ಕಾಂಗ್ರೆಸ್ ಚುನಾವಣೆಯ ರಂಗು ಏರುತ್ತಿದ್ದಂತೆಯೇ ಘೋಷಿಸಿದ್ದ ಮೊದಲ ಕೊಡುಗೆ ಮನೆ ಮನೆಗೂ 200 ಯುನಿಟ್ ವಿದ್ಯುತ್ ಫ್ರೀ ಎಂಬ ಘೋಷಣೆ. ಡಿಕೆ ಶಿವಕುಮಾರ್ ಅವರು ನೀಡಿದ್ದ ಪವರ್ ಸ್ಟ್ರೋಕ್ ಎಲ್ಲರಿಗೂ ಥಂಡಾ ಹೊಡೆಸಿತ್ತು. ಬಿಜೆಪಿ ಮತ್ತು ಜೆಡಿಎಸ್ ಇದು ಸಾಧ್ಯವಿಲ್ಲ ಎಂದು ಟೀಕಿಸಿದಾಗ ನಾನು ಇಂಧನ ಸಚಿವನಾಗಿದ್ದವನು, ನನಗೆ ಗೊತ್ತು ಎಂದು ಉತ್ತರ ಕೊಟ್ಟಿದ್ದರು ಡಿಕೆಶಿವಕುಮಾರ್. 
ಉಚಿತ ವಿದ್ಯುತ್ ಮತ್ತು ಮನೆ ಮನೆ ಗೃಹಿಣಿಯರಿಗೆ 2000 ಮಾಸಾಶನ (ವರ್ಷಕ್ಕೆ 24 ಸಾವಿರ) ಘೋಷಣೆಯಿಂದ ಬಜೆಟ್ಟಿಗೆ ವರ್ಷಕ್ಕೆ ಬೀಳುವ ಹೊರೆ 40 ಸಾವಿರ ಕೋಟಿಗೂ ಹೆಚ್ಚು. ಎರಡು-ಎರಡೂವರೆ ಲಕ್ಷ ಕೋಟಿಯ ಬಜೆಟ್`ನಲ್ಲಿ ಇದು ಸಾಧ್ಯವೇ, ಕಾರ್ಯಸಾಧುವೇ ಎಂಬ ಪ್ರಶ್ನೆಯೂ ಎದ್ದಿತ್ತು. ಬಿಜೆಪಿಯೇನೂ ಹಿಂದೆ ಬಿದ್ದಿರಲಿಲ್ಲ. ಅತ್ತ ಮೋದಿ ಉಚಿತ ಯೋಜನೆಗಳು ದೇಶದ ಅರ್ಥವ್ಯವಸ್ಥೆಗೆ ಅಪಾಯ ಎಂದು ತೆಲಂಗಾಣ, ತಮಿಳುನಾಡು, ಪಂಜಾಬ್, ದೆಹಲಿಯ ಆರ್ಥಿಕ ಪರಿಸ್ಥಿತಿ ತೋರಿಸಿ ಬೊಬ್ಬೆ ಹೊಡೆಯುತ್ತಿದ್ದರೆ, ಇದೇ ರಾಜ್ಯ ಬಿಜೆಪಿ ತಾನೂ ಫ್ರೀ ಕೊಡೋಕೆ ರೆಡಿ ಎಂದು ಒಂದಷ್ಟು ಫ್ರೀಫ್ರೀಫ್ರೀ ಸ್ಕೀಂಗಳನ್ನು ಬಿಟ್ಟಿತ್ತು. ಹೀಗೆ ಘೋಷಣೆ ಹೊರಬಿದ್ದೊಡನೆಯೇ ಇದು ಜಾರಿಯಾದರೂ ಇವರು ಹೇಳಿದಂತೆ ಎಲ್ಲರಿಗೂ ಆಗಲ್ಲ ಎಂದು ತಜ್ಞರು ಭವಿಷ್ಯ ನುಡಿದಿದ್ದರು. ಅಂತೆಯೇ ಆಗಿದೆ.
ವಿಧಾನಪರಿಷತ್ ಕಾಂಗ್ರೆಸ್ ನಾಯಕ ಬಿ.ಕೆ.ಹರಿಪ್ರಸಾದ್ 200 ಯುನಿಟ್ ಫ್ರೀ ವಿದ್ಯುತ್ ಇನ್ಕಂ ಟ್ಯಾಕ್ಸ್ ಕಟ್ಟುವವರಿಗೆ ಇಲ್ಲ ಎಂದಿದ್ದಾರೆ. ಇದು ಮೊದಲ ಷರತ್ತು. ಆದರೆ ಇಂತಹ ಷರತ್ತುಗಳು ಇಷ್ಟಕ್ಕೇ ನಿಲ್ಲಲ್ಲ. ಇವುಗಳಿಗೆ ಇನ್ನೂ ಕೆಲವು ಷರತ್ತು, ನಿಯಮಗಳು ಸೇರಿಕೊಳ್ಳುತ್ತವೆ. ಸ್ವಂತ ಮನೆ ಇದ್ದವರಿಗೆ ಇಲ್ಲ. 30/40 ಸೈಟ್ ಇದ್ದವರಿಗೆ ಇಲ್ಲ. ಐದು ಎಕರೆ ಜಮೀನಿದ್ದವರಿಗೆ ಇಲ್ಲ. ಸರ್ಕಾರಿ ಉದ್ಯೋಗಿಗಳಿಗೆ ಇಲ್ಲ. ಕಾರ್ ಇದ್ದವರಿಗೆ ಇಲ್ಲ. ಬಿಪಿಎಲ್ ಕಾರ್ಡುದಾರರಿಗೆ ಮಾತ್ರ ಅನ್ವಯ. ಮನೆಯ ಕರೆಂಟ್ ಬಿಲ್ ಇಷ್ಟು ಯುನಿಟ್ ದಾಟಿದರೆ 200 ಯುನಿಟ್ ಫ್ರೀ ವಿದ್ಯುತ್ ಅನ್ವಯವಾಗಲ್ಲ.. ಇಂತಹ ಷರತ್ತುಗಳು ಬರಬಹುದು. ಏಕೆಂದರೆ ಕಳೆದ ಚುನಾವಣೆಯಲ್ಲಿ ಕುಮಾರಸ್ವಾಮಿ ಸಾಲ ಮನ್ನಾ ಘೋಷಿಸಿದಾಗ ಲಕ್ಷ ಕೋಟಿ ದಾಟುವ ನೀರಿಕ್ಷೆಯಿತ್ತು. ಆದರೆ ಇಂತಹ ಷರತ್ತು, ನಿಯಮಗಳನ್ನು ಹಾಕಿದ್ದೇ ತಡ, ಆ ಮೊತ್ತ 8 ಸಾವಿರ ಕೋಟಿ ಆಸುಪಾಸಿನಲ್ಲಿಯೇ ಉಳಿಯಿತು.
ಇಂತಹ ನಿಯಮಗಳು ಗೃಹಿಣಿಯರಿಗೆ 2 ಸಾವಿರ ರೂ ನೀಡುತ್ತೇವೆ ಎಂಬ ಘೋಷಣೆಗೂ ಅನ್ವಯವಾಗಲಿದೆ. ಘೋಷಣೆಗಳು ಘೋಷಣೆಗಳಷ್ಟೇ. ಜಾರಿಗೆ ಬರುವಾಗ ನಿಯಮಗಳು ವಿಭಿನ್ನ..ವಿಭಿನ್ನ..ವಿಭಿನ್ನ.. ಅದು ರಾಜಕೀಯ. ಇದು ವಾಸ್ತವ.
