ಉತ್ತರಪ್ರದೇಶದ ಪ್ರಯಾಗ್ ರಾಜ್ನಲ್ಲಿ ಮೂವರು ಹುಡುಗರಿಂದ ಹತ್ಯೆಯಾದ ಪಾತಕಿ ಅತಿಕ್ ಅಹ್ಮದ್ ಸಾಮಾನ್ಯನಲ್ಲ. 5 ಸಲದ ಶಾಸಕ ಹಾಗೂ 1 ಸಲದ ಸಮಾಜವಾದಿ ಪಾರ್ಟಿ ಸಂಸದ ಕೂಡ. 2004ರಲ್ಲಿ ಸಮಾಜವಾದಿ ಪಾರ್ಟಿ ಸಂಸದನಾಗಿ ಈತ ಆಯ್ಕೆಯಾಗಿದ್ದ. ಆಗ ನಡೆದ ಉಪಚುನಾವಣೆಯಲ್ಲಿ ಈತನ ತಮ್ಮ ಸೋತಿದ್ದರಿಂದಲೇ ಈಗ ದೇಶಾದ್ಯಂತ ಸುದ್ದಿಯಾಗಿದ್ದ ರಾಜ್ ಪಾಲ್ ಕೊಲೆ. ಆ ಕೊಲೆಯನ್ನು ಕಣ್ಣಾರೆ ಕಂಡಿದ್ದ ಉಮೇಶ್ ಪಾಲ್ನನ್ನು ಕೊಂದ ಪರಿಣಾಮವೇ ಉತ್ತರ ಪ್ರದೇಶದ ಸಿಎಂ ಯೋಗಿ ಆದಿತ್ಯನಾಥ್ ಶಪಥ ಮಾಡಿ, ಮಾಫಿಯಾ ದೊರೆಗಳನ್ನು ಮಟ್ಟ ಹಾಕಿದ್ದು. ಇಂತಹ ಅತೀಕ್ ಅಹ್ಮದ್, 2008ರಲ್ಲಿ ಮನಮೋಹನ್ ಸಿಂಗ್ ಸರ್ಕಾರವನ್ನು ರಕ್ಷಿಸಿದ್ದ.
2008ರಲ್ಲಿ ಅಮೆರಿಕ ಜತೆಗಿನ ಅಣು ಒಪ್ಪಂದದ ಕಾರಣ ಯುಪಿಎ ಸರ್ಕಾರದ ವಿರುದ್ಧ ವಿಪಕ್ಷಗಳು ಅವಿಶ್ವಾಸ ನಿರ್ಣಯ ಮಂಡಿಸಿದ್ದವು. ಆಗ 6 ಸಮಾಜವಾದಿ ಪಾರ್ಟಿ ಸಂಸದರ ಮತಗಳ ಮೂಲಕ ಯುಪಿಎಗೆ ಜೀವದಾನ ಸಿಕ್ಕಿತು. ಹೀಗಾಗಿ ಮನಮೋಹನ್ ಸರ್ಕಾರಕ್ಕೆ ಜೀವದಾನ ನೀಡಿದ 6 ಎಸ್ಪಿ ಸಂಸದರಲ್ಲಿ ಅತೀಕ್ ಕೂಡ ಒಬ್ಬ. ಹೀಗಾಗಿ, ಭಾರತ ರಾಜಕೀಯದ ಬಾಹುಬಲಿಗಳು, ‘ಬುಲೆಟ್ನಿಂದ ಬ್ಯಾಲೆಟ್’ ಪುಸ್ತಕದಲ್ಲಿ ಅತೀಕ್ ಉಲ್ಲೇಖವಿದೆ.
ಚಿಕ್ಕಂದಿನಲ್ಲಿ ಬಡತನದ ಕಾರಣ ಈತ ರೈಲುಗಳಲ್ಲಿ ಸಾಗಿಸುವ ಕಲ್ಲಿದ್ದಲು ಕದ್ದು ದುಡ್ಡು ಮಾಡಿಕೊಳ್ಳಲು ಆರಂಭಿಸಿದ್ದ. ನಂತರ ರೈಲ್ವೆ ಅಧಿಕಾರಿಗಳನ್ನು ಬೆದರಿಸಿ ಗುತ್ತಿಗೆ ಪಡೆಯಲು ಆರಂಭಿಸದ. ಕ್ರಮೇಣ ಪಾತಕ ಲೋಕಕ್ಕೆ ಇಳಿದ ಈತ ಅಲ್ಲಿ ಕೊಲೆ, ಸುಲಿಗೆ, ದರೋಡೆಗಳ ಮೂಲ ಬಾಹುಬಲಿ ಹಾಗೂ ಉತ್ತರ ಪ್ರದೇಶದ ನಂ.1 ಡಾನ್ ಎಂದು ಖ್ಯಾತಿ ಪಡೆದ. 100ಕ್ಕೂ ಹೆಚ್ಚು ಕ್ರಿಮಿನಲ್ ಕೇಸುಗಳು ಈತನ ಮೇಲಿವೆ.
