ಕಾಂಗ್ರೆಸ್ ಶಾಸಕಾಂಗ ಪಕ್ಷದ ನಾಯಕ ಸಿದ್ದರಾಮಯ್ಯ ಕೋಲಾರದಿಂದಲೇ ತಮ್ಮ ಸ್ಪರ್ಧೆ ಎಂದು ಸಾರಿ ಹೇಳಿದ್ದಾರೆ. ಸಿದ್ದರಾಮಯ್ಯ ಅವರಿಗೆ ಶಾಸಕ ಸ್ಥಾನ ಬಿಟ್ಟುಕೊಟ್ಟಿರುವುದು ಶಾಸಕ ಶ್ರೀನಿವಾಸ ಗೌಡ.
ಅವರಿಗೆ ಕೋಲಾರ ಕ್ಷೇತ್ರ ಬಿಟ್ಟರೆ ಬೇರೆ ಕ್ಷೇತ್ರಗಳಿಲ್ಲ. ಜೊತೆಗೆ ಪಕ್ಷದಿಂದ ಪಕ್ಷಕ್ಕೆ ಬಂದು ಕ್ಷೇತ್ರವನ್ನೂ ಬಿಟ್ಟು ಕೊಡುವುದೆಂದರೆ ಸುಮ್ಮನೆ ಮಾತೇ.. ಆದರೆ ಸಿದ್ದರಾಮಯ್ಯ ಅವರು ಕೊಟ್ಟಿರುವ ಕೆಲವು ಭರವಸೆಗಳು ಶ್ರೀನಿವಾಸ ಗೌಡರಿಗೆ ಹಿಡಿಸಿವೆ.
ಶ್ರೀನಿವಾಸ ಗೌಡರಿಗೆ ಸಿದ್ದರಾಮಯ್ಯ ಕೆಲವು ಭರವಸೆ ನೀಡಿದ್ದಾರೆ ಎನ್ನಲಾಗಿದ್ದು, ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದರೆ ರಾಜಕೀಯ ಅಧಿಕಾರ ಎಂದರೆ ಸಚಿವ ಸ್ಥಾನ ಅಥವಾ ಸಚಿವ ಸ್ಥಾನದ ಮಟ್ಟದ ಸ್ಥಾನ ನೀಡುವ ಭರವಸೆ ನೀಡಿದ್ದಾರಂತೆ. ಚುನಾವಣೆ ಉಸ್ತುವಾರಿಯನ್ನೂ ತಮಗೇ ವಹಿಸಬೇಕು ಎನ್ನುವುದು ಶ್ರೀನಿವಾಸ ಗೌಡ ಅವರ ಇನ್ನೊಂದು ಷರತ್ತು. ಇದಕ್ಕೂ ಸಿದ್ದು ಯೆಸ್ ಎಂದಿದ್ದಾರಂತೆ.
ಇನ್ನು ಮಾಜಿ ಸಚಿವ ಕೆ.ಎಚ್.ಮುನಿಯಪ್ಪ ಅವರನ್ನೂ ಅಷ್ಟೆ, ಮನವೊಲಿಕೆ ತಂತ್ರದ ಮೂಲಕವೇ ಗೆದ್ದಿದ್ದಾರೆ ಸಿದ್ದರಾಮಯ್ಯ. ಅದರಲ್ಲಿ ಮೊದಲ ಹಂತವಾಗಿ ಮುನಿಯಪ್ಪ ಪುತ್ರಿ ರೂಪಾ ಶಶಿಧರ್ ನಿಲ್ಲಲಿರುವ ಕೆಜಿಎಫ್ ಕ್ಷೇತ್ರದಲ್ಲಿ ಅವರ ಗೆಲುವಿಗೆ ಸಿದ್ದರಾಮಯ್ಯ ಪ್ರಯತ್ನ ಮಾಡಬೇಕು. ಕೆಜಿಎಫ್ ಕ್ಷೇತ್ರದಲ್ಲಿ ಕುರುಬರ ಮತಗಳೇ ನಿರ್ಣಾಯಕ. ಅದಕ್ಕೆ ಸಿದ್ದು ಓಕೆ ಎಂದಿದ್ದಷ್ಟೇ ಅಲ್ಲ, ಈ ಭರವಸೆ ನೀಡಿದ್ದು ಸ್ವತಃ ಮುನಿಯಪ್ಪ ಅವರ ಮನೆಗ ಭೇಟಿ ನೀಡಿದಾಗ.
