ಹೀರಾ ಬೆನ್. ಜಗತ್ತಿನ ಅತ್ಯಂತ ಪ್ರಬಲ ನಾಯಕನ ತಾಯಿಯಾಗಿದ್ದವರು. ನೂರನೇ ವರ್ಷಕ್ಕೆ ಕಾಲಿಟ್ಟ ವರ್ಷದಲ್ಲೇ ಇಹಲೋಕದ ಪಯಣ ಮುಗಿಸಿದ್ದಾರೆ. ಗುಜರಾತಿನ ಅಹಮದಾಬಾದಿನ ಆಸ್ಪತ್ರೆಯಲ್ಲಿ ದಾಖಲಾಗಿದ್ದ ಹೀರಾಬೆನ್, ಮುಂಜಾನೆ 3.30ರ ಸುಮಾರಿಗೆ ವಿಧಿವಶರಾಗಿದ್ದಾರೆ. ತಮ್ಮ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಪ್ರಧಾನಿ ಮೋದಿ ಸರಣಿ ಟ್ವೀಟ್ ಮಾಡಿ, ತಮ್ಮ ತಾಯಿಯ ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ. “ಭವ್ಯವಾದ ಶತಮಾನವು ದೇವರ ಪಾದದ ಮೇಲೆ ನಿಂತಿದೆ.. ತಾಯಿಯಲ್ಲಿ ನಾನು ಯಾವಾಗಲೂ ಆ ತ್ರಿಮೂರ್ತಿಗಳನ್ನು ಅನುಭವಿಸಿದ್ದೇನೆ, ಅದು ತಪಸ್ವಿಯ ಪ್ರಯಾಣ, ನಿಸ್ವಾರ್ಥ ಕರ್ಮಯೋಗಿಯ ಸಂಕೇತ ಮತ್ತು ಮೌಲ್ಯಗಳಿಗೆ ಬದ್ಧವಾಗಿರುವ ಜೀವನವನ್ನು ಒಳಗೊಂಡಿದೆ ಅಂತ ಬರೆದುಕೊಂಡಿದ್ದಾರೆ.
ಜಗತ್ತಿನ ಪ್ರಭಾವಿ ನಾಯಕ ನಂ.1 ಆಗಿರುವ ಮೋದಿಯೂ ಸೇರಿದಂತೆ ಹೀರಾಬೆನ್ ಅವರಿಗೆ ಒಟ್ಟು 6 ಮಕ್ಕಳು. ಐದು ಗಂಡು, ಒಂದು ಹೆಣ್ಣು. ಸೋಮ ಮೋದಿ ಹಿರಿಯ ಮಗ. ಆರೋಗ್ಯ ಇಲಾಖೆಯ ನಿವೃತ್ತ ಅಧಿಕಾರಿ. ಎರಡನೇ ಮಗ ಪಂಕಜ್ ಮೋದಿ. ಸರ್ಕಾರಿ ಇಲಾಖೆಯಲ್ಲಿ ಕ್ಲರ್ಕ್ ಆಗಿದ್ದವರು. ನಾಲ್ಕನೇ ಮಗ ಅಮೃತ್ ಮೋದಿ. ಲೇಥ್ ಮೆಷಿನ್ ಆಪರೇಟರ್ ಆಗಿದ್ದವರು. ಐದನೇ ಮಗ ಪ್ರಹ್ಲಾದ್ ಮೋದಿ. ಶಾಪ್ ಓನರ್. ಒಬ್ಬಳೇ ಒಬ್ಬ ಮಗಳು ವಸಂತಿಬೆನ್ ಹಸ್ಮುಖ್ ಲಾಲ್. 3ನೇ ಮಗನೇ ನರೇಂದ್ರ ಮೋದಿ.ಕಿರಿಯ ವಯಸ್ಸಿಗೇ ದಾಮೋದರ್ ದಾಸ್ ಅವರೊಂದಿಗೆ ಮದುವೆಯಾಗಿದ್ದ ಹೀರಾಬೆನ್ಗೆ ಬದುಕು ಹೂವಿನ ಹಾಸಿಗೆಯಾಗಿರಲಿಲ್ಲ. ಮೋದಿಯವರೇ ಹೇಳಿಕೊಂಡಂತೆ ಹೀರಾಬೆನ್ ಇಡೀ ಕುಟುಂಬದ ಅಸ್ಥಿಭಾರತವನ್ನು ಹೆಗಲಮೇಲೆ ಹೊತ್ತಿದ್ದವರು. ವಡಾನಗರ್ನಲ್ಲಿಯೇ ಇದ್ದ ಹೀರಾಬೆನ್, ಪತಿ ಮರಣದ ನಂತರ ಕಿರಿಯ ಮಗನ ಮನೆಗೆ ಶಿಫ್ಟ್ ಆದರು.
