ಕೆಎಂಎಫ್. ಕರ್ನಾಟಕದ ರೈತರ ಜೀವನಾಡಿ.
ಲಕ್ಷಾಂತರ ಕುಟುಂಬಗಳನ್ನು ಸಾಕುತ್ತಿರುವುದು ಕೆಎಂಎಫ್. ಇನ್ನು ಆನಂದ್ ಮಿಲ್ಕ್ ಯುನಿಯನ್ ಲಿಮಿಟೆಡ್. ಅಮುಲ್ ಎಂದೇ ಖ್ಯಾತವಾಗಿರುವ ಸಂಸ್ಥೆ, ಗುಜರಾತಿನದ್ದು. ಈ ಎರಡೂ ಸಂಸ್ಥೆಯನ್ನು ವಿಲೀನ ಮಾಡ್ತಾರಂತೆ. ಕೆಎಂಎಫ್ನ್ನು ಅಮುಲ್ನೊಳಗೆ ವಿಲೀನ ಮಾಡ್ತಾರಂತೆ. ಇನ್ನು ಮುಂದೆ ಕೆಎಂಎಫ್ ಅನ್ನೋ ಹೆಸರು ಕೇವಲ ಇತಿಹಾಸವಾಗಲಿದೆ ಎಂಬ ಸುದ್ದಿ ವೈರಲ್ ಆಗಿ ಹೋಯ್ತು. ಸೋಷಿಯಲ್ ಮೀಡಿಯಾದಲ್ಲಿ ಈ ವಿವಾದ ಸೃಷ್ಟಿಸಿದ್ದು ಯಾರೋ.. ಏನೋ.. ಗೊತ್ತಿಲ್ಲ. ಆದರೆ, ಅದನ್ನು ನಂಬಿಕೊಂಡು ಯಾವಾಗ ಸಿದ್ದರಾಮಯ್ಯ, ಕುಮಾರಸ್ವಾಮಿ, ಡಿಕೆ ಶಿವಕುಮಾರ್ ಮೊದಲಾದವರು ರಿಯಾಕ್ಟ್ ಮಾಡಿದರೋ.. ವಿವಾದ ತಾರಕಕ್ಕೆ ಹೋಯ್ತು.
ಮಂಡ್ಯದಲ್ಲಿ ನಡೆದ ಕೆಎಂಎಫ್ ಕಾರ್ಯಕ್ರಮದಲ್ಲಿ ಮಾತನಾಡಿದ್ದ ಅಮಿತ್ ಶಾ ಕರ್ನಾಟಕದ ಕೆಎಂಎಫ್ ಹಾಗೂ ಗುಜರಾತಿನ ಅಮುಲ್ ಎರಡೂ ಪರಸ್ಪರ ಕೈಜೋಡಿಸಿದರೆ ಇಡೀ ದೇಶದ ರೈತರ ಬದುಕನ್ನೇ ಬದಲಿಸಬಹುದು ಎಂದು ಹೇಳಿಕೆ ನೀಡಿದ್ದರು. ತಪ್ಪೇನಲ್ಲ, ಹಾಗೆ ನೋಡಿದರೆ ಕೆಎಂಎಫ್ಗೆ ಸ್ಫೂರ್ತಿಯೇ ಅಮುಲ್. ಕುರಿಯನ್ ಎಂಬ ಕನಸುಗಾರನ ಕನಸು ಅಮುಲ್. ಅದನ್ನೇ ಮಾದರಿಯಾಗಿಟ್ಟುಕೊಂಡಿರೋದು ಕೆಎಂಎಫ್, ಸೃಷ್ಟಿಸಿರುವುದು ಹೊಸ ಹೆಜ್ಜೆ. ತಾಂತ್ರಿಕವಾಗಿ ಅಮುಲ್, ಕೆಎಂಎಫ್ಗಿಂತ ಒಂದು ಹೆಜ್ಜೆ ಮುಂದಿದೆ. ಹೆಚ್.ಡಿ.ರೇವಣ್ಣ ಕೆಎಂಎಫ್ನಿಂದ ದೂರವಾದ ನಂತರ ಕೆಎಂಎಫ್ಗೆ ಹೊಸತನಗಳೂ ನಿಂತು ಹೋಗಿದೆ ಎನ್ನುವುದನ್ನು ಖುದ್ದು ಕೆಎಂಎಫ್ನವರೂ ಅಂತರಂಗದಲ್ಲಿ ಒಪ್ಪುತ್ತಾರೆ. ಕರ್ನಾಟಕದಲ್ಲಿ ಕೆಎಂಎಫ್ನ್ನು ಯಶಸ್ವಿ ಉದ್ಯಮವಾಗಿಸಿ, ರೈತರಿಗೂ ಲಾಭವಾಗುವಂತೆ ರೂಪಿಸುವಲ್ಲಿ ಹೆಚ್.ಡಿ.ರೇವಣ್ಣನವರ ಕೊಡುಗೆ ದೊಡ್ಡದು.