ಅಷ್ಟೇ ಅಲ್ಲ, ರಮೇಶ್ ಕುಮಾರ್ ಮತ್ತು ಮುನಿಯಪ್ಪ ಅವರ ಮಧ್ಯೆ ಸಂಧಾನ ಮಾಡಿಸಬೇಕು ಎನ್ನುವುದು ಹೈಕಮಾಂಡ್ ಸೂಚನೆ. ಆದರೆ ದಶಕಗಳ ಕಾಲ ಒಂದೇ ಪಕ್ಷದಲ್ಲಿದ್ದು ಗುದ್ದಾಡಿಕೊಂಡಿದ್ದ ಇಬ್ಬರೂ ನಾಯಕರು ಸಿದ್ದರಾಮಯ್ಯ ಅವರಿಗಾಗಿ ಒಂದಾಗಬಹುದು ಎಂದು ನಿರೀಕ್ಷೆಯೂ ಇದೆ. ಇದರ ನಡುವೆ ವರ್ತೂರು ಪ್ರಕಾಶ್ ಅವರ ಬೆಂಬಲಿಗರ ಜೊತೆಯೂ ಸಭೆ ನಡೆಸಿ ಮನವೊಲಿಸುವ ಕೆಲಸ ಚಾಲ್ತಿಯಲ್ಲಿದೆ.
ಅಂದಹಾಗೆ ಸಿದ್ದರಾಮಯ್ಯ ಅವರಿಗಾಗಿ ಮೊದಲ ಬಾರಿಗೆ ಕ್ಷೇತ್ರ ಬಿಟ್ಟುಕೊಟ್ಟವರು ರೇವಣಸಿದ್ದಯ್ಯ. 2004ರಲ್ಲಿ ಸಿದ್ದರಾಮಯ್ಯ ಎದುರೇ ನಿಂತು ಸೋತಿದ್ದ ರೇವಣಸಿದ್ದಯ್ಯ, ಸಿದ್ದು ಕಾಂಗ್ರೆಸ್ ಸೇರಿದಾಗ ಕ್ಷೇತ್ರ ಬಿಟ್ಟುಕೊಟ್ಟಿದ್ದರು. ಸಿದ್ದರಾಮಯ್ಯ ಗೆಲುವಿಗೆ ಶ್ರಮಿಸಿದ್ದರು. ಹೀಗಿದ್ದರೂ ಸಿದ್ದರಾಮಯ್ಯಗೆ ಸಿಕ್ಕಿದ್ದದ್ದು 257 ಮತಗಳ ಗೆಲುವು ಮಾತ್ರ.
2008ರಲ್ಲಿ ಕ್ಷೇತ್ರ ಪುನರ್ ವಿಂಗಡಣೆ ಆದಾಗ ಹುಟ್ಟಿಕೊಂಡ ವರುಣಾ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಂಡಿದ್ದರು. ಹೊಸ ಕ್ಷೇತ್ರಕ್ಕೆ ಸಿದ್ದರಾಮಯ್ಯ ಅವರೇ ಎಂಎಲ್ಎ ಆಗಿದ್ದರು. 2018ರಲ್ಲಿ ಆ ಕ್ಷೇತ್ರವನ್ನು ಮಗ ಯತೀಂದ್ರ ಸಿದ್ದರಾಮಯ್ಯ ಅವರಿಗೆ ಬಿಟ್ಟುಕೊಟ್ಟಿದ್ದರು. ಮತ್ತೆ ಚಾಮುಂಡೇಶ್ವರಿ ಕ್ಷೇತ್ರಕ್ಕೆ ಹೋಗಿ ನಿಂತಿದ್ದರು. ಆಗ ಕಾಂಗ್ರೆಸ್ನಿಂದಲೇ ಒಮ್ಮೆ ಗೆದ್ದು ಮತ್ತೊಮ್ಮೆ ಸೋತಿದ್ದ ಎಂ.ಸತ್ಯನಾರಾಯಣ ಕ್ಷೇತ್ರ ಬಿಟ್ಟುಕೊಡಬೇಕಾಗಿತ್ತು. ಆದರೆ ಸಿದ್ದರಾಮಯ್ಯ, 2018ರಲ್ಲಿ ಜಿ.ಟಿ.ದೇವೇಗೌಡ ವಿರುದ್ಧ ಸೋತಿದ್ದರು.
