2024ರ ಚುನಾವಣೆ ಮತದಾನ ಅಂತಿಮ ಹಂತದಲ್ಲಿದೆ. ಅದು ಮುಗಿಯುತ್ತಿದ್ದಂತೆಯೇ ಎಲ್ಲರ ಕಣ್ಣು ಜೂನ್ 4ರ ಫಲಿತಾಂಶದ ಮೇಲೆ ನೆಟ್ಟಿದೆ. ಅದಕ್ಕೆ ಮಂಗಳವಾರದವರೆಗೆ ಕಾಯಬೇಕು. ಮಂಗಳವಾರ ಸಂಜೆಯ ಹೊತ್ತಿಗೆ ಸ್ಪಷ್ಟಾತಿಸ್ಪಷ್ಟ ಚಿತ್ರಣ ಸಿಗಲಿದೆ. ಮಧ್ಯಾಹ್ನದ ಹೊತ್ತಿಗೆ ಸ್ಪಷ್ಟವಾದ ಟ್ರೆಂಡ್ ಸಿಗಲಿದೆ. ಈ ಚುನಾವಣೆಗೂ ಹಲವು ಸಮೀಕ್ಷೆಗಳು ನಡೆದಿವೆ. ಯಾವ ಫಲಿತಾಂಶ ನಿಜವಾಗಲಿದೆ.. ಎಂಬ ಕುತೂಹಲ ಎಲ್ಲರಲ್ಲೂ ಇದೆ. ಅದು ಗೊತ್ತಾಗುವುದು ಮಂಗಳವಾರವೇ ಆದರೂ.. ಈ ಹಿಂದಿನ ಚುನಾವಣೆ ಸಮೀಕ್ಷೆಗಳು ಏನು ಹೇಳಿದ್ದವು.. ಏನು ಫಲಿತಾಂಶ ಬಂದಿತ್ತು ಎಂಬ ಕುತೂಹಲಕ್ಕೆ ಉತ್ತರ ಹುಡುಕೋಣ.
2014ರಲ್ಲಿ ನಡೆದ ಚುನಾವಣೆಯಲ್ಲಿ ಎನ್ʻಡಿಎ ಅಧಿಕಾರಕ್ಕೆ ಬರುತ್ತದೆ ಎಂದು ಎಲ್ಲ ಸಮೀಕ್ಷೆಗಳೂ ಹೇಳಿದ್ದವು. ಆದರೆ, ಬಿಜೆಪಿ ಒಂದೇ ಪಕ್ಷಕ್ಕೆ 272+ ಅಂದ್ರೆ ಸ್ಪಷ್ಟ ಬಹುಮತ ಗಳಿಸುತ್ತದೆ ಎಂದು ಲೆಕ್ಕ ಹಾಕಿದ್ದ ಏಕೈಕ ಸಮೀಕ್ಷೆ ಟುಡೇಸ್ ಚಾಣಕ್ಯ ಮಾತ್ರ. ಉಳಿದಂತೆ ಎನ್ʻಡಿಎ ಒಕ್ಕೂಟ 257-300+ ಎಂದು ಭವಿಷ್ಯ ನುಡಿದಿದ್ದವು. ಆದರೆ, ಫಲಿತಾಂಶ ಬಂದಾಗ ಅತ್ಯಂತ ಸ್ಪಷ್ಟವಾಗಿ ಏಕಾಂಗಿಯಾಗಿ ಅಧಿಕಾರ ನಡೆಸುವಷ್ಟು ಸ್ಪಷ್ಟ ಬಹುಮತ ಗಳಿಸಿತ್ತು. 2014ಕ್ಕಿಂತ 2019ರ ಸಮೀಕ್ಷೆ ಮತ್ತು ರಿಸಲ್ಟ್ ಎರಡೂ ಇಂಟ್ರೆಸ್ಟಿಂಗ್.
ಇನ್ನು 2019ರಲ್ಲಿ ಸಮೀಕ್ಷೆಗಳು ಎನ್ʻಡಿಎ ಒಕ್ಕೂಟದ ಸಮ್ಮಿಶ್ರ ಸರ್ಕಾರಕ್ಕೇ ಹೆಚ್ಚು ಮತ ನೀಡಿದ್ದವು. ಯುಪಿಎ ಒಕ್ಕೂಟ ಅಧಿಕಾರಕ್ಕೆ ಬರುತ್ತದೆ ಎಂದು ಯಾವ ಸಮೀಕ್ಷೆಗಳೂ ಹೇಳಲಿಲ್ಲವಾದರೂ.. ಏಕಾಂಗಿಯಾಗಿ ಬಿಜೆಪಿ ಗೆಲ್ಲಲಿದೆ ಎಂದು ಹೇಳಿದ್ದು ಕೆಲವೇ ಕೆಲವು ಸಮೀಕ್ಷೆಗಳು.
ಸಮೀಕ್ಷೆಗಳ ಲೆಕ್ಕವನೂ ಮೀರಿ ಒಟ್ಟು 543 ಸ್ಥಾನಗಳಲ್ಲಿ ಬಿಜೆಪಿ ಏಕಾಂಗಿಯಾಗಿ 303 ಸ್ಥಾನ ಗಳಿಸಿದ್ದರೆ, ಕಾಂಗ್ರೆಸ್ ನೇತೃತ್ವದ ಯುಪಿಎ 90 ಸ್ಥಾನಗಳನ್ನು ಗೆದ್ದುಕೊಂಡಿತ್ತು. ಕೇಂದ್ರದಲ್ಲಿ ಸರ್ಕಾರ ರಚಿಸಲು, ಒಂದು ಪಕ್ಷ ಅಥವಾ ಪಕ್ಷಗಳ ಒಕ್ಕೂಟ ಲೋಕಸಭೆಯಲ್ಲಿ ಕನಿಷ್ಠ 272 ಸ್ಥಾನಗಳಲ್ಲಿ ಗೆದ್ದಿರಬೇಕು.
