ಮೈಸೂರಿನಲ್ಲಿ ನಡೆದ ಪಂಚರತ್ನ ಯಾತ್ರೆ ಸಮಾರೋಪ ಸಮಾರಂಭದಲ್ಲಿ ಎಚ್.ಡಿ.ದೇವೇಗೌಡ ಭಾಗಿ

ದೇವೇಗೌಡರಿಂದ ಜೆಡಿಎಸ್`ನವರು ಕಲಿಯಬೇಕಾದ ಪಾಠವೇನು..?
ರಾಜಕೀಯ ತಂತ್ರಗಾರಿಕೆಯಾ.. ಅದು ಸಾಧ್ಯವಿಲ್ಲ. ಏಕೆಂದರೆ ಅದು ಒಂದೆರಡು ದಿನ..ವರ್ಷಗಳಲ್ಲಿ ಬಂದಿದ್ದಲ್ಲ. ಕುಮಾರಸ್ವಾಮಿ ನಿಜಕ್ಕೂ ದೇವೇಗೌಡರಿಂದ ಕಲಿಯಲೇಬೇಕಾದ ಪಾಠವೇನಾದರೂ ಒಂದಿದ್ದರೆ.. ದೇವೇಗೌಡರ ಫೈಟರ್ ಸ್ಪಿರಿಟ್. ಅವರ ಹೋರಾಟದ ತಾಕತ್ತಿಗೆ ಬೆರಗಾಗಿದ್ದರೆ ಹೇಗೆ..? ಪಂಚರತ್ನ ಯಾತ್ರೆಯ ಸಮಾರೋಪದಲ್ಲಿ ದೇವೇಗೌಡರಿದ್ದರು. 90 ದಿನಗಳ ಪಂಚರತ್ನ ಯಾತ್ರೆಗೆ ತೆರೆ ಬಿದ್ದಿದ್ದು ಮೈಸೂರಿನಲ್ಲಿ.
ಪಂಚರತ್ನ ಯಾತ್ರೆ ಸಮಾರೋಪ ಕಾರ್ಯಕ್ರಮದಲ್ಲಿ ದೇವೇಗೌಡರನ್ನು ಸುಮಾರು 50 ಮೀ.ವರೆಗೆ ವಿಶೇಷವಾಗಿ ಸಿದ್ಧಪಡಿಸಿದ್ದ ಟ್ರ್ಯಾಲಿಯ ನೆರವಿನಿಂದ ಜನರ ಮಧ್ಯೆ ಕರೆದೊಯ್ಯುವ ವ್ಯವಸ್ಥೆ ಮಾಡಿದ್ದು ವಿಶೇಷ. ದೇವೇಗೌಡರನ್ನು ಕಾಣುತ್ತಲೇ ಕಾರ್ಯಕರ್ತರ ಹರ್ಷೋದ್ಗಾರ ಇಮ್ಮಡಿಯಾಯಿತು. ವೇದಿಕೆಗೆ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರನ್ನು ಅಂಗರಕ್ಷಕರು ಮತ್ತು ಕಾರ್ಯಕರ್ತರು ವ್ಹೀಲ್ ಚೇರ್ನಲ್ಲಿ ಕರೆತರುತ್ತಲೇ ನೆರೆದಿದ್ದ ಲಕ್ಷಾಂತರ ಮಂದಿ ಕಾರ್ಯಕರ್ತರು ಚಪ್ಪಾಳೆ, ತಟ್ಟಿ, ಶಿಳ್ಳೆ ಹೊಡೆದು ಸ್ವಾಗತಿಸಿದರು. ದೇವೇಗೌಡರಿಗೆ ದಕ್ಷಿಣಪಥೇಶ್ವರ ಇಮ್ಮಡಿ ಪುಲಕೇಶಿಯ ಕಿರೀಟ ಮಾದರಿ ತೊಡಿಸಿ, ಚಿನ್ನದ ನೇಗಿಲನ್ನು ಸಮರ್ಪಿಸಿದರು.

