ಹಸುವೇ ಆಗಲಿ, ಯಾವುದೇ ಪ್ರಾಣಿಯಾಗಲಿ.. ಹಾಲು ಕೊಡಬೇಕು ಎಂದರೆ ಅದು ತಾಯಿಯಾಗಬೇಕು. ಆದರೆ, ತಾಯಿಯಾಗದೆಯೇ ಹಾಲು ಕೊಡುವ ವಿಚಿತ್ರವೊಂದು ಉತ್ತರ ಪ್ರದೇಶದಲ್ಲಿ ನಡೆಯುತ್ತಿದೆ. ಉತ್ತರ ಪ್ರದೇಶದ ಬಹ್ರೈಚ್ನಲ್ಲಿ ಒಂದು ಅದ್ಭುತವಾದ ಹಸುವಿದೆ. ಈ ಹಸು ಇದುವರೆಗೂ ಒಮ್ಮೆಯೂ ಗರ್ಭ ಧರಿಸಿಲ್ಲ. ಆದರೂ ಪ್ರತಿದಿನ 4 ಲೀಟರ್ ಹಾಲು ಕೊಡುತ್ತಿದೆ. ಈ ಹಸು ಪಶುವೈದ್ಯರನ್ನೇ ಬೆರಗುಗೊಳಿಸಿದೆ. ಜನರ ಕಣ್ಣಿಗಂತೂ ಇದು ಕಾಮಧೇನುವೇ ಆಗಿದೆ. ಪೂಜೆ ಪುನಸ್ಕಾರಗಳೂ ನಡೆಯುತ್ತಿವೆ.
ಆರಂಭದಲ್ಲಿ ಈ ಹಸು ಕೇವಲ 250 ಮಿಲಿ ಲೀಟರ್ ಹಾಲು ಕೊಡುತ್ತಿತ್ತಂತೆ. ಕ್ರಮೇಣ ದಿನ ಕಳೆದಂತೆ 4 ಲೀಟರ್ʻವರೆಗೂ ಹಾಲು ಕೊಡುತ್ತಿದೆ. ಉತ್ತರ ಪ್ರದೇಶದ ಬಹ್ರೈಚ್ ಜಿಲ್ಲೆಯ ಪಯಾಗ್‌ಪುರ ತೆಹಸಿಲ್‌ನ ಗಂಗಾ ತಿವಾರಿ ಪುರ್ ಗ್ರಾಮದಲ್ಲಿ ಈ ಹಸು ಇದೆ. ಈ ಹಸುವಿನ ಮಾಲೀಕ ನಿವೃತ್ತ ಪ್ರಾಧ್ಯಾಪಕ ಡಾ. ಓಂಕಾರನಾಥ್ ತ್ರಿಪಾಠಿ ಎಂಬುವವರು. ಅವರು ತಮ್ಮ ಜೀವನವನ್ನೇ ಹಸುಗಳಿಗಾಗಿ ಸಮರ್ಪಿಸಿಕೊಂಡಿರುವ ವ್ಯಕ್ತಿ. ಅಂದಹಾಗೆ ಇದು ನಾಟಿ ಹಸು ಅಲ್ಲ. ಹೈಬ್ರಿಡ್ ಹಸು.
ಹೈಬ್ರಿಡ್ ಸಾಹಿವಾಲ್ ಹಸು ಸುಮಾರು 6 ತಿಂಗಳ ಹಿಂದೆ ಹಾಲು ಉತ್ಪಾದಿಸಲು ಪ್ರಾರಂಭಿಸಿದಾಗಿ ಹಸುವಿಗೆ ಎರಡೂವರೆ ವರ್ಷವಾಗಿತ್ತು. ಆರಂಭದಲ್ಲಿ, ಇದು ಕೇವಲ 250 ಮಿ.ಲೀ. ಇಳುವರಿಯನ್ನು ನೀಡುತ್ತಿತ್ತು. ಆದರೆ ನಿಯಮಿತ ಹಾಲುಕರೆಯುವ ಅಭ್ಯಾಸ ರೂಢಿಸಿಕೊಂಡ ನಂತರ ಹಾಲಿನ ಉತ್ಪಾದನೆಯು ದಿನಕ್ಕೆ 4 ಲೀಟರ್‌ಗೆ ಹೆಚ್ಚಿದೆ.
