ಹೊರಗಡೆ ಫೈಟು.. ಲಿಫ್ಟಲ್ಲಿ ಸ್ವೀಟು.. : ಏನಿದು ಸಿದ್ದು-ಈಶು ಫ್ರೆಂಡ್‍ಶಿಪ್ಪು?

ರಾಜಕಾರಣದಲ್ಲಿ ಯಾರೂ ಶಾಶ್ವತ ಶತ್ರುಗಳಲ್ಲ. ಶಾಶ್ವತ ಮಿತ್ರರೂ ಅಲ್ಲ. ಅಂತಹ ನೂರಾರು ನಿದರ್ಶನಗಳನ್ನು ದೇಶ ನೋಡಿದೆ. ಅವರಿಬ್ಬರ ಮಧ್ಯೆ ನೀರು ಹಾಕಿದ್ರೂ ಬೆಂಕಿ ಹೊತ್ತಿಕೊಳ್ಳುತ್ತೆ ಅನ್ನೋ ತರದ ಶತ್ರುಗಳೂ ಒಬ್ಬಿಬ್ಬರಲ್ಲ. ಅಂಹವರು ಹೆಗಲ ಮೇಲೆ ಕೈ ಹಾಕಿಕೊಂಡಿದ್ದನ್ನು ಕರ್ನಾಟಕ ನೋಡಿದೆ. ಹೆಗಲ ಮೇಲೆ ಕೈ ಇಟ್ಟಿದ್ದವರೇ ತಲೆಯ ಮೇಲೆ ಕೈ ಹಾಕಿ ಅದುಮಿದ್ದನ್ನೂ ರಾಜ್ಯ ರಾಜಕೀಯ ಕಣ್ಣಾರೆ ಕಂಡಿದೆ. ಇವರಲ್ಲಿ ಸಖತ್ ಡಿಫರೆಂಟ್ ಅನ್ನಿಸೋದು ಸಿದ್ದರಾಮಯ್ಯ ಈಶ್ವರಪ್ಪ ಫ್ರೆಂಡ್‍ಶಿಪ್ಪು.
ಇಬ್ಬರೂ ಕುರುಬ ಸಮುದಾಯದ ಪ್ರಬಲ ನಾಯಕರು. ಸಿದ್ದರಾಮಯ್ಯ ಅವರಿಗಿಂತ ಈಶ್ವರಪ್ಪ ಒಂದು ವರ್ಷ ಚಿಕ್ಕವರು. ಒಬ್ಬರು ಬಿಜೆಪಿ.. ಮತ್ತೊಬ್ಬರು ಕಾಂಗ್ರೆಸ್. ಸಿದ್ದರಾಮಯ್ಯ ಅವರನ್ನು ಹಣಿಯೋಕೆ ಬಿಜೆಪಿ ಬಿಡೋದೇ ಈಶ್ವರಪ್ಪ ಅಸ್ತ್ರವನ್ನ. ನೋ ಫಿಲ್ಟರ್.. ಏಕವಚನದಲ್ಲಿ ಬೈಬೇಕಾ.. ಬಹುವಚನದಲ್ಲಿ ಬೈಬೇಕಾ.. ಮುಲಾಜೇ ಇಲ್ಲದೆ ಸಿದ್ದರಾಮಯ್ಯರನ್ನು ಈಶ್ವರಪ್ಪ ಬೈತಾರೆ. ಸಿದ್ದು ಕೂಡಾ ಇದಕ್ಕೆ ಹೊರತೇನಲ್ಲ. ಮುಲಾಜಿಲ್ಲದೆ ಟೀಕಿಸ್ತಾರೆ. ಈಶ್ವರಪ್ಪನಿಗೆ ಮೆದುಳೇ ಇಲ್ಲ. ಬುದ್ದಿ ಇಲ್ಲ. ದಡ್ಡ. ಡ್ಯಾಷ್..ಡ್ಯಾಷ್.. ಹೀಗೆ ಬೈತಾರೆ. ಆದರೆ.. ಇಬ್ಬರ ನಡುವಿನ ಬಾಂಧವ್ಯದ ಕಥೆಯೇ ಬೇರೆ. ಬೆಳಗಾವಿಯಲ್ಲಿ ನಡೀತಿರೋ ಅಧಿವೇಶನದಲ್ಲಿ ಆಗಿದ್ದೂ ಇದೆ.