ದೇವೇಗೌಡರಿಗೆ ಅನಾರೋಗ್ಯ ಕಾರಣ ಮೊದಲು ಮಾತನಾಡಲು ಅವಕಾಶ ನೀಡಲಾಯಿತು. ಬಳಿಕ ವಿಶೇಷವಾದ ಟ್ರ್ಯಾಲಿಯಲ್ಲಿ ಕೂರಿಸಿ, ಜನರ ಮಧ್ಯದವರೆಗೂ ಕರೆದೊಯ್ಯಲಾಯಿತು. ಈ ವೇಳೆ ಮಾಜಿ ಸಿಎಂ ಕುಮಾರಸ್ವಾಮಿ ಅವರು ‘ವೈದ್ಯರು ಅನುಮತಿ ನೀಡಿದ್ದಾರೆ ಬನ್ನಿ ಅಣ್ಣ, ಇಷ್ಟುವರ್ಷ ಇವರೇ ನಿಮ್ಮನ್ನು ಕೈ ಹಿಡಿದು ಬೆಳೆಸಿದ್ದು, ಅವರಿಗೆ ಕೃತಜ್ಞತೆ ಅರ್ಪಿಸಲು ಇದೊಂದು ಸುಸಂದರ್ಭ. ಬನ್ನಿ ಧೈರ್ಯವಾಗಿ ಬನ್ನಿ, ನಿಮ್ಮೊಡನೆ ಹೆಚ್ಚು ಜನರು ಬರುವುದಿಲ್ಲ. ನಾವು ಇರುತ್ತೇವೆ’ ಎಂಬ ಭಾವನಾತ್ಮಕ ಮಾತುಗಳನ್ನಾಡಿ ಗಾಲಿ ಕುರ್ಚಿಯಲ್ಲಿ ಕೂರಿಸಿದರು. ಈ ವೇಳೆ ದೇವೇಗೌಡರ ಪಕ್ಕದಲ್ಲಿ ಎಚ್.ಡಿ. ಕುಮಾರಸ್ವಾಮಿ, ಹಿಂದೆ ಪ್ರಜ್ವಲ್ ರೇವಣ್ಣ, ಸೂರಜ್ ರೇವಣ್ಣ, ನಿಖಿಲ್ ಕುಮಾರಸ್ವಾಮಿ ಮತ್ತು ಅವರ ಹಿಂದೆ ಎಚ್.ಡಿ.ರೇವಣ್ಣ ಮಾತ್ರ ಇದ್ದರು.

ಸೋಷಿಯಲ್ ಮೀಡಿಯಾದಲ್ಲಿ ಚಿನ್ನಮ್ಮನವರು ಪತಿಯ ಕಾಲಿಗೆ ನಮಸ್ಕರಿಸಿ ಬೀಳ್ಕೊಟ್ಟಿದ್ದು ದೊಡ್ಡ ಚರ್ಚೆಯಾದರೆ, ವೇದಿಕೆಯಲ್ಲಿ ಉತ್ಸಾಹ ಹೆಚ್ಚಿಸಿದ್ದು ದೇವೇಗೌಡರ ಮಾತು. ವಯಸ್ಸು 90 ದಾಟಿದೆ. ದೇಹ ಸಹಕರಿಸುತ್ತಿಲ್ಲ. ಪದೇ ಪದೇ ಅನಾರೋಗ್ಯಕ್ಕೊಳಗಾಗುತ್ತಿದ್ದಾರೆ. ಸ್ವಲ್ಪ ಚೇತರಿಕೆ ಕಂಡ ತಕ್ಷಣ ಜನರ ಮಧ್ಯೆ ಬರೋದು ಇದೆಯಲ್ಲ.. ಅದು ದೇವೇಗೌಡರ ಫೈಟರ್ ಸ್ಪಿರಿಟ್.

ಕುಮಾರಸ್ವಾಮಿ ಕಲಿಯಬೇಕಿರುವ ಹಾಗೂ ತಮ್ಮ ರಾಜಕೀಯ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕಿರುವ ಕಿಚ್ಚು ಅದೇ. ಹೋರಾಟದ ತಾಕತ್ತು. ಎಲೆಕ್ಷನ್ ಹತ್ತಿರ ಬಂದಾಗ ಜನರ ಹಾಗೂ ಕಾರ್ಯಕರ್ತರ ನಡುವೆ ಕಾಲ ಕಳೆಯುತ್ತಾರೆ ಎಂಬುದೇನೋ ನಿಜ. ಎಲೆಕ್ಷನ್ ಮುಗಿಯುತ್ತಿದ್ದಂತೆ ಕುಮಾರಸ್ವಾಮಿ ರಾಮನಗರ-ಮಂಡ್ಯ-ಬೆಂಗಳೂರು ಬಿಟ್ಟು ಹೊರಗೆ ಹೋಗುವುದಿಲ್ಲ. ವಿಶ್ರಾಂತಿಗೆ ಜಾರಿ ಬಿಡುತ್ತಾರೆ. ನನ್ನನ್ನು ನೋಡಲು ಜನ ಬರುತ್ತಾರೆ. ಲಕ್ಷ ಸಂಖ್ಯೆಯಲ್ಲಿ ಬರುವ ಜನ ಮತ ಮಾತ್ರ ಹಾಕುವುದಿಲ್ಲ ಎಂದು ಎಲ್ಲೆಡೆ ಅಲವತ್ತುಕೊಳ್ಳುವ ಕುಮಾರಸ್ವಾಮಿ, ತಮಗೆ ಇರುವ ಜನಪ್ರಿಯತೆಯನ್ನು ಅರ್ಥ ಮಾಡಿಕೊಂಡಿಲ್ಲ. ಬದಲಿಗೆ ಎಂಜಾಯ್ ಮಾಡುತ್ತಿದ್ದಾರೆ, ಅಷ್ಟೆ. ಜನಪ್ರಿಯತೆಗೆ ಸ್ವಲ್ಪ ಶ್ರಮ ಹಾಕಿದರೆ ಸಾಕು, ಕುಮಾರಸ್ವಾಮಿಗೆ ಸಿಗುವ ಪ್ರತಿಫಲವೇ ಬೇರೆ.