ಕೊರೊನಾ ಮತ್ತೆ ಬಂದಿದೆ. ಹೆಚ್ಚೂ ಕಡಿಮೆ ಎರಡು ವರ್ಷ ನರಕ ದರ್ಶನ ಮಾಡಿದ್ದ ಜನ ಈಗಷ್ಟೇ ಉಸಿರಾಡುತ್ತಿದ್ದಾರೆ. ಅತ್ತ ಚೀನಾದಲ್ಲೀಗ ದಿನಕ್ಕೆ 3.7 ಕೋಟಿ ರೋಗಿಗಳು ಹೊಸದಾಗಿ ಪತ್ತೆಯಾಗಿದ್ದಾರೆ. ಒಟ್ಟಾರೆ ಕಳೆದ 20 ದಿನಗಳಲ್ಲಿ 25 ಕೋಟಿ ಜನರಿಗೆ ಸೋಂಕು ತಗುಲಿದೆ. ಚೀನಾಕ್ಕೆ ಹೋಲಿಸಿದರೆ ಭಾರತಕ್ಕೆ ಆತಂಕವಿಲ್ಲ. ಏಕೆಂದರೆ ಚೀನಾ ತನ್ನ ದೇಶದ ಜನರಿಗೆ ಕೊಟ್ಟ ಕಳಪೆ ವ್ಯಾಕ್ಸಿನ್ನ್ನೇನೂ ಭಾರತ ಕೊಟ್ಟಿಲ್ಲ. ಭಾರತದ ವ್ಯಾಕ್ಸಿನ್ ಪರಿಣಾಮ ಶೇ.85ರಷ್ಟಿದೆ. ಚೀನಾದ ವ್ಯಾಕ್ಸಿನ್ ಎಫೆಕ್ಟ್ ಶೇ.40ರಷ್ಟು ಮಾತ್ರ. ಜೊತೆಗೆ ಚೀನಾದಂತೆ ಝೀರೋ ಕೋವಿಡ್ ಎಂಬ ಹುಚ್ಚಾಟ ಮಾಡದೆ ಭಾರತ, ಜನರ ಮಧ್ಯೆ ನ್ಯಾಚುರಲ್ ಇಮ್ಯುನಿಟಿ ಬೆಳೆಯಲು ಅವಕಾಶ ನೀಡಿದೆ. 
ಈಗ ಪತ್ತೆಯಾಗಿರುವುದು ಚೀನಾದಲ್ಲಿ ಆರ್ಭಟಿಸುತ್ತಿರುವ ಬಿಎಫ್.7 ತಳಿಯ ಕೋವಿಡ್ ವೈರಸ್. ಇದು ಹೊಸ ವೈರಸ್ ಅಲ್ಲ. ಸುಮಾರು 2 ವರ್ಷಗಳಿಂದ ಇದೇ ಮಾದರಿಯ ವೈರಸ್ 90ಕ್ಕೂ ಹೆಚ್ಚು ದೇಶಗಳಲ್ಲಿ ಪತ್ತೆಯಾಗಿದೆ. ಇದು ವೇಗವಾಗಿ ಹರಡುತ್ತದೆಯಷ್ಟೇ ಮಾರಣಾಂತಿಕವಲ್ಲ. ಇದು ಸದ್ಯಕ್ಕಿರೋ ವರದಿ. ಆದರೆ ಹಾಗಂತ ಸುಮ್ಮನಿರೋಕೆ ಸಾಧ್ಯವಿಲ್ಲ. ಮೊದಲೇ ದಿನಕ್ಕೊಂದು ರೂಪ ವೇಷ ಬದಲಿಸುತ್ತಿರೋ ರೋಗ. ಹೀಗಾಗಿಯೇ ಎಚ್ಚರಿಕೆಯಿಂದಿರುವುದು ಉತ್ತಮ.
ಈ ಹಾದಿಯಲ್ಲಿ ಭಾರತಕ್ಕೆ ಶಕ್ತಿ ನೀಡಿವುದು ನಮ್ಮದೇ ಪ್ರಬಲ ವ್ಯಾಕ್ಸಿನ್ಸ್. ಕೋವಿಶೀಲ್ಡ್ ಮತ್ತು ಕೊವ್ಯಾಕ್ಸಿನ್ ಎರಡೂ ಪ್ರಬಲವಾಗಿದ್ದು, ಸೈಡ್ ಎಫೆಕ್ಟ್ ಇಲ್ಲ. ಆರಂಭದಲ್ಲಿ ಭಾರತೀಯ ಔಷಧಿಗಳನ್ನು ಅನುಮಾನದ ಕಣ್ಣಿಂದ ನೋಡಿದ್ದ ಜಗತ್ತು ಈಗ ಭಾರತವೇ ಬೆಸ್ಟ್ ಎನ್ನುವ ತೀರ್ಮಾನಕ್ಕೆ ಬಂದಿವೆ. ಇದರ ಜೊತತೆಗೆ ಜನರಲ್ಲಿ ನೈಸರ್ಗಿಕವಾಗಿ, ಪ್ರಕೃತಿದತ್ತ ರೋಗ ನಿರೋಧಕ ಶಕ್ತಿಯೂ ಬೆಳೆದಿದೆ. ಇದೆಲ್ಲದರ ಮಧ್ಯೆಯೇ ಬೂಸ್ಟರ್ ಡೋಸ್ ಅದನ್ನೂ ಮೂಗಿನ ಮೂಲಕ ನೀಡಲು ಮುಂದಾಗಿದೆ ಕೇಂದ್ರ ಸರ್ಕಾರ. ಇನ್ಕೋವ್ಯಾಕ್ ಇಂಟ್ರಾನಾಸಲ್. ಇದನ್ನು ಅಭಿವೃದ್ಧಿ ಪಡಿಸಿರುವುದು ಹೈದರಾಬಾದ್ ಮೂಲದ ಭಾರತ್ ಬಯೋಟೆಕ್. 