ಈತನಿಂದ ಕೊಲೆಯಾದವರ ಸಂಖ್ಯೆ ನೂರು ಇನ್ನೂರಲ್ಲ.. 800ಕ್ಕೂ ಹೆಚ್ಚು. ಆದರೆ ಎಷ್ಟೋ ಪ್ರಕರಣದಲ್ಲಿ ಇವರ ವಿರುದ್ಧ ದೂರುಗಳಿವೆ. ಆದರೆ ಕೊಲೆಯಾದನೋ.. ಸಹಜವಾಗಿಯೇ ಸತ್ತನೋ.. ಹೆಣ ಸಿಕ್ಕರೆ ತಾನೇ.. ಗಂಡ, ಮಕ್ಕಳ ಹೆಣವೂ ಸಿಗದೆ ಅತೀಕ್ ವಿರುದ್ಧ ಹೋರಾಡುತ್ತಿರುವವರು ಅದೆಷ್ಟೋ ಜನರಿದ್ದಾರೆ. ಅಂದಹಾಗೆ ಈಗ ಸತ್ತ ಅತೀಕ್, ಅರ್ಷದ್ ಸೇರಿದಂತೆ ಇದುವರೆಗೆ ಉಮೇಶ್ ಪಾಲ್ ಹತ್ಯೆ ಕೇಸಿನಲ್ಲಿ ಸತ್ತವರ ಸಂಖ್ಯೆ 6. ಉತ್ತರ ಪ್ರದೇಶದಲ್ಲಿ ವಕೀಲ ಉಮೇಶ್ ಪಾಲ್ ಹಾಗೂ ಇಬ್ಬರು ಪೊಲೀಸರ ಹತ್ಯೆಯಾದ ಬಳಿಕ, ಅದೇ ಪ್ರಕರಣ ಸಂಬಂಧ ಒಟ್ಟು 6 ಆರೋಪಿಗಳು ನಾನಾ ಕಾರಣಗಳಿಂದ ಸಾವನ್ನಪ್ಪಿದ್ದಾರೆ. ಬಿಎಸ್ಪಿ ಶಾಸಕ ರಾಜು ಪಾಲ್ ಹತ್ಯೆ ಕೇಸಿನ ಪ್ರಮುಖ ಸಾಕ್ಷಿಯಾಗಿದ್ದ ಉಮೇಶ್ ಪಾಲ್ ಹಾಗೂ ಆತನ ರಕ್ಷಣೆಗೆ ನಿಯೋಜಿಸಲಾಗಿದ್ದ ಇಬ್ಬರು ಪೊಲೀಸ್ ಸಿಬ್ಬಂದಿಗಳನ್ನು ಕಳೆದ ಫೆ.24 ರಂದು ಗುಂಡಿಕ್ಕಿ ಹತ್ಯೆ ಮಾಡಲಾಗಿತ್ತು. ಈ ಹಂತಕರ ಕಾರು ಚಾಲಕ ಅರ್ಬಾಜ್ನನ್ನು ಫೆ.27 ರಂದು, ಪ್ರಯಾಗ್ರಾಜ್ನಲ್ಲಿ ಉಸ್ಮಾನ್ ಎಂಬಾತನನ್ನು ಮಾ.6 ರಂದು, ಅತೀಕ್ ಮಗ ಅಸದ್ ಮತ್ತು ಸಹಚರ ಗುಲಾಮ್ನನ್ನು ಝಾನ್ಸಿಯಲ್ಲಿ ಏ.13 ರಂದು ಎನ್ಕೌಂಟರ್ ಮಾಡಲಾಗಿತ್ತು. ಏ.15 ರಂದು ಅತೀಕ್ ಹಾಗೂ ಸಹೋದರ ಅಶ್ರಫ್ರನ್ನು ಮೂವರು ಯುವಕರು ಗುಂಡಿಕ್ಕಿ ಹತ್ಯೆ ಮಾಡಿದರು.
ಹಂತಕರನ್ನು ಬಂದಾ ಪಟ್ಟಣದ ಲವಲೇಶ ತಿವಾರಿ (22), ಹಮೀರ್ಪುರದ ಮೋಹಿತ್ ಅಲಿಯಾಸ್ ಸನ್ನಿ (23) ಹಾಗೂ ಕಾಸ್ಗಂಜ್ನ ರಾಜೇಶಕುಮಾರ್ ಮೌರ್ಯ (18) ಎಂದು ಗುರುತಿಸಲಾಗಿದೆ. ಇದರಲ್ಲಿ ಒಬ್ಬ ಹಿಸ್ಟರಿ ಶೀಟರ್, ಮತ್ತೊಬ್ಬ ಬಜರಂಗದಳದ ನಾಯಕ ಕಂ ಡ್ರಗ್ ವ್ಯಸನಿ. ಇನ್ನೊಬ್ಬ ಅನಾಥ.
ಅತೀಕ್ ಅಹ್ಮದ್ನನ್ನು ಕೊಂದರೆ ಭೂಗತ ಲೋಕದಲ್ಲಿ ಭರ್ಜರಿಯಾಗಿ ಎಂಟ್ರಿ ಕೊಡಬಹುದು ಎಂಬ ಕಾರಣಕ್ಕೇ ಕೊಂದೆವು ಎಂದು ಆರೋಪಿ ಮೋಹಿತ್ ಸನ್ನಿ ಹೇಳಿಕೆ ನೀಡಿದ್ದಾನೆ. ಮೀಡಿಯಾಗಳ ಮುಂದೆಯೇ ಕೊಂದರೆ ಹೆಚ್ಚು ಪ್ರಚಾರ ಸಿಗುತ್ತದೆ ಎಂಬ ಕಾರಣಕ್ಕೆ ಈ ರೀತಿ ಹತ್ಯೆ ಮಾಡಿದೆವು ಎಂದು ತಿಳಿಸಿದ್ದಾನಂತೆ.
