ಫೆಬ್ರವರಿ 4 ಮತ್ತು ಫೆಬ್ರವರಿ 12. ಸ್ವತಃ ಕುಮಾರಸ್ವಾಮಿಯವರೇ ಘೋಷಿಸಿದ್ದ ಎರಡೂ ಡೆಡ್ಲೈನ್ ಮುಕ್ತಾಯವಾಗಿದ್ದು, ಎರಡೂ ಡೆಡ್`ಲೈನ್ನ್ನು ಕುಮಾರಸ್ವಾಮಿ ಮರೆತು ಹೋಗಿರುವಂತೆ ಕಾಣುತ್ತಿದೆ. ಹಾಸನದ ಟಿಕೆಟ್ ರಣರಂಗವಾಗತೊಡಗಿದೆ.
ಮೊದಲನೆಯದಾಗಿ ಅದು ಶುರುವಾಗಿದ್ದು ರಾಮನಗರದಿಂದ ಎಂದರೆ ಅಚ್ಚರಿಯೇನಲ್ಲ. ದಿಢೀರನೆ ಅನಿತಾ ಕುಮಾರಸ್ವಾಮಿ ರಾಮನಗರ ಕ್ಷೇತ್ರದಲ್ಲಿ ತಾವು ನಿಲ್ಲುವುದಿಲ್ಲ. ಮಗ ನಿಖಿಲ್ ಅವರಿಗೆ ಬಿಟ್ಟು ಕೊಡುತ್ತಿದ್ದೇನೆ ಎಂದು ಘೋಷಣೆಯಾಯಿತೋ.. ಆಗಿನಿಂದಲೇ ಹಾಸನ ರಣರಂಗವಾಗುವುದಕ್ಕೆ ಶುರುವಾಯಿತು ಎಂದು ಮಾತನಾಡುತ್ತಾರೆ ಹಾಸನದ ಹೆಸರು ಹೇಳಲಿಚ್ಚಿಸದ ಜೆಡಿಎಸ್ ಕಾರ್ಯಕರ್ತರು. ಅದಾದ ಮೇಲೆ ಭವಾನಿ ರೇವಣ್ಣ ಹಾಸನಕ್ಕೆ ನಾನೇ ಕ್ಯಾಂಡಿಡೇಟ್ ಎಂದ ಕೂಡಲೇ ನೋನೋ ಎಂದು ತಲೆ ಅಲ್ಲಾಡಿಸಿದರು ಕುಮಾರಸ್ವಾಮಿ. ಜೆಡಿಎಸ್ ರಾಜ್ಯಾಧ್ಯಕ್ಷರು ಮಾತನಾಡುವ ಮೊದಲೇ ಸ್ವರೂಪ್ ಪರ ಬ್ಯಾಟಿಂಗ್ ಮಾಡಿದರು. ಅತ್ತಿಗೆಯನ್ನು ಗೊಂದಲಕ್ಕೆ ದೂಡಿದರು. ಅದಾದ ಮೇಲೆ ಪ್ರಜ್ವಲ್ ರೇವಣ್ಣ, ಸೂರಜ್ ರೇವಣ್ಣ ಬಹಿರಂಗವಾಗಿ ತಿರುಗಿಬಿದ್ದರೆ, ಭವಾನಿ ರೇವಣ್ಣ ಮೌನಕ್ಕೆ ಶರಣಾದರು. ಕೊನೆಗೆ ಚಿಕ್ಕಪ್ಪ-ಮಕ್ಕಳ ಮಾತಿನ ಸಮರ ಶಮನ ಮಾಡಿದ್ದು ದೊಡ್ಡಪ್ಪ ಹೆಚ್.ಡಿ.ರೇವಣ್ಣ. ಈ ವೇಳೆ ಹಾಸನದಲ್ಲಿ ಟಿಕೆಟ್ ಘೋಷಣೆ ಮತ್ತೊಂದು ತಿರುವು ಪಡೆಯಿತು.
ಅರಕಲಗೂಡು ಕ್ಷೇತ್ರಕ್ಕೆ ದಿಢೀರ್ ಎಂದು ಎ.ಮಂಜು ಅವರ ಹೆಸರನ್ನು ಘೋಷಣೆ ಮಾಡಿದ ಕುಮಾರಸ್ವಾಮಿ, ಎ.ಟಿ.ರಾಮಸ್ವಾಮಿಯವರಿಗೆ ಟಿಕೆಟ್ ಇಲ್ಲ ಎಂದು ಘೋಷಿಸಿಯೇಬಿಟ್ಟರು. ರಾಮಸ್ವಾಮಿ ಜೆಡಿಎಸ್ನಲ್ಲಿಯೇ ಇದ್ದರೂ, ಪಕ್ಷದ ಜೊತೆ ಒಂದು ಅಂತರ ಕಾಯ್ದುಕೊಂಡಿದ್ದವರು. ಕಾಂಗ್ರೆಸ್ ಟಿಕೆಟ್ ಕೊಡುತ್ತದೆ ಎಂದು ಕಾಯುತ್ತಿದ್ದವರು. ಜೆಡಿಎಸ್ ಘೋಷಣೆ ಮಾಡುವ ಹೊತ್ತಿಗೆ ಕಾಂಗ್ರೆಸ್ ಕೂಡಾ ಟಿಕೆಟ್ ಇಲ್ಲ ಎಂದಾಗಿತ್ತು. ಅತ್ತ ರಾಮಸ್ವಾಮಿ ಕನಲಿದರೂ, ಕುಮಾರಸ್ವಾಮಿ ಎ.ಮಂಜು ಜೊತೆ ಒಂದು ಹೆಜ್ಜೆ ಮುಂದಿಟ್ಟಾಗಿತ್ತು. 
