ನೀವು ಶೃಂಗೇರಿ ನೋಡಿದ್ದೀರಾ.. ಆದಿಗುರು ಶಂಕರಾಚಾರ್ಯರು ಸ್ಥಾಪಿಸಿದ ಶಕ್ತಿಪೀಠವದು. 
ಶೃಂಗೇರಿ ಶಕ್ತಿಪೀಠದ ಶಕ್ತಿಯೆಂದರೆ ಇಲ್ಲಿಗೆ ಶಂಕರಾಚಾರ್ಯರು ಬಂದಾಗ ಬಿಸಿಲಿನಿಂದ ಬಳಲುತ್ತಿದ್ದ ಕಪ್ಪೆಗೆ ಹಾವೊಂದು ನೆರಳು ಕೊಟ್ಟಿತ್ತಂತೆ. ಆ ದೃಶ್ಯವನ್ನು ನೋಡಿದ ಶಂಕರಾಚಾರ್ಯರು ಶತ್ರುಗಳೂ ಮಿತ್ರರಾಗಿ ಬದುಕುವ ಈ ಸ್ಥದದಲ್ಲಿ ಶಕ್ತಿ ಸ್ವರೂಪವಿದೆ ಎಂದು ಅರಿತು ಇಲ್ಲಿ ಶಾರದಾಪೀಠ ಸ್ಥಾಪಿಸಿದರಂತೆ.
ಶಂಕರಾಚಾರ್ಯರು ಸ್ಥಾಪಿಸಿದ ಗೋವರ್ದನ ಪೀಠ (ಒಡಿಶಾದ ಜಗನ್ನಾಥ ಪುರಿ), ಇದು ಪುರಿ ಪೀಠ ಎಂದೇ ಖ್ಯಾತಿ ಪಡೆದಿದೆ. ಪಶ್ಚಿಮಮ್ನಾಯ ಪೀಠ ಎಂದರೆ ದ್ವಾರಕೆಯ ಶಾರದಾ ಪೀಠ. ಮೂರನೆಯದ್ದು ನಮ್ಮ ಶೃಂಗೇರಿಯ ಶಾರದಾ ಪೀಠ. ಇವೆಲ್ಲವುಗಳ ಮೂಲ ಮಠವೇ ಜೋಶಿಮಠ. 
ಉತ್ತರದಲ್ಲಿ ಸ್ಥಾಪಿಸಿರುವ ಈ ಕ್ಷೇತ್ರವನ್ನು ಜೋಶಿಮಠ, ಜ್ಯೋತಿರ್ಮಠ, ಬದರಿಕಾಶ್ರಮ ಹೀಗೆ ನಾನಾ ಹೆಸರುಗಳಿಂದ ಕರೆಯುತ್ತಾರೆ. ಇಲ್ಲಿಯೇ ಶಂಕರಾಚಾರ್ಯರಿಗೆ ಜ್ಞಾನೋದಯವಾಗಿದ್ದು. ಈ ಮೂಲ ಮಠದಲ್ಲೇ ಭೂಮಿ ಬಾಯಿ ಬಿಡುತ್ತಿದೆ. ಮನೆಗಳು ಬಿರುಕು ಬಿಡುತ್ತಿವೆ. ಶಿವಲಿಂಗವೇ ಅಲುಗಾಡಿ ಹೋಗಿ ಛಿದ್ರರೂಪವಾಗಿದೆ. ಆತಂಕ ಮೂಡಿಸಿರುವುದೇ ಇದು.
ಉತ್ತರ ಭಾರತದ ಶೃಂಗೇರಿ ಎಂದೇ ಹೆಸರಾದ ಜೋಶಿಮಠದಲ್ಲಿ 600ಕ್ಕೂ ಹೆಚ್ಚು ಮನೆಗಳು ಬಿರುಕು ಬಿಟ್ಟಿವೆ. 20 ಸಾವಿರಕ್ಕೂ ಹೆಚ್ಚು ಜನ ಮನೆಯಲ್ಲಿ ನೆಮ್ಮದಿಯಿಂದ ನಿದ್ರೆ ಮಾಡಲಾಗದೆ ಬೀದಿಗೆ ಬಂದಿದ್ದಾರೆ. ಇದು 8ನೇ ಶತಮಾನದಲ್ಲಿ ಶಂಕರಾಚಾರ್ಯರು ಸ್ಥಾಪಿಸಿದ ಪೀಠ. ಇಲ್ಲಿ ಹಲವು ದೇವಸ್ಥಾನಗಳಿವೆ. ಆ ದೇವಸ್ಥಾನಗಳೂ ಬಿರುಕು ಬಿಡುತ್ತಿವೆ. ಕಟ್ಟಡಗಳ ಗೋಡೆಗಳಲ್ಲಿ ನೀರು ಜಿನುಗತೊಡಗಿದೆ. ಅಂತರ್ಜಲ ಉಕ್ಕೇರುತ್ತಿದೆ. ಇಲ್ಲಿನ ಒಂದು ವಿಶೇಷವೆಂದರೆ ಇಲ್ಲಿನ ಬದರಿನಾಥ ದೇಗುಲದ ವಿಷ್ಣು ಮೂರ್ತಿಯನ್ನು ಚಳಿಗಾಲದಲ್ಲಿ ಜೋಶಿಮಠದ ನರಸಿಂಹ ಮಂದಿರದಲ್ಲಿ ಇಟ್ಟು ರಕ್ಷಿಸುತ್ತಾರೆ. ಆ ವಿಗ್ರಹವನ್ನೂ ಸುರಕ್ಷತೆಯ ದೃಷ್ಟಿಯಿಮದ ಬೇರೆಡೆ ಸ್ಥಳಾಂತರಿಸಿ, ದೇವರ ವಿಗ್ರಹ ನಾಶವಾದರೆ ಅದಕ್ಕಿಂತ ದೊಡ್ಡ ದೋಷ ಇನ್ನೊಂದಿಲ್ಲ ಎನ್ನುವುದು ಭಕ್ತರ ಆಗ್ರಹ.
