ರೋರಿಂಗ್ ಸ್ಟಾರ್ ಶ್ರೀಮುರಳಿ ಆಸ್ಪತ್ರೆಯಿಂದ ಡಿಸ್ ಚಾರ್ಜ್ ಆಗಿದ್ದಾರೆ. ಮನೆಯಲ್ಲಿಯೇ ರೆಸ್ಟ್ ಮಾಡುತ್ತಿದ್ದಾರೆ. ಮನೆಯಲ್ಲೂ ವೈದ್ಯರು ನಿಗಾ ವಹಿಸಲಿದ್ದು, ಶ್ರೀಮುರಳಿ ಮನೆಯಲ್ಲಿಯೇ ರಿಕವರ್ ಆಗಲಿದ್ದಾರೆ. 
ಸುಮಾರು 2 ಗಂಟೆ ಆಪರೇಷನ್ ಯಶಸ್ವಿಯಾಗಿದ್ದು ಶ್ರೀಮುರಳಿ ಬಗ್ಗೆ ಇನ್ನೇನೂ ಅಪಾಯವಿಲ್ಲ ಎಂದಿದ್ದಾರೆ ಡಾಕ್ಟರ್ಸ್. ಆಸ್ಪತ್ರೆಯ ಸಿಬ್ಬಂದಿ ಶ್ರೀಮುರಳಿ ಜೊತೆ ಸೆಲ್ಫಿ ತೆಗೆದುಕೊಂಡು ಮನೆಗೆ ಕಳಿಸಿಕೊಟ್ಟಿದ್ದೇ ವಿಶೇಷ.
ಬಘೀರ ಚಿತ್ರದ ಚಿತ್ರೀಕರಣ ವೇಳೆನಟ ಶ್ರೀಮುರಳಿ ಏಟು ಮಾಡಿಕೊಂಡಿದ್ದರು. ಡ್ಯೂಪ್ ಬಳಸಬಾರದು, ಸ್ಟಂಟ್ಸ್ ರಿಯಲೆಸ್ಟಿಕ್ ಆಗಿರಬೇಕು ಎಂದು ಹಠಕ್ಕೆ ಬಿದ್ದು ಮಾಡಿದ ಸ್ಟಂಟ್ ಎಡವಟ್ಟಾಗಿತ್ತು. ಮೊಣಕಾಲಿಗೆ ಗಂಭೀರವಾಗಿಯೇ ಪೆಟ್ಟು ಬಿದ್ದಿತ್ತು. ಶ್ರೀಮುರಳಿ ಅವರ ಮೊಣಕಾಲಿನಲ್ಲಿ ಫ್ರಾಕ್ಚರ್ ಆಗಿತ್ತು. ಈ ಹಿಂದೆ ಮದಗಜ ವೇಳೆಯಲ್ಲಿ ಗಾಯವಾಗಿದ್ದ ಜಾಗಕ್ಕೇ ಪೆಟ್ಟು ಬಿದ್ದಾಗ ಫ್ರಾಕ್ಚರ್ ಗಂಭೀರ ಸ್ವರೂಪಕ್ಕೆ ತಿರುಗಿತ್ತು. ಈಗ ಅದೇ ಕಾಲಿಗೆ ಪೆಟ್ಟು ಬಿದ್ದ ಹಿನ್ನೆಲೆಯಲ್ಲಿ ಆಪರೇಷನ್ ಮಾಡಿ ಸರಿ ಮಾಡಲಾಗಿದೆ.
ವೈದ್ಯರು ಶ್ರೀಮುರಳಿಗೆ ಒಂದೂವರೆ ತಿಂಗಳು ಕಂಪ್ಲೀಟ್ ಬೆಡ್ ರೆಸ್ಟ್ ಹೇಳಿದ್ದು, ಆನಂತರ ಸಣ್ಣ ಸಣ್ಣ ವಾಕ್ ಶುರು ಮಾಡಬೇಕು. ಆದರೆ ಓವರ್ ಆಗಿ ಮಾಡುವಂತಿಲ್ಲ. ಒಂದೂವರೆ ತಿಂಗಳಲ್ಲಿ ಮೊಣಕಾಲಿನ ಮೇಲೆ ಒತ್ತಡ ಹಾಕದೆ ಓಡಾಡಬಹುದು. ಅದಾದ ಮೇಲೆ ನಾರ್ಮಲ್ ಸ್ಟೇಜ್ಗೆ ಬಂದಿದ್ದಾರೆಯೇ ಇಲ್ಲವೇ ಎಂಬುದನ್ನು ಮತ್ತೆ ಮತ್ತೆ ಪರೀಕ್ಷೆ ಮಾಡಿ ವೈದ್ಯರು ನಿರ್ಧರಿಸುತ್ತಾರೆ. ಅಂದ್ರೆ ಇನ್ನಾರು ತಿಂಗಳು ಶ್ರೀಮುರಳಿ ಫೈಟು, ಡಾನ್ಸು ಮಾಡುವಂತಿಲ್ಲ. ಅಲ್ಲಿಯವರೆಗೆ ಬಘೀರ ಚಿತ್ರದ ಚಿತ್ರೀಕರಣವೂ ನಡೆಯುವಂತಿಲ್ಲ. ಡಾ.ಸೂರಿ ನಿರ್ದೇಶನದ ಬಘೀರ ಚಿತ್ರದ ಕಡೆಯ ಹಂತದ ಚಿತ್ರೀಕರಣ ಕೊನೆಯ ಹಂತದಲ್ಲಿತ್ತು. ಕೆಲವೇ ಕೆಲವು ದೃಶ್ಯಗಳು ಬಾಕಿಯಿದ್ದವು. ಆದರೆ ದುರದೃಷ್ಟವಶಾತ್ ಈ ಅಪಘಾತ ನಡೆದು ಬಘೀರ ಚಿತ್ರಕ್ಕೂ ಬ್ರೇಕ್ ಬಿದ್ದಿದೆ. ಹೊಂಬಾಳೆ ಪ್ರೊಡಕ್ಷನ್ಸ್ನವರ ಬಘೀರ ಚಿತ್ರಕ್ಕೆ ಪ್ರಶಾಂತ್ ನೀಲ್ ಕಥೆಯಿದೆ.