ತಾಯಿ ಮತ್ತು ಮಗನ ನಡುವೆ ಬಾಂಧವ್ಯ ಚೆನ್ನಾಗಿತ್ತು. ಪ್ರಾಮಾಣಿಕತೆಯ ಪಾಠಗಳನ್ನು ಬೋಧಿಸುತ್ತಿದ್ದ ಹೀರಾಬೆನ್, ಮಗ ಮೊದಲ ಬಾರಿ ಗುಜರಾತ್ ಸಿಎಂ ಆದಾಗ ಹೇಳಿದ್ದದ್ದು ಒಂದೇ ಮಾತು, ಯಾವತ್ತು ಲಂಚವನ್ನು ತೆಗೆದುಕೊಳ್ಳಬೇಡ. ತಾಯಿಯ ಮಾತಿಗೆ ತಕ್ಕಂತೆ ನಡೆದುಕೊಂಡ ಮೋದಿಯ ಮೇಲೆ ಇವತ್ತಿಗೂ ಲಂಚದ ಆರೋಪಗಳೂ ಇಲ್ಲ. ತಮ್ಮ ವ್ಯಕ್ತಿತ್ವ ರೂಪಿಸಿದ್ದೇ ತಮ್ಮ ತಾಯಿ ಎಂದು ಹಲವು ಬಾರಿ ಮೋದಿ ಹೇಳಿಕೊಂಡಿದ್ದಾರೆ.
ಮಗ ಸಿಎಂ ಆದರೂ, ಹೀರಾಬೆನ್ ತಮ್ಮ ಪುಟ್ಟ ಮನೆಯಿಂದ ಬಂಗಲೆಗೆ ಹೋಗಲಿಲ್ಲ. ಮಗನೆಂದರೆ ಅಕ್ಕರೆಯಿತ್ತಾದರೂ ಮಗನ ಅಧಿಕಾರದ ವಲಯದಲ್ಲಿ ತಾನಿರಬಾರದು ಎಂದು ನಿರ್ಧರಿಸಿ ದೂರವೇ ಇದ್ದರು ಹೀರಾಬೆನ್. ಪ್ರಧಾನಿ ನಿವಾಸಕ್ಕೆ ಭೇಟಿ ಕೊಟ್ಟಿದ್ದು ಮೋದಿ ಪ್ರಧಾನಿಯಾಗಿ 2 ವರ್ಷಗಳ ನಂತರ. ಆಗ ತಮ್ಮ ವಿಶಾಲ ಭವನದಲ್ಲಿ ತಾಯಿಯನ್ನು ವೀಲ್ ಚೇರ್ನಲ್ಲಿ ಕೂರಿಸಿಕೊಂಡು ಕಾಂಪೌಂಡ್ ಸುತ್ತಿಸಿದ್ದರು ಖುದ್ದು ಪ್ರಧಾನಿ ಮೋದಿ. ನೋಟ್ ಬ್ಯಾನ್ ಮಾಡಿದಾಗ ತಾವೂ ಎಟಿಎಂನಲ್ಲಿ ಕ್ಯೂನಲ್ಲಿ ನಿಂತು ನೋಟ್ ಬ್ಯಾನ್ಗೆ ಬೆಂಬಲ ವ್ಯಕ್ತಪಡಿಸಿದ್ದರು. 2014ರಲ್ಲಿ ಮೋದಿ ಪ್ರಧಾನಿಯಾದಾಗ ಹೀರಾಬೆನ್ ಅವರಿಗೆ ಸೀರೆಯೊಂದನ್ನು ಉಡುಗೊರೆಯಾಗಿ ಕೊಟ್ಟಿದ್ದರು. ಅದಕ್ಕೆ ಪ್ರತಿಯಾಗಿ ಹೀರಾ ಬೆನ್ ಶಾಲ್ನ್ನು ಗಿಫ್ಟ್ ಆಗಿ ಕೊಟ್ಟಿದ್ದರು.
