ಹೆಂಗಸರಿಂದ.. ಹೆಂಗಸರಿಗಾಗಿ ಮಾತ್ರ : ಈ ಊರಿನಲ್ಲಿ ಗಂಡಸರಿಗೆ ಪ್ರವೇಶವಿಲ್ಲ..!

ಗಂಡಸರು ಅ ಊರಿಗೆ ಬರಬಹುದು. ರಾತ್ರಿ ಹೊತ್ತು ಮಲಗುವಂತಿಲ್ಲ. ಆ ಊರಿನಲ್ಲಿ ಗಂಡಸರೇ ಇಲ್ಲ. ಇಂತಾದ್ದೊಂದು ಊರು ಕೀನ್ಯಾದಲ್ಲಿದೆ. ಊರಿನ ಹೆಸರು ಉಮೋಜಾ. ಉಮೋಜಾ ಎಂದರೆ ಒಗ್ಗಟ್ಟು ಎಂದರ್ಥ. ಈ ಊರಿನಲ್ಲಿ ಮಹಿಳೆಯರು ಗರ್ಭ ಧರಿಸುತ್ತಾರೆ. ಆದರೆ ಹುಟ್ಟುವ ಮಗುವಿಗೆ ಅಪ್ಪನ ಹೆಸರು ಹೇಳಲ್ಲ. ಅಷ್ಟೇ ಏಕೆ, ಆ ಮಗು ಜನ್ಮ ಕೊಟ್ಟ ತಂದೆಯ ಮುಖವನ್ನೆ ನೋಡಲ್ಲ. ಹೆಂಗಸರೇ ಇರುವ, ಹೆಣ್ಣು ಮಕ್ಕಳಿಗೆ ಮಾತ್ರವೇ ಇರುವ ಈ ಊರು ಹುಟ್ಟಿದ್ದರ ಹಿಂದೊಂದು ವಿಚಿತ್ರ ಮತ್ತು ಅಷ್ಟೇ ಕರುಣಾಜನಕ ಕಥೆಯಿದೆ.
ಇಷ್ಟಕ್ಕೂ ಇಂತಾದ್ದೊಂದು ಊರು ಸುಖಾಸುಮ್ಮನೆ ಹುಟ್ಟಲಿಲ್ಲ. ಉಮೋಜಾ ಎಂಬ ಊರು ಇದೆ ಅನ್ನೋದು ಜಗತ್ತಿಗೆ ಗೊತ್ತಾಗಿದ್ದು 1990ರಲ್ಲಿ. ಅದಕ್ಕೂ ಹಲವು ವರ್ಷಗಳ ಮುಂಚೆ ಆ ಊರಿನ ಮೇಲೆ ಬ್ರಿಟಿಷ್ ಸೈನಿಕರು ದಾಳಿ ಮಾಡಿದ್ದರಂತೆ. ಸಿಕ್ಕ ಸಿಕ್ಕ ಹೆಣ್ಣು ಮಕ್ಕಳನ್ನು ಹೊತ್ತೊಯ್ದು ಅತ್ಯಾಚಾರ ಮಾಡಿದ್ದರಂತೆ. ಹಾಗೆ ಅತ್ಯಾಚಾರಕ್ಕೊಳಗಾದ ಹೆಣ್ಣು ಮಕ್ಕಳ ಸಂಖ್ಯೆ 1400ಕ್ಕೂ ಹೆಚ್ಚು. ಅವರೆಲ್ಲ ಸಂಬುರು ಅನ್ನೋ ಬುಡಕಟ್ಟಿಗೆ ಸೇರಿದ ಹೆಣ್ಣು ಮಕ್ಕಳು. ಎಲ್ಲ ಮುಗಿದು ಅವರು ಹೋದ ಮೇಲೆ ಈ ಹೆಣ್ಣು ಮಕ್ಕಳು ಮನೆಗೆ ಬಂದರು. ಆದರೆ ಅವರನ್ನು ರಕ್ಷಿಸಿಕೊಳ್ಳಲಾಗದೆ ಹೋಗಿದ್ದ ಅವರ ಗಂಡಂದಿರು, ಅಣ್ಣಂದಿರು ಆ ಹೆಣ್ಣು ಮಕ್ಕಳನ್ನು ಮನೆಗೇ ಸೇರಿಸಲಿಲ್ಲ. ಹಾಗೆ ತಮ್ಮದಲ್ಲದ ತಪ್ಪಿಗೆ ತಮ್ಮವರಿಂದಲೇ ಮತ್ತೊಮ್ಮೆ ಅತ್ಯಾಚಾರಕ್ಕೊಳಗಾದವರು ಈ ಹೆಣ್ಣು ಮಕ್ಕಳು. ಇವರಿಗೆ ಬ್ರಿಟಿಷರ ರೋಗ ಬಂದಿದ್ದು, ಇವರೊಡನೆ ಬದುಕಿದರೆ ನಮಗೆ ಚಿತ್ರ ವಿಚಿತ್ರ ರೋಗ ಬರುತ್ತವೆ ಅನ್ನೋ ಭಯಕ್ಕೆ ಬಿದ್ದು ಮನೆಯಿಂದ ಹೊರಗಟ್ಟಿದರು. ಹಾಗೆ ಮನೆಯಿಂದ ಹೊರಬಂದವರು ಸೃಷ್ಟಿಸಿದ ಊರಿನ ಹೆಸರೇ ಉಮೋಜಾ.
ಗಂಡಂದಿರು ಮನೆಯಿಂದ ಹೊರದಬ್ಬಿದಾಗ ಹಲವು ಮಂದಿ ಆತ್ಮಹತ್ಯೆ ಮಾಡಿಕೊಂಡರೆ ಇನ್ನೂ ಕೆಲವರು ಗಂಡನ ಮನೆ ಅಥವಾ ಊರಿಗೆ ಬರಲೇ ಇಲ್ಲ. ಇನ್ನೂ ಕೆಲವರು ಗಂಡ ದೂರ ತಳ್ಳಿದ ಮೇಲೆ ಎಲ್ಲೆಲ್ಲೋ ಹೋಗಿ ಯಾವ್ಯಾವುದೋ ರೀತಿ ಬದುಕು ಕಟ್ಟಿಕೊಂಡರು. ಆದರೆ ಕೆಲವರಿಗೆ ಮಾತ್ರ ಇದರಲ್ಲಿ ನಮ್ಮ ತಪ್ಪೇನು ಎಂಬ ಪ್ರಶ್ನೆ ಎದ್ದಿತ್ತು. ಅವರು ಸಿಡಿದು ಬಿದ್ದರು. ತಮ್ಮದೇ ಊರಿನಿಂದ ಸ್ವಲ್ಪ ದೂರದಲ್ಲಿರೋ ಕಾಡಿಗೆ ಹೋದರು. ಹೊಸದಾಗಿ ಊರನ್ನೇ ಕಟ್ಟಿದರು. ಹಾಗೆ ಬಂಡಾಯವೆದ್ದು ಊರು ಕಟ್ಟಿದ ಹೆಣ್ಣು ಮಕ್ಕಳ ಸಂಖ್ಯೆ ಆಗ 20ನ್ನೂ ದಾಟಿರಲಿಲ್ಲ.
