ವಿಷ್ಣುವಿನ ದಶಾವತಾರಗಳ ಕಥೆ ಗೊತ್ತು. ಈಶ್ವರನ 11 ಅವತಾರ ಯಾವುದು..? 45 ಸಿನಿಮಾ ನೋಡಿದವರಿಗೆ ಕಾಡುವ ಪ್ರಶ್ನೆ ಇದು. ಏಕೆಂದರೆ ಈಶ್ವರನ ಅವತಾರಗಳ ಕಥೆ ಬಹುತೇಕರಿಗೆ ಗೊತ್ತಿಲ್ಲ. ಇದ್ದಕ್ಕಿದ್ದಂತೆ 45 ಎಂಬ ಸಿನಿಮಾ ಮಾಡಿ, ಅದು ಶಿವನ 11 ಅವತಾರಗಳ ಕಥೆ ಎಂದರೆ.. ಕಾಗಕ್ಕ ಗೂಬಕ್ಕನ ಕಥೆ ಎನ್ನುವವರಿಗೇನೂ ಕಡಿಮೆ ಇಲ್ಲ. ಆದರೆ, ಶಿವನಿಗೂ ಅವತಾರಗಳಿವೆ. ಅವುಗಳನ್ನು ʻಏಕಾದಶ ರುದ್ರʼರು ಎಂದು ಕರೆಯುತ್ತಾರೆ. ಹಾಗಂತ ಇದು 45 ಸಿನಿಮಾ ನೋಡಿ ಉದ್ಭವಿಸಿದ ಕಥೆ ಅಲ್ಲ. ಶಿವಪುರಾಣ, ಸ್ಕಂದ ಪುರಾಣ ಸೇರಿದಂತೆ ಹಲವು ಕಡೆ ಶಿವನ 11 ಅವತಾರಗಳ ಉಲ್ಲೇಖ ಇದೆ.
ಶಿವಪುರಾಣದ ಪ್ರಕಾರ, ದೇವತೆಗಳನ್ನು ರಾಕ್ಷಸರಿಂದ ರಕ್ಷಿಸಲು ಶಿವನು ಕಶ್ಯಪ ಮಹರ್ಷಿ ಮತ್ತು ಸುರಭಿಯ ಪುತ್ರರಾಗಿ ಹನ್ನೊಂದು ರೂಪಗಳಲ್ಲಿ ಅವತರಿಸಿದನು. ಇವರನ್ನು ಏಕಾದಶ ರುದ್ರರು ಎಂದು ಕರೆಯಲಾಗುತ್ತದೆ.
- ಕಪಾಲಿ : ಅಧರ್ಮವನ್ನು ನಾಶಪಡಿಸುವ ಮತ್ತು ಧರ್ಮವನ್ನು ಎತ್ತಿಹಿಡಿಯುವ ರೂಪ. ಕಪಾಲ ಎಂದೂ ಕರೆಯುತ್ಥಾರೆ.
- ಪಿಂಗಲ : ಸಕಲ ಜೀವರಾಶಿಗಳಿಗೂ ಮಂಗಳವನ್ನು ಉಂಟುಮಾಡುವ ಅವತಾರ. ಪಿಂಗಳ ಎಂಬ ಹೆಸರೂ ಇದೆ.
- ಭೀಮ : ಅತ್ಯಂತ ಶಕ್ತಿಶಾಲಿಯಾದ ಮತ್ತು ದುಷ್ಟರ ಸಂಹಾರಕನಾದ ರೂಪ. ಮಹಾಭಾರತದ ಭೀಮ, ಇವನಲ್ಲ. ಅವನು ವಾಯುಪುತ್ರ.
- ವಿರೂಪಾಕ್ಷ : ಮೂರು ಕಣ್ಣುಗಳನ್ನು ಹೊಂದಿರುವ ಮತ್ತು ಜ್ಞಾನದ ಸಂಕೇತವಾಗಿರುವ ಸ್ವರೂಪ. ತ್ರಿನೇತ್ರ, ತ್ರಯಂಬಕಂ ಎಂದೆಲ್ಲ ಕರೆಯುತ್ತಾರೆ.
- ವಿಲೋಹಿತ : ಪ್ರಳಯ ಕಾಲದ ಉಗ್ರ ಅಗ್ನಿಯಂತಹ ಕೆಂಪು ವರ್ಣದ ರೂಪ. ಶಿವ ಮತ್ತು ವಿಷ್ಣುವಿನ ಸಂಯೋಗ ಅವತಾರ.
