ಕಾಂತಾರ ರಾಕ್ಸ್.. ಬಾಲಿವುಡ್ ಶಾಕ್ : ಮತ್ತೊಮ್ಮೆ ಮಕಾಡೆ ಬಿದ್ದ ಸ್ಟಾರ್ ಚಿತ್ರಗಳು

ಹಿಂದಿ ಚಿತ್ರರಂಗಕ್ಕೆ ಮತ್ತೆ ಮತ್ತೆ ಶಾಕ್ ಟ್ರೀಟ್‍ಮೆಂಟ್ ಸಿಗುತ್ತಿದೆ. ಈ ಬಾರಿಯೂ ಕೂಡಾ. ಈ ವಾರ ಎರಡು ಚಿತ್ರಗಳು ರಿಲೀಸ್ ಆಗಿದ್ದವು. ಅಕ್ಷಯ್ ಕುಮಾರ್ ಅಭಿನಯದ ರಾಮ್‍ಸೇತು ಹಾಗೂ ಅಜಯ್ ದೇವಗನ್ ಅಭಿನಯದ ಥ್ಯಾಂಕ್ ಗಾಡ್. ಎರಡೂ ಚಿತ್ರಗಳಲ್ಲಿ ದೇವರು ಧರ್ಮದ ಕಥೆಯಿತ್ತು. ಆದರೆ ಎರಡೂ ಚಿತ್ರಗಳು ಫೇಲ್ ಆಗಿವೆ.
ಥ್ಯಾಂಕ್ ಗಾಡ್ ಚಿತ್ರದಲ್ಲಿ ಸಾಲದ ಸುಳಿಗೆ ಸಿಕ್ಕ ಉದ್ಯಮಿಯೊಬ್ಬ ಅಪಘಾತದಲ್ಲಿ ಸತ್ತು ಹೋಗುತ್ತಾನೆ. ಸ್ವರ್ಗದಲ್ಲಿ ಚಿತ್ರಗುಪ್ತ ನಾಯಕನಿಗೆ ಇನ್ನೊಂದು ಜೀವನ ಕೊಡುತ್ತೇನೆ. ನನ್ನೊಂದಿಗೆ ಸವಾಲು ಗೆದ್ದರೆ ಮತ್ತೆ ಭೂಮಿಗೆ ವಾಪಸ್. ಇಲ್ಲದೆ ಹೋದರೆ ನರಕ ಫಿಕ್ಸ್ ಎನ್ನುತ್ತಾನೆ. ಚಿತ್ರಗುಪ್ತನಾಗಿ ಅಜಯ್ ದೇವಗನ್ ನಟಿಸಿದ್ದರು. ಸಿದ್ದಾರ್ಥ ಮಲ್ಹೋತ್ರಾ, ರಾಕುಲ್ ಪ್ರೀತ್‍ಸಿಂಗ್ ಹೀರೋ-ಹೀರೋಯಿನ್. ಇತ್ತೀಚೆಗೆ ಭರ್ಜರಿ ಟ್ರೆಂಡ್ ಆಗಿದ್ದ ಮನಿಕೆ ಮನಹಿತಾ.. ಹಾಡನ್ನ ಈ ಚಿತ್ರದಲ್ಲಿ ಬಳಸಿಕೊಳ್ಳಲಾಗಿತ್ತು. ಆದರೆ ಚಿತ್ರ ಪ್ರೇಕ್ಷಕರ ಹೃದಯ ತಲುಪಲು ವಿಫಲವಾಗಿದೆ.
ರಾಮ್‍ಸೇತು ಕೂಡಾ ಅಷ್ಟೆ. ಚಿತ್ರದ ಕ್ಯಾನ್ವಾಸ್ ಸಖತ್ತಾಗಿಯೇ ಇತ್ತು. ರಾಮ್‍ಸೇತು ಪ್ರಕೃತಿ ನಿರ್ಮಿತವೋ.. ಮನುಷ್ಯ ನಿರ್ಮಿತವೋ.. ಎಂದು ಸಂಶೋಧಕನೊಬ್ಬ ಹುಡುಕಲು ಹೊರಡುವ ಕಥೆ. ಅಕ್ಷಯ್ ಕುಮಾರ್ ನಟನೆ, ಕಥೆ ಚೆನ್ನಾಗಿದ್ದರೂ ಅವುಗಳನ್ನು ಟೋಟಲ್ ಆಗಿ ಜೋಡಿಸುವುದರಲ್ಲಿ ನಿರ್ದೇಶಕರು ಸೋತಿದ್ದಾರೆ. ಕಾನ್ಸೆಪ್ಟ್ ಅದ್ಧೂರಿಯಾಗಿದ್ದರೂ ಚಿತ್ರವನ್ನು ಪೇಲವವಾಗಿ ಚಿತ್ರಿಸಲಾಗಿದೆ. ಬೋರ್ ಹೊಡೆಸುತ್ತಿದೆ ಎಂದು ಪ್ರೇಕ್ಷಕರು ಎದ್ದು ನಡೆದಿದ್ದಾರೆ.
ಆದರೆ ಈ ಮಧ್ಯೆ ರಾಕಿಂಗ್ ಆಗಿರುವುದು ರಾಕೆಟ್ ವೇಗದಲ್ಲಿ ಓಡುತ್ತಿರುವುದು ಕನ್ನಡದ ಕಾಂತಾರ. ಹಿಂದಿಗೆ ಡಬ್ ಆಗಿ ರಿಲೀಸ್ ಆಗಿದ್ದ ಸಿನಿಮಾ ಆರಂಭದಲ್ಲಿ ಆವರೇಜ್ ಎನ್ನುವ ಓಪನಿಂಗ್ ಪಡೆದುಕೊಂಡಿತು. ಆದರೆ ಡಬ್ಬಿಂಗ್ ಚಿತ್ರಕ್ಕೆ ಅದು ಅದ್ಧೂರಿ ಓಪನಿಂಗ್ ಎನ್ನುವುದಂತೂ ಸತ್ಯ. ಈಗ 2ನೇ ವಾರಕ್ಕೆ ಕಾಲಿಟ್ಟಿದ್ದು ಚಿತ್ರದ ಕಲೆಕ್ಷನ್ 25 ಕೋಟಿ ದಾಟಿದೆ. ಟಿಕೆಟ್ ದರವೂ ಕಡಿಮೆಯಿದ್ದು ಕನ್ನಡದಲ್ಲಿ ಆದಂತೆಯೇ ಅಲ್ಲಿಯೂ ಚಿತ್ರ ನೋಡಿದವರೇ ಚಿತ್ರವನ್ನು ಪ್ರಚಾರ ಮಾಡುತ್ತಿದ್ದಾರೆ.