ಆದರೆ ಸಿದ್ದರಾಮಯ್ಯ, ಕುಮಾರಸ್ವಾಮಿ, ಡಿಕೆ ಶಿವಕುಮಾರ್ ಮೊದಲಾದವರು ವಿಲೀನಕ್ಕೆ ಕೈ ಹಾಕಿದರೆ ಹುಷಾರ್, ಕರ್ನಾಟಕದ ಜೀವನಾಡಿ ಸಂಸ್ಥೆಯನ್ನು ಗುಜರಾತಿಗೆ ಮಾರೋಕೆ ಹೊರಟಿದೆ, ಅಮಿತ್ ಶಾ ಸಿಕ್ಕಿದ್ದನ್ನೆಲ್ಲ ಮಾರಾಟ ಮಾಡ್ತಾರೆ.. ಎಂಬಂತಹ ಹೇಳಿಕೆಗಳು ಯಾವಾಗ ಹೊರಬಿದ್ದವೋ, ಖುದ್ದು ಸಿಎಂ ಬೊಮ್ಮಾಯಿಯವರೇ ಸ್ಪಷ್ಟನೆ ಕೊಟ್ಟರು. ಸಹಕಾರ ಸಚಿವ ಎಸ್.ಟಿ.ಸೋಮಶೇಖರ್ ಮಾತನಾಡಿದರು. ಕೇಂದ್ರ ಸಚಿವ ಪ್ರಲ್ಹಾದ್ ಜೋಷಿ ಕೂಡಾ ಹೇಳಿದರು.
ಅಮಿತ್ ಶಾ ಹೇಳಿದ್ದು ಪಂಚಾಯ್ತಿಗೊಂದು ಡೈರಿ ಸ್ಥಾಪಿಸಬೇಕು ಎಂಬ ವಿಚಾರ. ಕೆಎಂಎಫ್ ಹಾಗೂ ಅಮುಲ್ ಪರಸ್ಪರ ಸಹಕಾರ ನೀಡಿದರೆ ದೇಶದ ಕೋಟ್ಯಾನುಕೋಟಿ ರೈತರ ಬದುಕು ಬದಲಿಸಬಹುದು ಎಂಬ ವಿಚಾರ. ಅದರಲ್ಲಿ ತಪ್ಪೇನಿದೆ? ಕಾಂಗ್ರೆಸ್ ಹಾಗೂ ಜೆಡಿಎಸ್ನವರು ಸುಳ್ಳು ಸುಳ್ಳೇ ಹೇಳಿ ಜನರನ್ನು ಕೆಣಕುವ ತಂತ್ರ ಮಾಡುತ್ತಿದ್ದಾರೆ. ದಾರಿ ತಪ್ಪಿಸುವ ಸಂಚು ಮಾಡುತ್ತಿದ್ದಾರೆ. ಇಂತಹವನ್ನೆಲ್ಲ ನಂಬಬೇಡಿ ಎಂದರು ಬೊಮ್ಮಾಯಿ.
ಎಸ್.ಟಿ.ಸೋಮಶೇಖರ್ ಅವರಂತೂ 26 ಲಕ್ಷ ಜನ ಇರುವ ಸಂಸ್ಥೆಯ ವಿಲೀನ ಮಾಡುವ ಯೋಚನೆಯಾದರೂ ಸಾಧ್ಯವೇ? ವಿಲೀನದ ಚರ್ಚೆಯೂ ಆಗಿಲ್ಲ. ಕಲ್ಪನೆ ಮಾಡಿಕೊಂಡು ಹೇಳಿದ್ದಕ್ಕೆಲ್ಲ ಸ್ಪಷ್ಟನೆ ಕೊಡಬೇಕಾಗಿದೆ ಎಂದು ಸಿಡಿದರು. ಮಾರ್ಕೆಟಿಂಗ್ನಲ್ಲಿ ಪರಸ್ಪರ ಸಹಕಾರ ನೀಡುವ ಕುರಿತು ಅಮಿತ್ ಶಾ ಹೇಳಿದರೆ, ತಪ್ಪಾಗಿ ಅರ್ಥ ಮಾಡಿಕೊಂಡು ಮಾತನಾಡಿ ಗೊಂದಲ ಸೃಷ್ಟಿಸುತ್ತಿದ್ಧಾರೆ ಎಂದವರು ಪ್ರಲ್ಹಾದ್ ಜೋಷಿ. ಆದರೆ, ಎಲ್ಲಿಯೂ ಹೆಚ್.ಡಿ.ರೇವಣ್ಣ ಈ ಬಗ್ಗೆ ಮಾತನಾಡಲಿಲ್ಲ ಎಂಬುದೂ ವಿಶೇಷ.