ಆದರೆ, ಹಾಸನದಲ್ಲಿ ಎ.ಮಂಜು ಕುಮಾರಸ್ವಾಮಿಯವರಿಗಿಂತ ಹೆಚ್ಚು ಟಾರ್ಗೆಟ್ ಮಾಡಿದ್ದುದ್ದು ರೇವಣ್ಣ ಅವರನ್ನೇ. ಈಗ ಘೋಷಣೆ ಮಾಡಿಯಾಗಿದೆ. ರೇವಣ್ಣ ಮತ್ತು ಪ್ರಜ್ವಲ್, ಸೂರಜ್ ಏನೇ ಮಾಡಿದರೂ ಮಂಜು ಪರ ಕೆಲಸ ಮಾಡಬೇಕು. ಅಷ್ಟೇ ಅಲ್ಲ, ಅತ್ತ ಅರಸೀಕೆರೆಯಲ್ಲೂ ಅದೇ ಪರಿಸ್ಥಿತಿ. ಶಿವಲಿಂಗೇಗೌಡರು ಕಾಲು ಹೊರಗಿಟ್ಟಾಗಿದೆ. ಹೊಸ ಅಭ್ಯರ್ಥಿಗಾಗಿ ಹುಡುಕಾಟ ನಡೆಯುತ್ತಿದೆ. ಪ್ರಜ್ವಲ್ ಅವರನ್ನೇ ನಿಲ್ಲಿಸಿದರೆ ಹೇಗೆ ಅನ್ನೊ ಪ್ರಶ್ನೆ ಬಿಟ್ಟಾಗಿದೆ. ಇದೆಲ್ಲದರ ಮಧ್ಯೆ ಇನ್ನೂ ಒಂದು ಡೆಡ್ ಲೈನ್ ಮುಗಿದಿದೆ.
ಫೆಬ್ರವರಿ 4ರಂದು ಏನಾಯ್ತು?
ಮೊದಲನೆಯಾಗಿ ಕುಮಾರಸ್ವಾಮಿ ಘೋಷಿಸಿದ್ದ ದಿನಾಂಕ ಫೆಬ್ರವರಿ 4. ಆ ದಿನ ಮನೆಯಲ್ಲಿ ಒಂದು ಸಭೆ ನಡೆಸಿ ತೀರ್ಮಾನ ಮಾಡುತ್ತೇವೆ ಎಂದು ಸ್ವತಃ ಕುಮಾರಸ್ವಾಮಿ ಘೋಷಿಸಿದರು. ಅದರ ಬೆನ್ನಲ್ಲೇ ಕಾರ್ಯಕರ್ತರಲ್ಲಿ ಉತ್ಸಾಹ ಗರಿಗೆದರಿತು. ಖುದ್ದು ದೇವೇಗೌಡರೇ ಫೈನಲ್ ಮಾಡ್ತಾರೆ ಎಂಬ ಮಾತು ಕೇಳಿಬಂತು. ಆದರೆ ಮೂಲಗಳ ಪ್ರಕಾರ ರೇವಣ್ಣ ಅವರ ಇಡೀ ಕುಟುಂಬ ಕುಮಾರಸ್ವಾಮಿಯವರ ಮನೆಗೆ ಹೋಗಿದ್ದು ನಿಜ.