ಈಶ್ವರಪ್ಪ ಈ ಬಾರಿ ಸದನಕ್ಕೆ ಬಂದಿದ್ದರು. ಸಚಿವ ಸ್ಥಾನ ಹೋದ ಮೇಲೆ ಸೆಷನ್ ತಪ್ಪಿಸಿಕೊಂಡಿದ್ದ ಈಶ್ವರಪ್ಪಗೆ ಈ ಬಾರಿ ಏನೋ ಒಂದು ಸಂದೇಶವಂತೂ ಸಿಕ್ಕಿದೆ. ಬೊಮ್ಮಾಯಿ ಅವರೊಂದಿಗೆ ಮಾತನಾಡಿದ ಮೇಲೆ ಮುಖದಲ್ಲಿ ಮುದುಡಿದ್ದ ತಾವರೆ ಅರಳುತ್ತಿದೆ. ಸಿಎಂ ಜೊತೆ, ಪಕ್ಷದ ಒಂದಿಷ್ಟು ಹಿರಿಯ ನಾಯಕರ ಜೊತೆ ಮಾತೆಲ್ಲ ಆಡಿದ ಮೇಲೆ ಸಿದ್ದರಾಮಯ್ಯ ಮತ್ತು ಈಶ್ವರಪ್ಪ ಸುವರ್ಣ ಸೌಧದ ಲಿಫ್ಟಿನಲ್ಲಿ ಭೇಟಿಯಾದರು. ನಗು ನಗುತ್ತಾ ಮಾತುಕತೆ ನಡೆಸಿದರು. ಲಿಫ್ಟಿನ ಡೋರ್ ಓಪನ್ ಆದರೂ ಹೊರಗೆ ಬರಲಿಲ್ಲ. ಲಿಫ್ಟಿನಲ್ಲೇ ಗುಟ್ಟು ಗುಟ್ಟು ಪಿಸು ಪಿಸು ಮಾತುಕತೆ. ಆ ಮಾತುಕತೆಗೆ ಬ್ರೇಕ್ ಬಿದ್ದಿದ್ದು ಆರ್.ಅಶೋಕ್ ಲಿಫ್ಟಿನತ್ತ ಬಂದ ಮೇಲೆಯೇ. ಹಾಗಾದರೆ ಅವರೇನು ಮಾತನಾಡಿದರು..? ಗೊತ್ತಿಲ್ಲ. ಯಾರಿಗೂ ಕೇಳಿಸಿಯೂ ಇಲ್ಲ. ಆದರೆ ತಮಗೆ ಸಚಿವ ಸ್ಥಾನ ತಪ್ಪಿದ ನಂತರ ಆದ ಬೆಳವಣಿಗೆಗಳನ್ನು ಈಶ್ವರಪ್ಪ ಸಿದ್ದರಾಮಯ್ಯ ಜೊತೆ ಹೇಳಿಕೊಂಡಿದ್ದಾರೆ ಎನ್ನಲಾಗುತ್ತಿದೆ.
ಇದ್ದರೂ ಇರಬಹುದು ಎನ್ನುತ್ತಾರೆ ರಾಜಕೀಯ ವರದಿಗಾರಿಕೆಯಲ್ಲಿ ಪಳಗಿದವರು. ಏಕೆಂದರೆ ಹೊರಗೆ ಏನೇ ಬೈದಾಡಿಕೊಂಡರೂ ಇಬ್ಬರೂ ಕೂಡಾ ಇವತ್ತಿಗೂ ಆಪ್ತರಾಗಿಯೇ ಉಳಿದಿದ್ದಾರೆ. ಓಪನ್ ಆಗಿಯೇ ಇಬ್ಬರೂ ಅದನ್ನು ಒಪ್ಪಿಕೊಂಡೂ ಇದ್ದಾರೆ. ಸಿದ್ದರಾಮಯ್ಯ ಈಶ್ವರಪ್ಪ ಅವರಿಗೆ ಯಾವತ್ತೂ ಮಾತನಾಡಿಸೋದು ಏಕವಚನದಲ್ಲಿಯೇ. ಪ್ರೀತಿಯಲ್ಲಿಯೇ ಇರಲಿ, ಟೀಕಿಸುವಾಗಲೇ ಇರಲಿ..ಅವನು ಎಂದೇ ಬಳಸೋದು. ಅದಕ್ಕೆ ಈಶ್ವರಪ್ಪ ಒಮ್ಮೊಮ್ಮೆ ಸಿಟ್ಟಾದರೂ.. ನಗುನಗುತ್ತಿದ್ದಾಗ ಅವರು ನಮ್ ಸಿದ್ರಾಮಣ್ಣ ಅಲ್ವಾ ಎನ್ನುತ್ತಾರೆ. ಇವರಿಬ್ಬರೂ ಎದುರಾಳಿ ಪಕ್ಷದಲ್ಲಿದ್ದರೂ ಇವರ ಮಾತು ನಂಬಿಕೊಂಡು ಅವರ ಹತ್ತಿರ ಇವರನ್ನ..ಇವರ ಹತ್ತಿರ ಅವರ ಬಗ್ಗೆ ನೆಗೆಟಿವ್ ಮಾತನಾಡಿದ್ರೆ ನಮಗೇ ಕಷ್ಟ ಅಂತಾರೆ ಎರಡೂ ಪಕ್ಷದ ಕಾರ್ಯಕರ್ತರು ಮತ್ತು ಹಿರಿಯರು. ಇದು ಕೇವಲ ಸಿದ್ದು-ಈಶು ಕಥೆಯಲ್ಲ. ರಾಜಕೀಯದಲ್ಲಿ ಇಂತಹ ಶತ್ರುಮಿತ್ರ ರಾಜಕಾರಣ ಸದಾ ಚಾಲ್ತಿಯಲ್ಲಿದೆ.
ಡಿಕೆ-ಯಡಿಯೂರಪ್ಪ, ಎಂಬಿಪಾಟೀಲ್-ಯಡಿಯೂರಪ್ಪ, ಶೆಟ್ಟರ್-ಶಾಮನೂರು ಶಿವಶಂಕರಪ್ಪ, ಜಾರಕಿಹೊಳಿ ಬ್ರದರ್ಸ್, ಸಿದ್ದು-ಜಿ.ಟಿ.ದೇವೇಗೌಡ, ರಾಮಲಿಂಗಾರೆಡ್ಡಿ-ಆರ್.ಅಶೋಕ್, ಯತ್ನಾಳ್-ಎಂಬಿ ಪಾಟೀಲ್.. ಹೀಗೆ ಪಟ್ಟಿ ಉದ್ದವಾಗಿಯೇ ಇದೆ.