ಯಾರು ಪಡೆಯಬಹುದು?
ಈಗಾಗಲೇ ಕೋವಿಶೀಲ್ಡ್ ಅಥವಾ ಕೊವ್ಯಾಕ್ಸಿನ್ ಪಡೆದವರು ಬೂಸ್ಟರ್ ಡೋಸ್ ಪಡೆಯಬಹುದು. 18 ವರ್ಷ ಮೇಲ್ಪಟ್ಟಿರಬೇಕು.
ಎಲ್ಲಿ ಸಿಗುತ್ತೆ?
ಸದ್ಯಕ್ಕೆ ಇದು ಖಾಸಗಿ ಆಸ್ಪತ್ರೆಗಳಲ್ಲಿ ಮಾತ್ರವೇ ಲಭ್ಯವಿದೆ. ಶೀಘ್ರದಲ್ಲೇ ಇನ್ಕೋವ್ಯಾಕ್ ಇಂಟ್ರಾನಾಸಲ್ನ್ನು ಕೋವಿಡ್ ಲಸಿಕಾ ವಿಭಾಗಕ್ಕೆ ಸೇರಿಸಲಾಗುವುದು. ಕೆಲವೇ ದಿನಗಳಲ್ಲಿ ಇದು ಸಾರ್ವಜನಿಕ ಆರೋಗ್ಯ ಕೇಂದ್ರಗಳಲ್ಲಿಯೂ ಲಭ್ಯವಾಗಲಿದೆ.
ದುಡ್ಡು ಕೊಡಬೇಕಾ?
ಸದ್ಯಕ್ಕೆ ಸಿಗುತ್ತಿರುವುದು ಖಾಸಗಿ ಆಸ್ಪತ್ರೆಗಳಲ್ಲಾದ ಕಾರಣ ದುಡ್ಡು ಕೊಟ್ಟೇ ಲಸಿಕೆ ಪಡೆಯಬೇಕು. ಆಪ್ನಲ್ಲಿ ಎಲ್ಲ ಮಾಹಿತಿಯೂ ಇದ್ದು, ಬೇಕಾದವರು ಲಸಿಕೆ ಬುಕ್ ಮಾಡಿಕೊಳ್ಳಬಹುದು. ಸದ್ಯಕ್ಕೆ ವ್ಯಾಕ್ಸಿನ್ ಬಿಲ್ ಆಯಾ ಆಸ್ಪತ್ರೆಗಳು ವಿಧಿಸಿದ ದರದಲ್ಲೇ ಇರುತ್ತವೆ.
ಹೇಗೆ ನೀಡುತ್ತಾರೆ?
ಮೂಗು ಸೋರುತ್ತಿದ್ದಾಗ.. ಉಸಿರಾಟಕ್ಕೆ ತೊಂದರೆಯಾದಾಗ ಡ್ರಾಪ್ ಹಾಕಿಕೊಳ್ತೇವಲ್ಲ.. ಹಾಗೆಯೇ.. ನೇರವಾಗಿ ಮೂಗಿಗೆ ಡ್ರಾಪ್ ಹಾಕುವ ರೀತಿ ಹಾಕುತ್ತಾರೆ. 0.4 ಎಂಎಲ್ ಹಾಕುತ್ತಾರೆ.
ಎಷ್ಟು ಬಾರಿ ಹಾಕಿಸಿಕೊಳ್ಳಬೇಕು?
ಈಗಾಗಲೇ ವ್ಯಾಕ್ಸಿನ್ ಪಡೆದವರು ಎರಡು ಬಾರಿ ಬೂಸ್ಟರ್ ಡೋಸ್ ಹಾಕಿಸಿಕೊಳ್ಳಬೇಕು. ಮೊದಲ ಬಾರಿಯೂ 0.4 ಎಲ್ಎಲ್. ಎರಡನೇ ಬಾರಿಯೂ 0.4 ಎಂಎಲ್. ಎರಡು ಡೋಸ್ಗಳ ಮಧ್ಯೆ ಒಂದು ತಿಂಗಳು ಅಂದ್ರೆ 4 ವಾರಗಳ ಗ್ಯಾಪ್ ಇರಲಿದೆ.
ಏನು ಲಾಭ?
ಇಂಜೆಕ್ಷನ್, ಸೂಜಿಯ ಭಯ ಇಲ್ಲ. ಹೆಚ್ಚು ಬಾರಿ ಮೂಗಿನ ಮೂಲಕವೇ ವೈರಸ್ ಪ್ರವೇಶಿಸುತ್ತದೆ. ಈಗ ಮೂಗಿನಿಂದಲೇ ಡ್ರಾಪ್ ಹಾಕಲಾಗುತ್ತದೆ.