- ಶಾಸ್ತ್ರ : ಶಿಸ್ತು ಮತ್ತು ನೀತಿ ನಿಯಮಗಳನ್ನು ಬೋಧಿಸುವ ಅವತಾರ. ಜ್ಞಾನ, ಧ್ಯಾನವನ್ನು ಪ್ರತಿಪಾದಿಸುವ ಈಶ್ವರ.
- ಅಜಪಾದ : ಬ್ರಹ್ಮಾಂಡದ ಸೃಷ್ಟಿ ಮತ್ತು ಲಯದ ಮೇಲೆ ನಿಯಂತ್ರಣ ಹೊಂದಿರುವ ರೂಪ. ಇಡೀ ಸೃಷ್ಟಿಯನ್ನು ನಿರ್ವಹಿಸುವುದು ಈ ಶಿವ.
- ಅಹಿರ್ಬುಧನ್ಯ : ರಹಸ್ಯ ಮತ್ತು ಅತೀಂದ್ರಿಯ ಶಕ್ತಿಗಳ ಅಧಿಪತಿ. ವಿಶೇಷವಾಗಿ ಅಘೋರಿಗಳು ಈ ಸಿದ್ಧ ಪಡೆಯಲು ಇನ್ನಿಲ್ಲದ ಸಾಹಸ ಪಡುತ್ತಾರೆ. ಈ ಶಿವ ಅಷ್ಟು ಸುಲಭವಾಗಿ ಒಲಿಯುವವನಲ್ಲ.
- ಶಂಭು : ಇಡೀ ಬ್ರಹ್ಮಾಂಡದ ಸೃಷ್ಟಿಕರ್ತ ಮತ್ತು ಶಾಂತಿಯ ಮೂಲ. ಈತನಿಂದಲೇ ಸೃಷ್ಟಿ, ಈತನಿಂದಲೇ ಶಾಂತಿ. ಈಶ್ವರನಿಂದಲೇ ಮುಕ್ತಿ.
- ಚಂದ : ಅತ್ಯಂತ ರೌದ್ರ ಮತ್ತು ವೇಗವಾಗಿ ಚಲಿಸುವ ಸ್ವರೂಪ.
- ಭವ : ಜಗತ್ತಿನ ಸೃಷ್ಟಿ ಮತ್ತು ಸ್ಥಿತಿಗೆ ಕಾರಣನಾದವನುಇಲ್ಲಿ ವಿಶೇಷ ಎಂದರೆ ವಿಷ್ಣುವಿನ ಅವತಾರಗಳಾದ ರಾಮ, ಕೃಷ್ಣ, ವಾಮನ, ವರಾಹ.. ಹೀಗೆ ಯಾವುದೇ ಅವತಾರಗಳನ್ನು ನೋಡಿದರೂ, ಆ ಅವತಾರಗಳಿಗೊಂದು ಕಥೆ ಇದೆ. ಆದಿ ಇದೆ, ಅಂತ್ಯವು ಇದೆ. ಆದರೆ ಶಿವನ ಅವತಾರಗಳ ಕಥೆ ಹಾಗಲ್ಲ. ಶಿವನೇ ನಾನಾ ರೂಪಗಳಲ್ಲಿ ಅವತಾರ ಎತ್ತಿ ಜಗತ್ತನ್ನು ಕಾಪಾಡುತ್ತಾನೆ. ಮತ್ತೊಂದು ನಂಬಿಕೆಯ ಪ್ರಕಾರ, ಭಗವಾನ್ ಹನುಮಂತನನ್ನು ಶಿವನ ಹನ್ನೊಂದನೇ ರುದ್ರ ಅವತಾರ ಎಂದು ಪರಿಗಣಿಸಲಾಗುತ್ತದೆ. ಶ್ರೀರಾಮನ ಸೇವೆಗಾಗಿ ಶಿವನು ಈ ರೂಪವನ್ನು ತಾಳಿದನೆಂದು ಪುರಾಣಗಳು ಉಲ್ಲೇಖಿಸುತ್ತವೆ.
ಇವುಗಳನ್ನೇ 45 ಚಿತ್ರದಲ್ಲಿ ತೋರಿಸಲಾಗಿದೆ. 45 ಚಿತ್ರದಲ್ಲಿ ರಾಯಪ್ಪ ಉಪೇಂದ್ರ, ಇವನ ಹಿಂದೆ ಇನ್ಯಾರೋ ಇದ್ದಾರೆ ಎಂದು ಹೇಳುತ್ತಲೇ ಇರುತ್ತಾರೆ. ಆ ಹಿಂದೆ ಇರುವ ಶಕ್ತಿಗಳೇ 11 ಅವತಾರಗಳು.