ಶಿವಲಿಂಗದಲ್ಲೇ ಬಿರುಕು : ಶಂಕರಾಚಾರ್ಯರಿದ್ದ ಮೂಲ ಮಠ ಮಾಧವಾಶ್ರಮದಲ್ಲಿ ಒಂದು ಶಿವಲಿಂಗವಿದ್ದು, ಆ ಶಿವಲಿಂಗವೇ ಛಿದ್ರವಾಗಿದೆ. ಭಗ್ನಗೊಂಡಿದೆ. ಹಿಂದೂ ಸಂಪ್ರದಾಯಗಳಲ್ಲಿ ಭಗ್ನವಾದ ಶಿವಲಿಂಗವನ್ನು ಪೂಜೆ ಮಾಡುವಂತಿಲ್ಲ. ಅಲ್ಲದೆ ಶಿವಲಿಂಗ ಭಗ್ನಗೊಳ್ಳೋದು ಎಂದರೆ ಅದೊಂದು ವಿನಾಶದ ಸೂಚನೆ ಎಂದೇ ಜನ ಭಯಪಡುತ್ತಾರೆ. ಸಾಮಾನ್ಯವಾಗಿ ಶಿವಲಿಂಗಗಳು ಭಗ್ನಗೊಳ್ಳುವುದಿಲ್ಲ. ಆದರೆ ಈಗ ಅಗಿರುವ ಅನಾಹುತ ಭಕ್ತರನ್ನು ಭಯಕ್ಕೆ ತಳ್ಳಿದೆ. ಇಲ್ಲಿನ ಭಗವತಿ ದೇಗುಲದ ಒಂದು ಪಾಶ್ರ್ವ ಭೂಕುಸಿತಕ್ಕೆ ಒಳಗಾಗಿದೆ. ಜ್ಯೋತಿರ್ಮಠದ ದ್ವಾರಬಾಗಿಲಲ್ಲೇ ಬಿರುಕು ಕಾಣಿಸಿಕೊಂಡಿದೆ. ಜ್ಯೋತಿರ್ಮಠದ ಆವರಣದಲ್ಲೇ ಇರುವ ಲಕ್ಷ್ಮೀನಾರಾಯಣ ದೇಗುಲ, ಒಂದು ವಸತಿ ಸಂಕೀರ್ಣ, ಆಡಿಟೋರಿಯಂ ಗೋಡೆಗಳಲ್ಲೂ ಬಿರುಕು ಕಾಣಿಸಿಕೊಂಡಿದೆ. ಜ್ಯೋತಿರ್ಮಠದ ಮೊದಲ ಗುರುಗಳಾದ ತೋಟಕಾಚಾರ್ಯ ಗುಹೆ, ತ್ರಿಪುರ ಸುಂದರಿ ರಾಜರಾಜೇಶ್ವರಿ ದೇಗುಲ ಹಾಗೂ ಜ್ಯೋತಿರ್ಮಠದಲ್ಲೇ ಇರುವ ಶಂಕರಾಚಾರ್ಯ ಪೀಠಗಳು ಕೂಡಾ ಸುರಕ್ಷಿತವಾಗಿಲ್ಲ.
