ಇದೇ ಜನವರಿ 7ಕ್ಕೆ ಸಿದ್ಧರಾಮಯ್ಯ ಹೊಸ ದಾಖಲೆ ಬರೆಯಲಿದ್ದಾರೆ. ನಾಯಕತ್ವ ಬದಲಾವಣೆ ಗೊಂದಲದ ನಡುವೆಯೇ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು 2026-27ನೇ ಹಣಕಾಸು ವರ್ಷದ ಬಜೆಟ್ ಸಿದ್ಧತೆಗೆ ಅಣಿಯಾಗಿದ್ದು, ಜನವರಿ ಮೊದಲ ವಾರದಿಂದಲೇ ಬಜೆಟ್ ಸಿದ್ಧತಾ ಪೂರ್ವಭಾವಿ ಪ್ರಕ್ರಿಯೆಗಳು ಶುರುವಾಗಲಿವೆ. ಆದರೆ ಈ ರೆಕಾರ್ಡ್ ಕಥೆ ಬೇರೆ. ಇದು ಅರಸು ದಾಖಲೆ.
ಸಿದ್ದರಾಮಯ್ಯ ಅವರದ್ದು ಜನವರಿ 6ಕ್ಕೆ ಒಂದು ದಾಖಲೆಯಾಗಲಿದೆ. 7 ವರ್ಷ 7 ತಿಂಗಳ ಅಧಿಕಾರದ ಅವಧಿ ಪೂರೈಸಲಿದ್ದಾರೆ. ಒಟ್ಟು 7 ವರ್ಷ 238 ದಿನಗಳು ಕಂಪ್ಲೀಟ್ ಆಗಲಿವೆ. ನಂತರ ಶುರುವಾಗುವುದೇ ದಾಖಲೆ. “ಅರಸು ದಾಖಲೆ” ಎಂದರೆ ಮಾಜಿ ಮುಖ್ಯಮಂತ್ರಿ ದೇವರಾಜ ಅರಸು ಅವರು ಸಿಎಂ ಆಗಿದ್ದ ದಿನಗಳ ದಾಖಲೆ, ಅಷ್ಟೇ. ಸಿದ್ದರಾಮಯ್ಯ ಅವರು ತಮ್ಮ ಎರಡು ಅವಧಿಗಳಲ್ಲಿ (2013-2018 ಮತ್ತು 2023ರಿಂದ ಇದುವರೆಗೆ) ಒಟ್ಟು ಅಧಿಕಾರಾವಧಿಯಲ್ಲಿ ದೇವರಾಜ ಅರಸು ಅವರ ದಾಖಲೆಯನ್ನು ಸರಿಗಟ್ಟಿಸಿ ಮೀರಿಸಿದ್ದಾರೆ.
ವಿಶೇಷ ಅಂದ್ರೆ, ಸಿದ್ದರಾಮಯ್ಯ ಅವರು ತಮ್ಮ ಮೊದಲ ಚುನಾವಣೆಯಲ್ಲಿ ಸೋಲಿಸಿದ್ದು ದೇವರಾಜ ಅರಸು ಅವರನ್ನೇ. ಆದರೆ ಅದು ಡಿ ದೇವರಾಜ ಅರಸು ಅಲ್ಲ, ಸಿದ್ದರಾಮಯ್ಯ ಸೋಲಿಸಿದ್ದ ನಾಯಕರ ಹೆಸರು ಜಯದೇವರಾಜೇ ಅರಸು ಡಿ. ಮೊದಲ ಬಾರಿ ಗೆದ್ದು ಶಾಸಕರಾಗಿದ್ದು ಚಾಮುಂಡೇಶ್ವರಿ ಕ್ಷೇತ್ರದಿಂದಲೇ. ಆಗ ಸಿದ್ಧರಾಮಯ್ಯ ಲೋಕದಳದಿಂದ ಸ್ಪರ್ಧಿಸಿದ್ದರೆ, ಅವರ ಎದುರಾಳಿ ಜಯದೇವರಾಜೇ ಅರಸು ಕಾಂಗ್ರೆಸ್ನಿಂದ ಸ್ಪರ್ಧೆ ಮಾಡಿದ್ದರು. ಸಿದ್ಧರಾಮಯ್ಯ ಅವರಿಗೆ 26,614 ಮತಗಳು ಬಂದಿದ್ದರೆ (ಶೇ.43), ಎದುರಾಳಿ ಜಯದೇವರಾಜೇ ಅರಸು ಅವರಿಗೆ 24,454 ಮತಗಳು ಬಂದಿದ್ದವು. 8271 ಮತಗಳ ಅಂತರದಿಂದ ಗೆದ್ದಿದ್ದರು ಸಿದ್ಧರಾಮಯ್ಯ.
ಈಗ ತಾವು ಮೊದಲ ಬಾರಿ ಸೋಲಿಸಿದ ಶಾಸಕರ ಹೆಸರೇ ಇದ್ದ ದೇವರಾಜ ಅರಸು ಅವರ ಮುಖ್ಯಮಂತ್ರಿ ದಾಖಲೆಯನ್ನು ಮುರಿದಿದ್ದಾರೆ ಸಿದ್ದರಾಮಯ್ಯ. ವಿಶೇಷ ಎಂದರೆ, ಆ ದಾಖಲೆಯನ್ನು ಅವರು ಮುರಿದಿದ್ದು ಕಾಂಗ್ರೆಸ್ ಸಿಎಂ ಆಗಿ. ಅವರು ಮೊದಲ ಬಾರಿ ಶಾಸಕರಾದಾಗ ಸೋಲಿಸಿದ್ದು ಕಾಂಗ್ರೆಸ್ ನಾಯಕರನ್ನೇ.