ಯಾವ ಸಮೀಕ್ಷೆ ಪಕ್ಕಾ ರಿಸಲ್ಟ್ ಕೊಟ್ಟಿತ್ತು..?
1. ಇಂಡಿಯಾ ಟುಡೇ-ಆಕ್ಸಿಸ್ ಮೈ ಇಂಡಿಯಾ
ಬಿಜೆಪಿ ನೇತೃತ್ವದ ಎನ್ಡಿಎಗೆ 339 ರಿಂದ 365 ಸ್ಥಾನಗಳನ್ನು ನೀಡಿತ್ತು.
ಯುಪಿಎ 77-108 ಸ್ಥಾನಗಳಲ್ಲಿ ಗೆಲುವು ಸಾಧಿಸಲಿದೆ ಎಂದು ಅಂದಾಜಿಸಿತ್ತು.
2. ನ್ಯೂಸ್ 24-ಟುಡೇಸ್ ಚಾಣಕ್ಯ
ಎನ್ಡಿಎ ಸುಮಾರು 350 ಸ್ಥಾನಗಳನ್ನು ಗೆಲ್ಲುತ್ತದೆ ಎಂದು ಹೇಳಿತ್ತು (+/- 14). ಇದೇ ವೇಳೆ ಯುಪಿಎ – 95 (+/-9) ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಭವಿಷ್ಯ ನುಡಿದಿತ್ತು. ಬಿಜೆಪಿಗೆ 300+ ಸ್ಥಾನಗಳನ್ನು ನೀಡಿದ್ದ ಏಕೈಕ ಸಮೀಕ್ಷೆ ಇದು.
3. ನ್ಯೂಸ್ 18- ಐಪಿಎಸ್ಒಎಸ್
ಎನ್ಡಿಎಗೆ 336 ಸ್ಥಾನಗಳು ಸಿಗಲಿವೆ ಎಂದು ಭವಿಷ್ಯ ನುಡಿದಿತ್ತು. ಯುಪಿಎಗೆ 82 ಸ್ಥಾನಗಳು ಹಾಗೂ ಇತರ ಪಕ್ಷಗಳಿಗೆ 124 ಸ್ಥಾನಗಳನ್ನು ನೀಡಿತ್ತು.
4. ಟೈಮ್ಸ್ ನೌ-ವಿಎಂಆರ್
ಎನ್ಡಿಎಗೆ ಸುಮಾರು 306 ಸ್ಥಾನ ಹಾಗೂ ಯುಪಿಎ 132 ಸ್ಥಾನಗಳನ್ನು ಗೆಲ್ಲಲಿದೆ ಎಂದು ಹೇಳಿತ್ತು. 3 ಸ್ಥಾನಗಳು ಆಚೀಚೆ ಆಗಬಹುದು ಎಂದು ತಿಳಿಸಿತ್ತು.
5. ಇಂಡಿಯಾ ಟಿವಿ-ಸಿಎನ್ಎಕ್ಸ್
ಎನ್ಡಿಎಗೆ 300 ಸ್ಥಾನಗಳು (+/- 10 ಸೀಟುಗಳು) ಮತ್ತು ಯುಪಿಎಗೆ 120 ಸ್ಥಾನಗಳು (+/-5) ಬರಲಿವೆ ಎಂದು ಅಂದಾಜಿಸಿತ್ತು
6. ಎಬಿಪಿ-ಸಿಎಸ್ಡಿಎಸ್
ಎನ್ಡಿಎಗೆ 277 ಸ್ಥಾನಗಳು ಮತ್ತು ಯುಪಿಎಗೆ 130 ಸ್ಥಾನಗಳನ್ನು ಊಹಿಸಿತ್ತು.
7. ಇಂಡಿಯಾ ನ್ಯೂಸ್-ಪೋಲ್ಸ್ಟ್ರಾಟ್
ಎನ್ಡಿಎಗೆ 287 ಮತ್ತು ಯುಪಿಎಗೆ 128 ಸ್ಥಾನಗಳನ್ನು ಕೊಟ್ಟಿತ್ತು.
8. ಸಿವೋಟರ್
ಎನ್ಡಿಎಗೆ 287, ಯುಪಿಎಗೆ 128 ಸ್ಥಾನಗಳನ್ನು ನೀಡಿತ್ತು.
ಕೊನೆಗೆ ಫಲಿತಾಂಶ ಬಂದಾಗ ಬಿಜೆಪಿ 303 ಹಾಗೂ ಬಿಜೆಪಿ ನೇತೃತ್ವದ ಎನ್ʻಡಿಎ 330+ ಸ್ಥಾನಗಳನ್ನು ಗಳಿಸಿತ್ತು. ವಿಶೇಷವೆಂದರೆ ಒಕ್ಕೂಟದಲ್ಲಿದ್ದ ಶಿವಸೇನೆ ಹಾಗೂ ಜೆಡಿಯು ಒಕ್ಕೂಟದಿಂದ ಹೊರಹೋದರೂ.. ಎನ್ʻಡಿಎ ಸರ್ಕಾರ ಅಲುಗಾಡಲಿಲ್ಲ.