ಒಡಿಶಾ ಸಿಎಂ ಪುಷ್ಕರ್ ಸಿಂಗ್ ಧಾಮಿ ತಕ್ಷಣಕ್ಕೆ ಇಲ್ಲಿದ್ದ 600 ಕುಟುಂಬಗಳನ್ನೂ ಸ್ಥಳಾಂತರ ಮಾಡುವಂತೆ ಸೂಚನೆ ಕೊಟ್ಟಿದ್ದಾರೆ. ಮುಂದಿನ 6 ತಿಂಗಳು ಅವರಿಗೆ ಮನೆ ಬಾಡಿಗೆ ಕಟ್ಟೋಕೆ 4 ಸಾವಿರ ರೂ. ಭತ್ಯೆಯೂ ಸಿಗಲಿದೆ. ಆನಂತರ ಏನು..? ಉತ್ತರ ಗೊತ್ತಿಲ್ಲ. ಮನೆ ಕಳೆದುಕೊಂಡವರಿಗೆ ಶಾಶ್ವತ ಪರಿಹಾರ ಕೊಡಬೇಕೇ? ಸ್ಥಳಾಂತರ ಮಾಡಿ ವಸತಿ ವ್ಯವಸ್ಥೆ ಕಲ್ಪಿಸಬೇಕೆ.. ಹೀಗೆ ಯಾವುದಕ್ಕೂ ಉತ್ತರ ಸಿಕ್ಕಿಲ್ಲ.
2021ರ ನಂತರ ಜೋಶಿಮಠ ಭೀಕರ ಪ್ರವಾಹಕ್ಕೆ ನಲುಗಿದೆ. ಒಂದೆಡೆ ಭೂಕಂಪ, ಸರಣಿ ಸರಣಿ ಪಶ್ಚಾತ್ ಕಂಪನಗಳು (ಪಶ್ಚಾತ್ ಕಂಪನಗಳೆಂದರೆ ಭೂಕಂಪವೇ. ಆದರೆ ಭೂಕಂಪದ ತೀವ್ರತೆ ಕಡಿಮೆ ಇರುತ್ತದೆ. ಇನ್ನೆಲ್ಲೋ ಆಗುವ ಭೂಕಂಪದ ಅಲೆ ಇಲ್ಲಿಗೆ ತಲುಪುವ ವೇಳೆಗೆ ವೇಗ, ತೀವ್ರತೆ ಎರಡೂ ತಗ್ಗಿರುತ್ತದೆ.ಆದರೆ ಪದೇ ಪದೇ ಸಂಭವಿಸುವ ಇಂತಹ ಪಶ್ಚಾತ್ ಕಂಪನಗಳಿಂದಾಗಿ ಜೊಶಿಮಠ ಸುತ್ತಮುತ್ತಲಿನ ಭೂಮಿ ಸಡಿಲವಾಗಿದೆ.) ಅಲ್ಲದೆ ಜೋಶಿಮಠದ ಪಕ್ಕದಲ್ಲೇ ಸುರಂಗ, ಅಣೆಕಟ್ಟು, ಹೆದ್ದಾರಿ ಕಾಮಗಾರಿಗಳು ನಡೆದಿವೆ. ಇದಕ್ಕಾಗಿ ಕಲ್ಲು ಬಂಡೆಗಳನ್ನು ಸ್ಫೋಟಿಸಲಾಗುತ್ತಿದೆ. ಇವುಗಳಿಂದಾಗಿ ಇಲ್ಲಿ ಕಳೆದ 10 ವರ್ಷಗಳಲ್ಲಿ 130ಕ್ಕೂ ಹೆಚ್ಚು ಭೂಕುಸಿತ ಸಂಭವಿಸಿದೆ. ಈ ಕಾಮಗಾರಿ ನಿಲ್ಲಿಸುವುದಕ್ಕೆ ಕೆಲವು ಸಂಘಟನೆಗಳು ಒತ್ತಾಯಿಸಿದ್ದವಾದರೂ ಸ್ಥಳೀಯರೇ ಅಭಿವೃದ್ಧಿ ಕಾರ್ಯ ನಿಲ್ಲಿಸುವುದು ಬೇಡ ಎಂದು ಹೋರಾಟವನ್ನು ತಗ್ಗಿಸಿದ್ದರು. ಈ ಭೂಪ್ರದೇಶ ಇಂಗ್ಲಿಷ್ ವರ್ಣಮಾಲೆಯ ವಿ ಆಕಾರದಲ್ಲಿದೆ. ಇಂತಹ ಕೆಲಸಗಳು ಇಡೀ ಭೂಮಿಯ ಪದರವನ್ನು ಸಡಿಲ ಮಾಡಲಿವೆ ಎಂಬ ತಜ್ಞರ ವಾದಕ್ಕೆ ಇಲ್ಲಿನ ಸ್ಥಳೀಯರೇ ಕಿವಿಗೊಟ್ಟಿರಲಿಲ್ಲ. ಈಗ ಊರನ್ನೇ ಬಿಡಬೇಕಾದ ಪರಿಸ್ಥಿತಿ ಎದುರಾಗಿದೆ. ಶಂಕರಾಚಾರ್ಯರು ಸ್ಥಾಪಿಸಿದ್ದ ಶಕ್ತಿಪೀಠವೇ ಅಲುಗಾಡುತ್ತಿದೆ.