ಪ್ರಜ್ವಲ್ ಮತ್ತು ಸೂರಜ್ ಚಿಕ್ಕಪ್ಪನ ಬಳಿ ಸಾರಿ ಕೇಳಿದ್ದೂ ನಿಜ. ಕುಮಾರಸ್ವಾಮಿ ಕ್ಷಮೆ ಸ್ವೀಕರಿಸಿದರಾದರೂ, ಭವಾನಿಗೆ ಟಿಕೆಟ್ ಕೊಟ್ಟರೆ ಎದುರಾಳಿಗಳಿಗೆ ಅಸ್ತ್ರ ಕೊಟ್ಟಂತಾಗುತ್ತದೆ. ನಾನೀಗಾಗಲೇ ಸ್ವರೂಪ್ ಹೆಸರನ್ನು ಹೇಳಿಬಿಟ್ಟಿದ್ದೇನೆ. ನನ್ನನ್ನು ಸಂದಿಗ್ದಕ್ಕೆ ಸಿಲುಕಿಸಬೇಡಿ ಎಂದರಂತೆ. ಕೊನೆಗೆ ರೇವಣ್ಣ ಹಾಸನಕ್ಕೆ ನಾನೇ ನಿಲ್ಲುತ್ತೇನೆ ಎಂದಾಗಲೂ ಕುಮಾರಸ್ವಾಮಿ ಪ್ರತಿಕ್ರಿಯೆ ಸಕಾರಾತ್ಮಕವಾಗಿರಲಿಲ್ಲ.
ಫೆಬ್ರವರಿ 12ರ ಡೆಡ್`ಲೈನ್ ಏನಾಯ್ತು?
ಫೆಬ್ರವರಿ 4ರ ಡೆಡ್`ಲೈನ್ ಮುಗಿದರೂ ಫೆಬ್ರವರಿ 12ರ ನಿರೀಕ್ಷೆ ಬೇರೆಯೇ ಇತ್ತು. ಫೆಬ್ರವರಿ 12ಕ್ಕೆ ಪಂಚರತ್ನ ಯಾತ್ರೆ ಹಾಸನಕ್ಕೆ ಎಂಟ್ರಿಯಾಗುತ್ತಿತ್ತು. ಆಗ ನಿರ್ಧಾರ ಮಾಡುತ್ತೇವೆ ಎಂದು ಸ್ವತಃ ಪ್ರಜ್ವಲ್. ಸೂರಜ್, ರೇವಣ್ಣ ಅಷ್ಟೇ ಯಾಕೆ ಕುಮಾರಸ್ವಾಮಿಯವರೂ ಹೇಳಿದ್ದರು. ಆದರೆ ಇದ್ದಕ್ಕಿದ್ದಂತೆ ಇಡೀ ದಿನ ಮಾತನ್ನೇ ಆಡದೆ ಮೌನಕ್ಕೆ ಶರಣಾದರು. ಅಲ್ಲಿಗೆ ಫೆಬ್ರವರಿ 12ರ ಡೆಡ್ಲೈನ್ ಕೂಡಾ ಸೈಡಿಗೆ ಹೋಯ್ತು.
ಈಗ ಹಾಸನ ಜೆಡಿಎಸ್ ಕಾರ್ಯಕರ್ತರನ್ನು ಕಾಡುತ್ತಿರುವ ಕಟ್ಟ ಕಡೆಯ ಪ್ರಶ್ನೆ, ಇನ್ನೂ ಎಷ್ಟು ಡೆಡ್`ಲೈನ್ ಕೊಡ್ತಾರೆ ಅನ್ನೋದು ಮಾತ್ರ. ಆದರೆ ಕುಮಾರಸ್ವಾಮಿಯವರಿಗೆ ಶತಾಯಗತಾಯ ಭವಾನಿ ರೇವಣ್ಣ ಅವರಿಗೆ ಟಿಕೆಟ್ ಕೊಡುವುದಕ್ಕೆ ಮನಸ್ಸಿಲ್ಲ. ಅಲ್ಲದೆ ಈಗಾಗಲೇ ಹಾಸನ ಲೋಕಸಭೆಗೆ ಪ್ರಜ್ವಲ್, ಹಾಸನ ವಿಧಾನಪರಿಷತ್`ಗೆ ಸೂರಜ್, ಹೊಳೆನರಸೀಪುರಕ್ಕೆ ರೇವಣ್ಣ, ಹಾಸನ ಜಿಲ್ಲಾಪಂಚಾಯ್ತಿಗೆ ಭವಾನಿ ರೇವಣ್ಣ ಇದ್ದಾರೆ. ಈಗ ಭವಾನಿಯವರಿಗೆ ಜಿ.ಪಂ.ನಿಂದ, ವಿಧಾನಸೌಧಕ್ಕೆ ಪ್ರಮೋಷನ್ ಕೊಟ್ಟರೆ ಒಂದಿಡೀ ಜಿಲ್ಲೆ ತಮ್ಮ ಹಿಡಿತದಿಂದ ಕೈತಪ್ಪಿ ಹೋಗಲಿದೆ ಎಂಬ ಆತಂಕವಿದೆ ಎನ್ನಲಾಗಿದೆ. ದೇವೇಗೌಡರ ಫ್ಯಾಮಿಲಿ ಪಾಲಿಟಿಕ್ಸ್, ಈಗ ಅವರ ಫ್ಯಾಮಿಲಿಯನ್ನೇ ಸುಡುತ್ತಿದೆ ಎಂದರೆ ತಪ್ಪಲ್ಲ.
