ಕೊಹ್ಲಿ ಅಂದ್ರೆ ಕಿಂಗ್. ಅವನ ದಾಖಲೆ ಹತ್ತಿರದಲ್ಲೂ ರೋಹಿತ್ ಇಲ್ಲ..
3 ಡಬಲ್ ಸೆಂಚುರಿ ಗುರೂ.. ನಿಮ್ ಕೊಹ್ಲಿ ಹೊಡ್ದವ್ನಾ.. ಸುಮ್ನೆ ಸೆಂಚುರಿ ಹೊಡ್ಯೋದಲ್ಲ..
ಕೊಹ್ಲಿ ಫಿಟ್ನೆಸ್ ನೋಡು.. ನಿಮ್ ರೋಹಿತ್ ಹೊಟ್ಟೆ ಡುಮ್ಮಣ್ಣ..
ಹೊಟ್ಟೆ ಅಲ್ಲ.. ಹಿಟ್ ಮಾಡೋದು ನೋಡು. ಹಿಟ್ಮ್ಯಾನ್.. ಹಿಟ್ಮ್ಯಾನ್..
ಒಂದು ಓವರಲ್ಲಿ ಆರೂ ಬಾಲಿಗೆ ಓಡಿ ರನ್ ತಗೊಳ್ಳಾಕುತ್ತಾ ನಿಮ್ ರೋಹಿತ್`ಗೆ..
ಒಂದ್ಸಲ ಕಪ್ ಗೆಲ್ಲೋಕಾಗುತ್ತಾ ನಿಮ್ ಆರ್.ಸಿ.ಬಿ.ಗೆ..
ಹೀಗೆ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಕಟ್ಟರ್ ಫ್ಯಾನ್ಸ್ ಕಿತ್ತಾಡ್ತಿರ್ತಾರೆ. ಅವರಿಗೆ ಇಬ್ಬರೂ ಟೀಂ ಇಂಡಿಯಾ ಆಟಗಾರರು ಅನ್ನೋದು ಗೊತ್ತಿಲ್ಲದೆ ಇರಲ್ಲ. ಆದರೆ ಇಂಡಿಯಾ ಅನ್ನೋದು ಅವರಿಬ್ಬರನ್ನೂ ಒಗ್ಗೂಡಿಸ್ತಿದ್ರೆ ಐಪಿಎಲ್ ಡಿವೈಡ್ ಮಾಡ್ತಿದೆ. ಅಂತಹ ಘಟನೆ ವಿಪರೀತಕ್ಕೆ ಹೋಗಿ ಒಬ್ಬನ ಜೀವವೇ ಹೋಗಿದೆ.
ವಿಘ್ನೇಶ್ ಎಂಬುವನು ಕೊಲೆಯಾದವನು. ಧರ್ಮರಾಜ್ ಎಂಬುವನು ಆರೋಪಿ. ಇವರಿಬ್ಬರೂ ಸ್ನೇಹಿತರು. ಕೊಲೆಯಾದ ವಿಘ್ನೇಶ್ ಮುಂಬೈ ಇಂಡಿಯನ್ಸ್ ಅಂದ್ರೆ ರೋಹಿತ್ ಶರ್ಮಾ ಫ್ಯಾನ್. ಧರ್ಮರಾಜ್ ಆರ್ಸಿಬಿ ಅಂದ್ರೆ ಕೊಹ್ಲಿ ಫ್ಯಾನ್. ಐಟಿಐ ಮುಗಿಸಿ ಸಿಂಗಾಪೂರ್ನಲ್ಲಿ ಕೆಲಸವೂ ಆಗಿತ್ತು. ಹೋಗಲು ಕಾಯುತ್ತಿದ್ದರು. ಈ ಮಧ್ಯೆ ಡ್ರಿಂಕ್ಸ್ಗೆಂದು ಹೋದಾಗ ಮಾತಿಗೆ ಮಾತು ಬೆಳೆದು ರಾದ್ಧಾಂತವಾಗಿದೆ. ಕೊಹ್ಲಿಯ ಫ್ಯಾನ್ ಧರ್ಮರಾಜ್ ಡುಮ್ಮನಿದ್ದು ಅದನ್ನೇ ಕೊಲೆಯಾದ ವಿಘ್ನೇಶ್ ಲೇವಡಿ ಮಾಡಿದ್ದಾನೆ. 
ರೋಹಿತ್ ಶರ್ಮಾನನ್ನ ಲೇವಡಿ ಮಾಡ್ತೀಯಾ. ನೀನೇ ಡುಮ್ಮ ಎಂದಿದ್ದಾನೆ. ಅದು ವಿಕೋಪಕ್ಕೆ ಹೋಗಿ ಕೊನೆಗೆ ಧರ್ಮರಾಜ್, ವಿಘ್ನೇಶ್ಗೆ ಬಾಟಲಿಯಿಂದ ಅಟ್ಯಾಕ್ ಮಾಡಿದ್ದಾನೆ. ಕೊನೆಗೆ ಕ್ರಿಕೆಟ್ ಬ್ಯಾಟ್ನಿಂದ ತಲೆಗೆ ಹೊಡೆದಿದ್ದಾನೆ. ಸ್ಥಳದಲ್ಲೇ ರೋಹಿತ್ ಶರ್ಮಾ ಫ್ಯಾನ್ ವಿಘ್ನೇಶ್ ಮೃತಪಟ್ಟಿದ್ದಾನೆ. ವಿರಾಟ್ ಕೊಹ್ಲಿ ಫ್ಯಾನ್ ಧರ್ಮರಾಜ್ ಈಗ ಅರೆಸ್ಟ್ ಆಗಿದ್ದಾನೆ.
