ವೇದ ಯಾತ್ರೆ : ಮಗಳಾದರೆ ಬಡ ತಂದೆಯೂ ಮೆರೆಯೋ ದೊರೆ..

ಮಹದಾನಂದವೂ ಮಗಳಾದರೆ..
ಬಡ ತಂದೆ ಸಹ ಮೆರೆಯೋ ದೊರೆ..ವೇದ ಚಿತ್ರದ ಈ ಹಾಡು ಎಂತಹವರನ್ನೂ ಭಾವುಕರನ್ನಾಗಿಸುವಷ್ಟು ಯಶಸ್ವಿಯಾಗಿದೆ. ಶಿವಣ್ಣ, ಗಾನವಿ ಹಾಗೂ ಮಗಳ ಪಾತ್ರದಲ್ಲಿ ಆದಿತಿ.. ಕಣ್ಣಿನಲ್ಲೇ ಎಲ್ಲವನ್ನೂ ಹೇಳುತ್ತಾರೆ. ತಂದೆಯ ಕಾಳಜಿ, ತಾಯಿಯ ಪ್ರೀತಿ, ಮಗಳ ನಿರೀಕ್ಷೆ.. ಎಲ್ಲವೂ ಅದ್ಭುತವಾಗಿರುವ ಹಾಡಿದು. ಡಾ.ವಿ.ನಾಗೇಂದ್ರ ಪ್ರಸಾದ್ ಪದಗಳಲ್ಲಿ ಭಾವನೆಗಳನ್ನೆಲ್ಲ ಹೆಕ್ಕಿ ಕೊಟ್ಟಿದ್ದಾರೆ. ಕೀರ್ತಿ ಹೊಳ್ಳ ಹೃದಯವೇ ಚಡಪಡಿಸುವಂತೆ ಹಾಡಿದ್ದಾರೆ. ವೇದ.. ಚಿತ್ರ ಬ್ಲಾಕ್ ಬಸ್ಟರ್ ಲಿಸ್ಟಿಗೆ ಸೇರಿದ ನಂತರ ಗೀತಾ ಪಿಕ್ಚರ್ಸ್ ರಿಲೀಸ್ ಮಾಡಿರುವ ಹಾಡಿದು.
ಥಿಯೇಟರುಗಳಲ್ಲಿ ಗಿಲಕ್ಕೋ ಶಿವ ಗಿಲಕ್ಕೋ.. ಜುಂಜಪ್ಪನ ಹಾಡು.. ಪುಷ್ಪ ಪುಷ್ಪ.. ಹಾಡುಗಳು ಅಭಿಮಾನಿಗಳ ಎದೆಯಲ್ಲಿ ಪುಳಕ ಹುಟ್ಟಿಸುತ್ತಿವೆ. ತಂದೆ ಮಗಳ ಸೆಂಟಿಮೆಂಟ್ ಸೀನ್ ಪ್ರೇಕ್ಷಕರನ್ನು ಕಣ್ಣಿರು ಹಾಕಿಸುವಷ್ಟು ಮನೋಜ್ಞವಾಗಿ ಮುಡಿ ಬಂದಿದೆ.
ಹರ್ಷ ಕಮರ್ಷಿಯಲ್ ಚಿತ್ರದಲ್ಲಿ ಮತ್ತೊಮ್ಮೆ ಗೆದ್ದಿದ್ದರೆ, ಗೀತಾ ಶಿವರಾಜಕುಮಾರ್ ಮೊದಲ ಪ್ರಯತ್ನದಲ್ಲಿಯೇ ಸಕ್ಸಸ್ ಕಂಡಿದ್ದಾರೆ. ಶಿವಣ್ಣ ಅವರದ್ದೀಗ ಎಲ್ಲೆಲ್ಲೂ ಸಕ್ಸಸ್ ಯಾತ್ರೆ.
ಬೆಂಗಳೂರಿನ ಹಲವು ಚಿತ್ರಮಂದಿರಗಳಲ್ಲಿ ಯಶಸ್ಸಿನ ಪಯಣ ಮುಂದುವರೆಸಿರೋ ಶಿವಣ್ಣ, ಬೆಂಗಳೂರು, ಮೈಸೂರು ಸೇರಿದಂತೆ ರಾಜ್ಯದ ವಿವಧೆಡೆ ಥಿಯೇಟರುಗಳಿಗೆ ಭೇಟಿ ಕೊಡುತ್ತಿದ್ದಾರೆ. ಈ ಹಾದಿಯಲ್ಲಿ ಶಿವಣ್ಣ ಜೊತೆಯಲ್ಲಿ ಗಾನವಿ ಲಕ್ಷ್ಮಣ್, ಮಗಳು ಆದಿತಿ ಸಾಗರ್, ಶ್ವೇತಾ ಚೆಂಗಪ್ಪ, ಡೈರೆಕ್ಟರ್ ಹರ್ಷ ಸೇರಿದಂತೆ ಚಿತ್ರತಂಡದವರೆಲ್ಲ ಒಟ್ಟಿಗೇ ಹೋಗುತ್ತಿದ್ದಾರೆ. ತಮಗಿಂತ ಮೊದಲು ಗಾನವಿ, ಆದಿತಿಯನ್ನು ಮಾತನಾಡಲು ಪ್ರೋತ್ಸಾಹಿಸುತ್ತಿರುವ ಶಿವಣ್ಣ, ಮತ್ತೊಮ್ಮೆ ತಮ್ಮ ಚಿತ್ರದ ಸಹನಟರಿಗೆ ಹೆಚ್ಚು ಸ್ಕೋಪ್ ಸಿಗುವಂತೆ ನೋಡಿಕೊಳ್ಳುತ್ತಿರುವುದು ವಿಶೇಷ.ಇತ್ತೀಚಿನ ಕೆಲವು ವಿವಾದಗಳಿಂದ ಬೇಸತ್ತಿರುವ ಅಭಿಮಾನಿಗಳಿಗೆ ವೇದದ ಸಕ್ಸಸ್ ಕೊಡುತ್ತಿರುವ ಖುಷಿಯೇ ಬೇರೆ.
ವೇದ ಚಿತ್ರತಂಡ ಇಂದು ಚಾಮರಾಜನಗರ, ಟಿ.ನರಸೀಪುರ, ಗುಂಡ್ಲುಪೇಟೆ ಹಾಗೂ ಹುಣಸೂರುಗಳಲ್ಲಿ ಚಿತ್ರಮಂದಿರಗಳಿಗೆ ಭೇಟಿ ಕೊಡಲಿದೆ. ನಾಳೆ ಕೊಳ್ಳೆಗಾಲ, ಮಳವಳ್ಳಿ, ಮದ್ದೂರು, ಮಂಡ್ಯ, ರಾಮನಗರಗಳಲ್ಲಿ ಚಿತ್ರಮಂದಿರಗಳನ್ನು ಭೇಟಿ ಮಾಡಲಿದೆ.
ತಮಿಳುನಾಡಿನಿಂದಲೂ ಚಿತ್ರಕ್ಕೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿದ್ದು, ಬಿಡುಗಡೆಯಾದ ಎಲ್ಲ ಕಡೆ ಉತ್ತಮ ಕಲೆಕ್ಷನ್ಸ್ ಮಾಡುತ್ತಿದೆ.