ನನ್ನ ತಾಯಿ 15-16ನೇ ವಯಸ್ಸಿನಲ್ಲಿ ಮದುವೆಯಾದರು. ಮನೆಯಲ್ಲಿ ಬಡತನವಿತ್ತು. ಹೀಗಾಗಿ ಮುಂದೆ ಓದಲು ಆಗಲಿಲ್ಲ. ಕಷ್ಟವಿದ್ದರೂ ತಮ್ಮ ಮಕ್ಕಳ ಓದನ್ನು ಮಾತ್ರ ನಿಲ್ಲಿಸಲಿಲ್ಲ. ಎಷ್ಟು ಕಷ್ಟವಿತ್ತೆಂದರೆ ಸ್ಕೂಲಿನ ಫೀಸ್ ಕಟ್ಟೋಕೂ ದುಡ್ಡಿರುತ್ತಿರಲಿಲ್ಲ. ಆದರೆ ಸಾಲ ಮಾಡುವುದೆಂದರೆ ಅಮ್ಮನಿಗೆ ವಿರೋಧವಿತ್ತು. ಹೆಚ್ಚು ಕೂಲಿ ಮಾಡಿ ದುಡ್ಡು ಹೊಂಚುತ್ತಿದ್ದರೇ ಹೊರತು ಸಾಲ ಮಾಡುತ್ತಿರಲಿಲ್ಲ. ಫೀಸ್ ಹೊಂಚುತ್ತಿದ್ದರು. ಆಗ ನನ್ನ ಬಳಿ ಇದ್ದದ್ದು ಒಂದೇ ಯೂನಿಫಾರ್ಮ್. ಆಗಾಗ ಹರಿದು ಹೋಗುತ್ತಿತ್ತು. ತಕ್ಷಣ ಅದಕ್ಕೆ ಹೊಲಿಗೆ ಹಾಕಿ, ತೇಪೆ ಹಾಕುತ್ತಿದ್ದರು. ಆದರೆ ತೇಪೆ ಹಾಕಿದ್ದು ಕಾಣದಂತೆ ಎಚ್ಚರಿಕೆ ವಹಿಸುತ್ತಿದ್ದರು ಎಂದು ಹೇಳಿಕೊಂಡಿದ್ದರು ಖುದ್ದು ನರೇಂದ್ರ ಮೋದಿ.
ನನ್ನ ಅಮ್ಮ ಹೆಚ್ಚು ಓದಿರಿಲಿಲ್ಲ, ನಿಜ. ಆದರೆ ಕೆಲವು ಆಯುರ್ವೇದ ಚಿಕಿತ್ಸೆಗಳು, ಔಷಧಿಗಳು ಗೊತ್ತಿದ್ದವು. ನಮ್ಮ ಹಳ್ಳಿಯ ಮಂದಿಗೆ ಅವಳೇ ಡಾಕ್ಟರ್. ಆಕೆಯ ನೂರು ವರ್ಷದ ಗುಟ್ಟು ಅದೇ ಎಂದು ಹೇಳಿದ್ದರು ಕಿರಿಯ ಮಗ ಪ್ರಹ್ಲಾದ್ ಮೋದಿ.
ಹೀರಾ ಬೆನ್ ಅವರಿಗೆ ಐಸ್ ಕ್ರೀಂ ಎಂದರೆ ಇಷ್ಟ. ಮಕ್ಕಳು ಏನು ಕೊಟ್ಟರೂ ಅಷ್ಟೇನು ಉತ್ಸಾಹ ತೋರಿಸದೇ ಇದ್ದ ಹೀರಾಬೆನ್, ಐಸ್ ಕ್ರೀಂ ಎಂದರೆ ಇಷ್ಟಪಟ್ಟು ತಿನ್ನುತ್ತಿದ್ದರು. ಐಸ್ ಕ್ರೀಂನ್ನು ಯಾವತ್ತೂ ಬೇಡ ಎಂದವರಲ್ಲ. ರೋಟಿ ಮತ್ತು ಕಡಿಯಲ್ಲೇ ಜೀವನ ತಳ್ಳಿದ್ದ ಹೀರಾಬೆನ್ಗೆ ಐಷಾರಾಮಿ ಬದುಕಿನ ಬಗ್ಗೆ ವ್ಯಾಮೋಹವೂ ಇರಲಿಲ್ಲ. ತರಕಾರಿಗೂ ಹಣ ಇರುತ್ತಿರಲಿಲ್ಲ. ಹೀಗಾಗಿ ಹಳ್ಳಿಯಲ್ಲಿ ಸಿಗುತ್ತಿದ್ದ ಉಚಿತ ಮಜ್ಜಿಗೆಯೇ ರೋಟಿಗೆ ಜೊತೆಯಾಗುತ್ತಿತ್ತು.
