ಆಕೆ ಶಿಕಾರಿಪುರದ ಒಂದು ಹಳ್ಳಿಯ ವಿದ್ಯಾರ್ಥಿನಿ. ಪ್ರತಿಭಾವಂತೆ. ನೀಟ್ ಪರೀಕ್ಷೆ ಬರೆಯಬೇಕು. ಮೆಡಿಕಲ್ ಓದುವ ಕನಸು ಕಂಡಿದ್ದ ಆಕೆಗೆ ವಾಹನಗಳ ವ್ಯವಸ್ಥೆಯೂ ಇಲ್ಲ. ಅದು ಕೊರೊನಾ ಪೀಕ್ ಇದ್ದ ಸಮಯ. ಆ ಸಮಯದಲ್ಲಿ ಪ್ರದೀಪ್ ಈಶ್ವರ್ ಆಕೆಯ ಪರಿಸ್ಥಿತಿಯ ಬಗ್ಗೆ ಟ್ವೀಟ್ ಮಾಡುತ್ತಾರೆ. ಅದನ್ನು ಖುದ್ದು ವಿಶ್ವೇಶ್ವರ್ ಭಟ್ ಗಮನಕ್ಕೆ ಬರುತ್ತದೆ. ಅದು ಆಗ ಮುಖ್ಯಮಂತ್ರಿಗಳಾಗಿದ್ದ ಯಡಿಯೂರಪ್ಪನವರಿಗೆ ಗೊತ್ತಾಗುತ್ತದೆ. ಶಿವಮೊಗ್ಗದ ಶಿಕಾರಿಪುರದಿಂದ ಬೆಂಗಳೂರಿಗೆ ಬಂದು ಪರೀಕ್ಷೆ ಬರೆಯಬೇಕು.
ವ್ಯವಸ್ಥೆಯಾಗಬೇಕು..? ಹೇಗೆ.. ಪ್ರದೀಪ್ ಈಶ್ವರ್, ವಿಶ್ವೇಶ್ವರ ಭಟ್ ಜೊತೆ ಸಿಎಂ ಯಡಿಯೂರಪ್ಪ, ಆರೋಗ್ಯ ಸಚಿವ ಸುಧಾಕರ್ ಕೈಜೋಡಿಸುತ್ತಾರೆ. 350 ಕಿ.ಮೀ. ದೂರ ಪ್ರಯಾಣ ಮಾಡುವ ವಿದ್ಯಾರ್ಥಿನಿ, ಬೆಂಗಳೂರಿಗೆ ಅವಧಿಗೆ ಸರಿಯಾಗಿ ತಲುಪಿ ಪರೀಕ್ಷೆ ಬರೆಯುತ್ತಾಳೆ. ಪಾಸ್ ಕೂಡಾ ಆಗುತ್ತಾಳೆ. ಇದೀಗ ಆಕೆ ಸೆಕೆಂಡ್ ಇಯರ್ ಎಂಬಿಬಿಎಸ್ ಸ್ಟೂಡೆಂಟ್. ಈ ನೈಜ ಕಥೆಯೇ ತನುಜಾ ಸಿನಿಮಾ ಕಥೆ.
ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆ ಕಾಸರಗೋಡು ಚಿತ್ರದಲ್ಲಿ ಮಿಡ್ಲ್ ಸ್ಕೂಲ್ ಓದುವ ಮುದ್ದು ಮುದ್ದು ಮುಖದ ಪುಟ್ಟ ಹುಡುಗಿ ಪಲ್ಲವಿಯಾಗಿ ರಂಜಿಸಿದ್ದ ಸಪ್ತ ಪಾವೂರ್ ತನುಜಾ ಆಗಿ ಕಾಣಿಸಿಕೊಂಡಿದ್ದಾರೆ. ಪಿಸಿಎಂಬಿ ಓದುತ್ತಿರುವ ಸಪ್ತ ಪಾವೂರ್ ಕಾಲೇಜಿನ ನಡು ನಡುವೆ ಸಿನಿಮಾಗಳನ್ನೂ ಮಾಡುತ್ತಿದ್ದಾರೆ. ಹಾಗೆಯೇ ಬಿಡುವಿನಲ್ಲಿ ನಟಿಸಿರುವ ಚಿತ್ರ ತನುಜಾ. ಕಳೆದ ವರ್ಷ ಶಿವಣ್ಣ ಜೊತೆಗೆ ಬೈರಾಗಿ ಚಿತ್ರದಲ್ಲಿಯೂ ನಟಿಸಿದ್ದ ಸಪ್ತ ಅವರಿಗೆ ಆಫರ್`ಗಳಿಗೇನೂ ಕೊರತೆಯಿಲ್ಲ.
ನಿರ್ದೇಶಕ ಎಂ.ಡಿ.ಹಳ್ಳಿ ಅವರು ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆ ಕಾಸರಗೋಡು ನೋಡಿಯೇ ಈ ಪಾತ್ರಕ್ಕೆ ನನ್ನನ್ನು ಆಯ್ಕೆ ಮಾಡಿದರು. ನಾನೂ ಕೂಡಾ ಸ್ಟೂಡೆಂಟ್. ಹೀಗಾಗಿ ಕಥೆ ಇಷ್ಟವಾಯಿತು. ಸಿನಿಮಾಗೆ ಒಪ್ಪಿಕೊಂಡೆ ಎನ್ನುವ ಸಪ್ತಾ, ಪಾತ್ರಕ್ಕಾಗಿ ರಿಯಲ್ ವಿದ್ಯಾರ್ಥಿನಿಯ ಬಗ್ಗೆ ಎಲ್ಲ ಮಾಹಿತಿ ಸಂಗ್ರಹಿಸಿದ್ದಾರೆ. ರಿಯಲ್ ತನುಜಾ ಈ ಮೆಡಿಕಲ್ 2ನೇ ವರ್ಷದಲ್ಲಿದ್ದು, ಭೇಟಿ ಸಾಧ್ಯವಾಗಿಲ್ಲ. ಅವರ ತಾಯಿಯನ್ನು ಭೇಟಿ ಮಾಡಿ ಮಾಹಿತಿ ಸಂಗ್ರಹಿಸಿದ್ದಾರೆ.
ತನುಜಾ ಸಿನಿಮಾದಲ್ಲಿ ಆಗ ಸಿಎಂ ಆಗಿದ್ದ ಯಡಿಯೂರಪ್ಪ, ಆರೋಗ್ಯ ಸಚಿವ ಸುಧಾಕರ್, ವಿಶ್ವವಾಣಿ ಸಂಪಾದಕ ವಿಶ್ವೇಶ್ವರ್ ಭಟ್ ಎಲ್ಲರೂ ನಟಿಸಿದ್ದಾರೆ. ತಾವು ರಿಯಲ್ ಆಗಿ ಮಾಡಿದ್ದನ್ನೇ ನಟಿಸುವುದು ಕೂಡಾ ಒಂದು ಸವಾಲು. ತನುಜಾ ಚಿತ್ರ ಇದೇ ಫೆಬ್ರವರಿ 3ರಂದು ರಿಲೀಸ್ ಆಗುತ್ತಿದೆ.
