೇವು ಅವರಿಗೆ ಸೂಕ್ತ ಸ್ಥಾನಮಾನ ನೀಡುವ ಭರವಸೆ ಅವರ ಮಾತುಗಳಲ್ಲಿಯೇ ಇತ್ತು. ಐಶ್ವರ್ಯ, ತಾನು ಯಾವ ತೀರ್ಮಾನ ತೆಗೆದುಕೊಂಡರೂ ಸರಿ. ಪಕ್ಷ ಮುಖ್ಯ ಎಂದಿದ್ದಾರೆ ಎಂದರು. ಆಗಲೂ ಐಶ್ವರ್ಯ ಮಹದೇವು ಕಣ್ಣೊರೆಸಿಕೊಳ್ಳುತ್ತಲೇ ಇದ್ದರು. ಆದರೆ ಯಾವಾಗ ಡಿಕೆ ಶಿವಕುಮಾರ್ ವಿಧಾನನೌಧದ 3ನೇ ಮಹಡಿಯಲ್ಲಿ ಕೂರುವಂಎ ನನ್ನನ್ನು ಗೆಲ್ಲಿಸಿ ಎಂದರೋ.. ಆಗ ನೋವಿನಲ್ಲೂ ನಗುತ್ತಲೇ ಚಪ್ಪಾಳೆ ತಟ್ಟಿದರು ಐಶ್ವರ್ಯ ಮಹದೇವು. ವಿಧಾನಸೌಧದ ಮೂರನೇ ಮಹಡಿಯಲ್ಲಿರುವುದು ಸಿಎಂ ಕಚೇರಿ. ಸಿಎಂ ಆಗುವ ಆಸೆ ವ್ಯಕ್ತಪಡಿಸಿದ್ದು ಹೀಗೆ.