2018ರಲ್ಲಿ ಸಿದ್ದರಾಮಯ್ಯ ಅವರಿಗಾಗಿ ಕ್ಷೇತ್ರ ಬಿಟ್ಟುಕೊಟ್ಟ ಇನ್ನೊಬ್ಬ ಕಾಂಗ್ರೆಸ್ಸಿಗ ಬಿ.ಬಿ.ಚಿಮ್ಮನಕಟ್ಟಿ. ಐದು ಬಾರಿ ಗೆದ್ದು ಶಾಸಕರಾಗಿದ್ದ ಚಿಮ್ಮನಕಟ್ಟಿ ಅವರಿಗೆ ಸಿದ್ದರಾಮಯ್ಯ ಎಂಎಲ್ಸಿ ಮಾಡುವ ಭರವಸೆ ನೀಡಿದ್ದರು. ಆದರೆ ವಿಧಾನಪರಿಷತ್ ಚುನಾವಣೆಯಲ್ಲಿ ಚಿಮ್ಮನಕಟ್ಟಿ ಅವರಿಗೆ ಟಿಕೆಟ್ ಕೊಡಿಸುವುದೂ ಸಾಧ್ಯವಾಗಿರಲಿಲ್ಲ. ಹೀಗಾಗಿ ಬಾದಾಮಿಯಲ್ಲಿ ಸಿದ್ದರಾಮಯ್ಯ ಸ್ಪರ್ಧೆಗೆ ಅವಕಾಶ ನೀಡುವುದಿಲ್ಲ ಎಂದು ಸಿದ್ದರಾಮಯ್ಯ ಎದುರಿಗೇ ವೇದಿಕೆಯಲ್ಲಿ ಗುಡುಗಿದ್ದರು ಚಿಮ್ಮನಕಟ್ಟಿ. ಆನಂತರವೇ ಸಿದ್ದರಾಮಯ್ಯ ಬಾದಾಮಿ ಬಿಡುವ ನಿರ್ಧಾರ ಮಾಡಿದ್ದು.
ಈಗ ಶ್ರೀನಿವಾಸ ಗೌಡ ಅವರಿಗೆ ಸಿದ್ದರಾಮಯ್ಯ ಭರವಸೆ ನೀಡಿದ್ದಾರೆ. ಆ ಭರವಸೆ ಈಡೇರುತ್ತಾ..? ಗೊತ್ತಿಲ್ಲ. ಆದರೆ ಭರವಸೆ ಈಡೇರಿಸುವ ಶಕ್ತಿ ಸಿದ್ದರಾಮಯ್ಯ ಅವರಿಗೆ ಬರಬೇಕು ಎಂದರೆ ಮೊದಲು ಸಿದ್ದರಾಮಯ್ಯ ಗೆಲ್ಲಬೇಕು. ಕಾಂಗ್ರೆಸ್ ಸರಳ ಬಹುಮತದೊಂದಿಗೆ ಅಧಿಕಾರ ಹಿಡಿಯಬೇಕು. ಮುಂದಿನದ್ದು ಕಾಲ ನಿರ್ಧಾರ ಮಾಡುತ್ತೆ.