ಸಿದ್ದರಾಮಯ್ಯ ಇದುವರೆಗೆ ಒಟ್ಟು 9 ಬಾರಿ ಶಾಸಕರಾಗಿದ್ದಾರೆ. ಒಟ್ಟಾರೆಯಾಗಿ 14 ಚುನಾವಣೆ ಎದುರಿಸಿದ್ದಾರೆ. ಆ 14ರಲ್ಲಿ ಮೊದಲ 7 ಚುನಾವಣೆಗಳನ್ನು ಎದುರಿಸಿದ ಪ್ರತಿ ಚುನಾವಣೆಯಲ್ಲೂ ಅವರಿಗೆ ಕಾಂಗ್ರೆಸ್ಸೇ ಎದುರಾಳಿ. ನಂತರ 8 ಚುನಾವಣೆಗಳಲ್ಲಿ ಕಾಂಗ್ರೆಸ್ ಶಾಸಕರಾಗಿದ್ದಾರೆ. ಆ 8ರಲ್ಲಿ ಒಂದು ಚುನಾವಣೆ ಸೋತಿದ್ದಾರಾದರೂ, ಎಂಎಲ್ಎ ಸ್ಥಾನಕ್ಕೆ ಧಕ್ಕೆ ಬಂದಿಲ್ಲ. ಹಾಗೆ ಸೋತಾಗ 2 ಕಡೆ ಎಲೆಕ್ಷನ್ನಿಗೆ ನಿಂತಿದ್ದ ಸಿದ್ದರಾಮಯ್ಯ, ಬಾದಾಮಿಯಲ್ಲಿ ಗೆದ್ದಿದ್ದರು. ಅದರ ಅರ್ಥ ಕಾಂಗ್ರೆಸ್ಸಿಗೆ ಬಂದ ಮೇಲೆ ಸಿದ್ದರಾಮಯ್ಯ ಒಮ್ಮೆಯೂ ಶಾಸಕ ಸ್ಥಾನ ಕಳೆದುಕೊಂಡಿಲ್ಲ.
ಸಿದ್ದರಾಮಯ್ಯ ಕಾಂಗ್ರೆಸ್ಸಿಗೆ ಬಂದ ಮೇಲೆ 2 ಬಾರಿ ವಿರೋಧಪಕ್ಷದ ನಾಯಕರಾಗಿ, ಎರಡು ಬಾರಿ ಸಿಎಂ ಆಗಿ ದಾಖಲೆ ಬರೆದಿದ್ದಾರೆ. ಮೊದಲ ಬಾರಿ ಶಾಸಕರಾದಾಗಲೇ ಕನ್ನಡ ಕಾವಲು ಸಮಿತಿ ಅಧ್ಯಕ್ಷರಾದ ಸಿದ್ದರಾಮಯ್ಯ, ತಾವು ಗೆದ್ದ ಪ್ರತಿ ಸಂದರ್ಭದಲ್ಲೂ ಅಧಿಕಾರದಲ್ಲಿದ್ದರು ಎನ್ನುವುದು ವಿಶೇಷ. ಸಿದ್ದರಾಮಯ್ಯ ಅವರು ಡಿಸಿಎಂ ಆಗಿಯೂ ಎರಡು ಬಾರಿ ಅಧಿಕಾರದಲ್ಲಿದ್ದರು. ಹಣಕಾಸು ಸಚಿವರಾಗಿ ಸಿದ್ದರಾಮಯ್ಯ ಈಗಾಗಲೇ ದಾಖಲೆ ಬರೆದಿದ್ದಾರೆ.
ಅಲ್ಲಿಯೂ ಅಷ್ಟೇ, ಸಿದ್ದರಾಮಯ್ಯ ಅವರ ಮೊದಲ ಸಿಎಂ ರಾಮಕೃಷ್ಣ ಹೆಗಡೆ ಅವರ ದಾಖಲೆಯನ್ನೇ ಬ್ರೇಕ್ ಮಾಡಿದ್ದಾರೆ. ರಾಮಕೃಷ್ಣ ಹೆಗಡೆ 13 ಬಾರಿ ಬಜೆಟ್ ಮಂಡಿಸಿ ದಾಖಲೆ ಬರೆದಿದ್ದರು. ಈಗ ಸಿದ್ದರಾಮಯ್ಯ ಒಟ್ಟು 16 ಬಾರಿ ರಾಜ್ಯ ಬಜೆಟ್ ಮಂಡಿಸಿ ರೆಕಾರ್ಡ್ ಬರೆದಿದ್ದಾರೆ.
ಇಲ್ಲೂ ಒಂದು ಸ್ಪೆಷಲ್ ರೆಕಾರ್ಡ್ ಇದೆ. ಸಿದ್ದರಾಮಯ್ಯ ಅವರು ಮೊದಲು ಬಜೆಟ್ ಮಂಡಿಸಿದ್ದು ದೇವೇಗೌಡರು ಸಿಎಂ ಆಗಿದ್ದ ಅವಧಿಯಲ್ಲಿ. ಸಿದ್ದರಾಮಯ್ಯ ಮೊದಲ ಬಾರಿಗೆ ಬಜೆಟ್ ಮಂಡಿಸಿದಾಗ ಅಂದರೆ 1995-96ರಲ್ಲಿ ಬಜೆಟ್ ಗಾತ್ರ ಸುಮಾರು 13 ರಿಂದ 14 ಸಾವಿರ ಕೋಟಿಯಷ್ಟೇ ಇತ್ತು. ಈಗ ಅದೇ ಸಿದ್ದರಾಮಯ್ಯ 2024-25ರಲ್ಲಿ 4 ಲಕ್ಷ ಕೋಟಿಯ ಬಜೆಟ್ ಮಂಡಿಸಿದ್ದಾರೆ. ಇದು ದಾಖಲೆ.