ಹಾಗಂತ ಈ ಹಸುವಿಗೆ ಏನೇನೂ ವಿಶೇಷ ಮುತುವರ್ಜಿ ವಹಿಸಿರಲಿಲ್ಲ. ಯಾವುದೇ ಸಾಮಾನ್ಯ ಹಸುವಿನಂತೆಯೇ ಮೇವು ಮತ್ತು ನೀರನ್ನು ನೀಡುತ್ತಾರೆ. ಕುತೂಹಲದ ಅಂಶ ಎಂದರೆ ತನ್ನ ಆರೈಕೆಯಲ್ಲಿರುವ ಕರುವನ್ನು ಪೋಷಿಸಲು ಹಸುವಿನ ಹಾಲನ್ನೇ ಬಳಸ್ತಾರೆ. ಹಾಗಾದರೆ ಹಸುವಿನ ಈ ಪವಾಡಕ್ಕೆ ಕಾರಣ ಹಸುವಿಗೆ ಹಸುವಿನ ಹಾಲನ್ನೇ ಕುಡಿಸುವುದಾ..? ಗೊತ್ತಿಲ್ಲ. ಏಕೆಂದರೆ ಈ ಹಸುವಿನ ತಾಯಿ ಮೃತಪಟ್ಟಾಗ ಹಸುವನ್ನು ಸಾಕುವುದಕ್ಕಾಗಿ ಹಸುವಿನ ಹಾಲನ್ನೇ ಕುಡಿಸಿ ಬೆಳೆಸಿದ್ದರಂತೆ.
ಹಸುವಿನ ಹಾಲು ಕಡಿಮೆಯಾಗದೆ ಹಾಗೇ ಉಳಿದಿದ್ದರೂ ಅದರ ಕೊಬ್ಬಿನಂಶವು ಬೇರೆ ಹಸುಗಳ ಹಾಲಿನ ಸರಾಸರಿಗಿಂತ ಗಮನಾರ್ಹವಾಗಿ ಹೆಚ್ಚಾಗಿದೆ. ಇದು ಸ್ಥಳೀಯ ಪಶುವೈದ್ಯರ ಆಸಕ್ತಿಯನ್ನು ಕೆರಳಿಸಿದೆ.
ಪ್ರಾಣಿ ವಿಜ್ಞಾನಿಗಳು ಗರ್ಭಧಾರಣೆಯಿಲ್ಲದೆ ಹಸುವಿನಲ್ಲಿ ಹಾಲು ಉತ್ಪಾದನೆಯು ಹಾರ್ಮೋನ್ ಅಸಮತೋಲನದಿಂದ ಉಂಟಾಗಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಆದರೆ ಹಾರ್ಮೋನ್ ವ್ಯತ್ಯಾಸವಾದರೆ ಕರು ಹಾಕದ ಎಲ್ಲ ಹಸುಗಳೂ ಹಾಲು ಕೊಡಲು ಸಾಧ್ಯವೇ ಎಂಬ ಪ್ರಶ್ನೆಗೆ ಪ್ರಾಣಿ ತಜ್ಞರಲ್ಲೂ ಉತ್ತರ ಇಲ್ಲ.
ಕರುವಿಗೆ ಜನ್ಮ ನೀಡಿದೆ ಹಾಲು ನೀಡುತ್ತಿರುವ ಈ ಹಸು ಇದೀಗ ಗ್ರಾಮದ ತುಂಬಾ ಭಾರಿ ಸುದ್ದಿಯಾಗಿದೆ. ಹೀಗಾಗಿ ಪ್ರತಿ ದಿನ ಗ್ರಾಮಸ್ಥರು ಓಂಕಾರನಾಥ್ ಮನೆಗೆ ಆಗಮಿಸುತ್ತಿದ್ದಾರೆ. ಪೂಜೆ ಮಾಡುತ್ತಿದ್ದಾರೆ. ವಿಚಾರಣೆ ನಡೆಸುತ್ತಿದ್ದಾರೆ. ಹಲವರು ಇದು ಸಾಕ್ಷಾತ್ ಕಾಮಧೇನು ಎಂದು ಹೇಳುತ್ತಿದ್ದಾರೆ. ಪೂಜೆ ಮಾಡಿದ ಬಳಿಕ ಗ್ರಾಮಸ್ಥರು, ಹಣ್ಣು ಹಂಪಲುಗಳನ್ನು ಹಸುವಿಗೆ ಅರ್ಪಿಸುತ್ತಿದ್ದಾರೆ.