ಮಣ್ಣು, ಸಗಣಿಯ ಬೆರಣಿ, ಮರಗಳಿಂದಲೇ ಕಟ್ಟಿರುವ ಮನೆಗಳಲ್ಲಿ ಬದುಕುತ್ತಿರುವ ಈ ಹೆಂಗಸರಿಗೆ ಬುಟ್ಟಿ ಮಾಡುವುದೇ ಕಾಯಕ. ಕರಕುಶಲ ಕೆಲಸಗಳಷ್ಟೇ ಗೊತ್ತು. ಅತ್ಯಾಚಾರಕ್ಕೊಳಗಾಗಿ ಗಂಡಂದಿರೇ ತ್ಯಜಿಸಿದ 20 ಹೆಣ್ಣು ಮಕ್ಕಳಿಂದ ಉದ್ಭವವಾದ ಈ ಊರಿನಲ್ಲೀಗ 250 ಮಹಿಳೆಯರಿದ್ದಾರೆ. ಈ ಊರಿಗೆ ಪ್ರವಾಸಿಗರು ಬರುತ್ತಾರೆ. ಆ ಪ್ರವಾಸಿಗರಲ್ಲಿ ಗಂಡಸರೂ ಇರುತ್ತಾರೆ. ಆದರೆ ಹಾಗೆ ಬಂದ ಗಂಡಸರು ಸಂಜೆಯೊಳಗೆ ಊರು ಖಾಲಿ ಮಾಡಬೇಕು. ಹೆಣ್ಣು ಮಕ್ಕಳು ಮಾತ್ರವೇ ಇಲ್ಲಿ ಉಳಿದುಕೊಳ್ಳಬಹುದು.
ಗಂಡಸರು ಬರಲ್ಲ. ಊರಲ್ಲಿ ಇರಲ್ಲ. ಹಾಗಾದರೆ ಈ ಊರಿನಲ್ಲಿ ಜನಸಂಖ್ಯೆ ಬೆಳೆದಿದ್ದು ಹೇಗೆ? ಆ ಪ್ರಶ್ನೆಗೆ ಉತ್ತರ ಅವರ ವರ್ತನೆಯಲ್ಲೇ ಇದೆ. ಆ ಊರಿಗೆ ಮದುವೆ ಧಿಕ್ಕರಿಸಿದ ಹುಡುಗಿಯರು, ಅತ್ಯಾಚಾರಕ್ಕೊಳಗಾದವರು ಬರಬಹುದು. ಗಂಡನಿಂದ ದೌರ್ಜನ್ಯಕ್ಕೊಳಗಾದವರೂ ಬರಬಹುದು. ಅವರಿಗೆ ಈ ಊರಿನಲ್ಲಿ ರಕ್ಷಣೆ ಇದೆ.
ಅಲ್ಲೇ ಹುಟ್ಟಿ ಬೆಳೆಯುವ ಹೆಣ್ಣು ಮಕ್ಕಳೂ ಪ್ರೇಮಿಸಬಹುದು. ಆದರೆ ಮದುವೆಯಾಗುವುದಿಲ್ಲ. ಇಷ್ಟ ಬಂದವರ ಜೊತೆ ಊರಿನ ಹೊರಗೆ ಸಂಬಂಧ ಇಟ್ಟುಕೊಂಡು ಗರ್ಭ ಧರಿಸಿದ ತಕ್ಷಣ ವಾಪಸ್ ಬರುವ ಹೆಣ್ಣು ಮಕ್ಕಳೂ ಇಲ್ಲಿದ್ದಾರೆ. ಈ ಊರಿನಲ್ಲೇ ಇದ್ದಾರೆ. ಇವರ ಜೊತೆಗೆ ರೇಪ್ ಆಗಿ ಬರುವ ಹೆಣ್ಣು ಮಕ್ಕಳಿಂದ ಹುಟ್ಟಿರುವ ಮಕ್ಕಳು ಇಲ್ಲಿನ ಜನಸಂಖ್ಯೆ ಹೆಚ್ಚಿಸಿದ್ದಾರೆ.
ಹಾಗಾದರೆ ಇಂತಹವರಿಗೆ ಗಂಡು ಮಕ್ಕಳು ಹುಟ್ಟಿದರೆ ಏನು ಕಥೆ ಎನ್ನುತ್ತೀರ. ಸಮಸ್ಯೆಯೇನೂ ಇಲ್ಲ. ಆ ಊರಿನಲ್ಲಿಯೇ ಜನ್ಮ ಪಡೆದ ಗಂಡು ಮಕ್ಕಳು ಆ ಊರಿನಲ್ಲಿ ರಾತ್ರಿ ಹೊತ್ತು ಮಲಗಬಹುದು.