ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಕೆಸಿಆರ್ ರಣಕಹಳೆ ಮೊಳಗಿಸಿದ್ದಾರೆ. ಇತ್ತೀಚೆಗೆ ತೆಲಂಗಾಣದ ಖಮ್ಮಂನಲ್ಲಿ ಕೆಸಿಆರ್ ಬೃಹತ್ ಸಮಾವೇಶ ನಡೆಸಿದ್ದರು. ತಮ್ಮ ತೆಲಂಗಾಣ ರಾಷ್ಟ್ರೀಯ ಸಮಿತಿಯನ್ನು ಭಾರತೀಯ ರಾಷ್ಟ್ರೀಯ ಸಮಿತಿಯಾಗಿ ಬದಲಿಸಿ, ರಾಷ್ಟ್ರಮಟ್ಟದ ಹೋರಾಟಕ್ಕೆ ರೆಡಿಯಾಗಿರುವ ಕೆಸಿಆರ್, ಈ ಹೋರಾಟದಲ್ಲಿ ತಾವೊಬ್ಬರೇ ಅಲ್ಲ, ಹಲವರನ್ನು ಜೊತೆಗೂಡಿಸಿಕೊಂಡಿದ್ದಾರೆ. 
ಪಂಜಾಬ್, ದೆಹಲಿಯಲ್ಲಿ ಬಿಜೆಪಿಗೆ ಚಳ್ಳೆಹಣ್ಣು ತಿನ್ನಿಸುತ್ತಿರುವ ಆಮ್ ಆದ್ಮಿಯ ಅರವಿಂದ ಕೇಜ್ರಿವಾಲ್, ಉತ್ತರ ಪ್ರದೇಶದಲ್ಲಿ ಯೋಗಿ ಆದಿತ್ಯನಾಥ್ಗೆ ಪೈಪೋಟಿ ಕೊಡುತ್ತಿರುವ ಸಮಾಜವಾದಿ ಪಕ್ಷದ ಅಖಿಲೇಶ್ ಯಾದವ್, ಕೇರಳದ ಪಿಣರಾಯಿ ವಿಜಯನ್ (ಸಿಪಿಎಂ), ಸಿಪಿಐನ ಡಿ.ರಾಜಾ ಕೂಡಾ ಜೊತೆಗೂಡಿರುವುದು ವಿಶೇಷ. ಈ ವೇದಿಕೆಯಲ್ಲಿ ಹೆಚ್.ಡಿ.ಕುಮಾರಸ್ವಾಮಿ ಇರಲಿಲ್ಲವಾದರೂ ಅವರು ಚಂದ್ರಶೇಖರ ರಾವ್ ಜೊತೆಯಲ್ಲೇ ಇದ್ದಾರೆ ಎನ್ನುವುದು ಗುಟ್ಟೇನಲ್ಲ.
ಟಿ.ಆರ್. ಎಸ್.ನ್ನು ಬಿ.ಆರ್.ಎಸ್. ಮಾಡುವಾಗ, ರಾಷ್ಟ್ರಮಟ್ಟದ ಸಮಾವೇಶ ನಡೆಸುವ ಯೋಜನೆ ನಡೆಸುವ ಸಭೆಗಳಲ್ಲಿ ಕುಮಾರಸ್ವಾಮಿ ಹಾಜರಿದ್ದರು. ಈಗ ನಡೆದ ಸಮಾವೇಶಕ್ಕೆ ಹೋಗದೇ ಇದ್ದರೂ ಬೆಂಬಲ ನೀಡಿರುವ ಕುಮಾರಸ್ವಾಮಿ ಹೋರಾಟಕ್ಕೆ ಕೈಜೋಡಿಸಿದ್ದಾರೆ. ಪಂಚರತ್ನ ಯಾತ್ರೆಯಲ್ಲಿ ತೊಡಗಿರುವ ಕುಮಾರಸ್ವಾಮಿ ಅವರಿಗೆ ಕೆಸಿಆರ್ ಬೆಂಬಲ ನೀಡುತ್ತಿದ್ದಾರೆ. ಅಂದಹಾಗೆ ತೆಲಂಗಾಣದಲ್ಲಿ ಕೆಸಿಆರ್ಗೆ ಪ್ರಬಲ ಎದುರಾಳಿ ಕಾಂಗ್ರೆಸ್. ಕಾಂಗ್ರೆಸ್`ನ್ನು ಶತ್ರುವಿನಂತೆ ನೋಡಿಕೊಂಡು ಬಂದಿರುವ ಕೆ.ಸಿ.ಚಂದ್ರಶೇಖರ್ ರಾವ್, ಈಗ ಬಿಜೆಪಿ ವಿರುದ್ಧವೂ ಅಂತದ್ದೇ ಸಮರ ಸಾರಿದ್ದಾರೆ. ಹೀಗಿರುವಾಗ ರಾಜ್ಯದಲ್ಲಿ ವಿಧಾನಸಭೆ ಚುನಾವಣೆ ಹೊತ್ತಿಗೆ ಕುಮಾರಸ್ವಾಮಿ ಅವರಿಗೆ ಕೆಸಿಆರ್ ಬೆಂಬಲವೂ ಸಿಗಲಿದೆ.