ಅಣ್ಣನ ಬದುಕಿನ ದೊಡ್ಡ ಪಾಠವೇ ಅದು. ಹೀಗಾಗಿಯೇ ಆತ ಮನೆ ಬಿಟ್ಟು ಹಿಮಾಲಯಕ್ಕೆ ಹೋಗಿದ್ದಾಗ ಆತನ ದೇಹ ಪ್ರಕೃತಿ ಕಡಿಮೆ ಆಹಾರಕ್ಕೆ ಅಡ್ಜಸ್ಟ್ ಆಗಿರಬೇಕು. ಇವತ್ತಿಗೂ ಆತನ ಊಟದಲ್ಲಿ ಬದಲಾವಣೆಯಾಗಿಲ್ಲ. ಅಮ್ಮನೂ ಅಷ್ಟೆ, ರೋಟಿ, ಕಡಿಯೇ ಆಕೆಗೆ ಇಷ್ಟವಾದ ಆಹಾರ ಎಂದಿದ್ದರು ಪ್ರಹ್ಲಾದ್ ಮೋದಿ. ಅಪ್ಪನೂ ದುಡಿಯುತ್ತಿದ್ದರು, ಅಮ್ಮನೂ ದುಡಿಯುತ್ತಿದ್ದರು. ನೀವೀಗ ಹೇಳುತ್ತೀರಲ್ಲ, ನರೇಂದ್ರ ಮೋದಿ 18 ಗಂಟೆ ಕೆಲಸ ಮಾಡುತ್ತಾರೆ ಅಂತ, ಆ 18 ಗಂಟೆಗಳ ಕರ್ತವ್ಯಕ್ಕೆ ಸ್ಫೂರ್ತಿಯೇ ನಮ್ಮಮ್ಮ ಎಮದು ಅಣ್ಣನ ಬಗ್ಗೆ, ಅಮ್ಮನ ಬಗ್ಗೆ ಅಭಿಮಾನದಿಂದ ಹೇಳಿಕೊಂಡಿದ್ದರು ಪ್ರಹ್ಲಾದ್ ಮೋದಿ.
ಆಕೆಗೆ ಓದು ಅಷ್ಟಾಗಿ ಗೊತಿರಲಲ್ಲ. ಆದರೆ ಪತಿ ಇರುವವರೆಗೆ ಅವರು ಧಾರ್ಮಿಕ ಪುಸ್ತಕಗಳನ್ನು ಓದಿ ಹೇಳುತ್ತಿದ್ದರು. ಅಲ್ಲಿ ಕೇಳಿದ್ದನ್ನು ಮಕ್ಕಳಿಗೆ ಹೇಳುತ್ತಿದ್ದರು. ಮೋದಿಯ ಧಾರ್ಮಿಕ ನಂಬಿಕೆಗಳ ಹಿಂದಿನ ಶಕ್ತಿಯೂ ಹೀರಾಬೆನ್ ಅವರೇ. ಎಲ್ಲ ಗಂಡು ಮಕ್ಕಳಂತೆಯೇ, ತಂದೆಗಿಂತ ಹೆಚ್ಚು ತಾಯಿಯ ಬಳಿಯೇ ಮೋದಿಗೆ ಆತ್ಮೀಯತೆಯಿತ್ತು. ತಾಯಿಯ ಜೊತೆ ದೇವಸ್ಥಾನಗಳಿಗೆ ಹೋಗುತ್ತಿದ್ದ ಮೋದಿಗೆ ಅದು ದೇವರು, ಧರ್ಮದ ಬಗ್ಗೆ ಗಟ್ಟಿಯಾದ ನಂಬಿಕೆಗಳನ್ನು ಚಿಕ್ಕಂದಿನಲ್ಲಿಯೇ ಬಿತ್ತಿತು.
ಹಿರಿಯರಾಗಿದ್ದರೂ, ಪಿಂಚಣಿಯಲ್ಲೇ ಜೀವನ ಸಾಗಿಸುತ್ತಿದ್ದರೂ ಹೀರಾಬೆನ್ ಅವರಿಗೆ ಮಗನ ಮೇಲೆ ವಿಶೇಷ ಮಮತೆ. ಮಗ ಮೋದಿಯೂ ಅಷ್ಟೆ, ಪ್ರಧಾನಿಯಾಗಿದ್ದರೂ ಅಮ್ಮ ಕೊಡುವ ಹಣದ ಮೇಲೆ ಎಲ್ಲ ಮಕ್ಕಳಂತೆಯೇ ಒಂದು ಅಕ್ಕರೆ. ಮೊದಲ ಬಾರಿ ಪ್ರಧಾನಿಯಾದಾಗ 5001 ರೂ.ಗಳನ್ನು ಪ್ರಧಾನಮಂತ್ರಿ ನಿಧಿಗೆ ಕಾಣಿಕೆಯಾಗಿದ್ದ ನೀಡಿದ್ದರು ಹೀರಾಬೆನ್.
