ಒಲವೆ ಜೀವನ ಸಾಕ್ಷಾತ್ಕಾರ..
ಒಲವೇ ಮರೆಯದ ಮಮಕಾರ..
ಒಲವೇ… ಮರೆಯದ ಮಮಕಾರ..
ಈ ಹಾಡಿನೊಂದಿಗೇ ಕನ್ನಡ ಚಿತ್ರ ರಸಿಕರ ಹೃದಯದಲ್ಲಿ ಶಾಶ್ವತವಾಗಿ ನೆಲೆಯೂರಿದ್ದ ನಟಿ ಜಮುನಾ ಇನ್ನಿಲ್ಲ. ಕನ್ನಡ, ತೆಲುಗು ಸೇರಿದಂತೆ ಹಲವು ಭಾಷೆಗಳಲ್ಲಿ ನೂರಾರು ಚಿತ್ರಗಳಲ್ಲಿ ನಟಿಸಿದ್ದ ಹಿರಿಯ ನಟಿ ಜಮುನಾ ಇಂದು ಬೆಳಗ್ಗೆ ನಿಧನರಾಗಿದ್ದಾರೆ. 86 ವರ್ಷ ವಯಸ್ಸಿನ ಜಮುನಾ ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದರು. ಹೈದರಾಬಾದ್ನಲ್ಲಿರುವ ನಿವಾಸದಲ್ಲಿ ಕೊನೆಯುಸಿರೆಳೆದಿದ್ದಾರೆ.
ಜಮುನಾ ಅವರ ಹುಟ್ಟೂರು ಹಂಪಿ. 1936 ಆಗಸ್ಟ್ 30 ರಂದು ಜನಿಸಿದ್ದ ಜಮುನಾ ಕನ್ನಡಕ್ಕಿಂತ ಹೆಚ್ಚಾಗಿ ತೆಲುಗು, ತಮಿಳಿನಲ್ಲಿಯೇ ಖ್ಯಾತಿ ಗಳಿಸಿದ್ದರು. ಹಿಂದಿಯಲ್ಲೂ ನಟಿಸಿದ್ದ ಜಮುನಾ ಕಾಂಗ್ರೆಸ್ ಪಕ್ಷದಿಂದ ಸಂಸದೆಯೂ ಆಗಿದ್ದವರು. ವಾಜಪೇಯಿ ಅವಧಿಯಲ್ಲಿ ಬಿಜೆಪಿ ಸೇರಿದ್ದರು.
ಸಾಕ್ಷಾತ್ಕಾರ. ಡಾ.ರಾಜ್, ಪುಟ್ಟಣ್ಣ ಕಣಗಾಲ್ ವೃತ್ತಿಜೀವನದ ಮಾಸ್ಟರ್ ಪೀಸ್. ಸಾಕ್ಷಾತ್ಕಾರ ಚಿತ್ರದ ಒಲವೇ ಜೀವನ ಸಾಕ್ಷಾತ್ಕಾರ..
ಜನ್ಮ ಜನ್ಮದ ಅನುಬಂಧ..ಹೃದಯ ಹೃದಯಗಳ ಪ್ರೇಮಾನುಬಂಧ
ಫಲಿಸಿತು ಒಲವಿನ ಪೂಜಾಫಲ.. ನನಗಿಂದು ಕೂಡಿ ಬಂತು ಕಂಕಣ ಬಲ
ಕಾದಿರುವಳೋ ಶಬರಿ..ರಾಧೆ.. ಬೃಂದಾವನದ ಅಂಗಳದಲ್ಲಿ..
ಹಾಡುಗಳು ಇವತ್ತಿಗೂ ಅಭಿಮಾನಿಗಳ ಹೃದಯದಲ್ಲಿವೆ. ಪೃಥ್ವಿರಾಜ್ ಕಪೂರ್ ಅಭಿನಯಿಸಿದ್ದ ಏಕೈಕ ಕನ್ನಡ ಚಿತ್ರ ಸಾಕ್ಷಾತ್ಕಾರ. ಜಾತಕದ ಬಗ್ಗೆ ಇರುವ ಮೂಢನಂಬಿಕೆಗಳನ್ನು ಜನ ಹೇಗೆಲ್ಲ ದುರ್ಬಳಕೆ ಮಾಡಿಕೊಳ್ಳುತ್ತಾರೆ ಎಂಬುದನ್ನು ಮನೋಜ್ಞವಾಗಿ ಚಿತ್ರಿಸಿದ್ದ ಸಿನಿಮಾ ಸಾಕ್ಷಾತ್ಕಾರ.
ಸಾಕ್ಷಾತ್ಕಾರ, ಭೂಕೈಲಾಸ, ರತ್ನಗಿರಿ ರಹಸ್ಯ, ತೆನಾಲಿ ರಾಮಕೃಷ್ಣ, ಗುರು ಸಾರ್ವಭೌಮ ಶ್ರೀ ರಾಘವೇಂದ್ರ ಕರುಣೆ, ಆದರ್ಶ ಸತಿ ಅವರು ನಟಿಸಿದ್ದ ಕೆಲವು ಚಿತ್ರಗಳು. ಪೊಲೀಸ್ ಮತ್ತು ದಾದಾ ಅವರು ನಟಿಸಿದ್ದ ಕಡೆಯ ಕನ್ನಡ ಸಿನಿಮಾ. ಒಟ್ಟು 198 ಚಿತ್ರಗಳಲ್ಲಿ ನಟಿಸಿದ್ದರು. ಕನ್ನಡದಲ್ಲಿ ಡಾ.ರಾಜ್, ಅನಂತನಾಗ್, ತೆಲುಗಿನಲ್ಲಿ ಎನ್ಟಿಆರ್, ಅಕ್ಕಿನೇನಿ ನಾಗೇಶ್ವರರಾವ್, ರಂಗರಾವ್, ತಮಿಳಿನಲ್ಲಿ ಎಂಜಿಆರ್, ಶಿವಾಜಿ ಗಣೇಶನ್ ಸೇರಿದಂತೆ ಖ್ಯಾತನಾಮರೊಂದಿಗೆ ನಟಿಸಿದ್ದರು.
1952ರಲ್ಲಿ ತೆಲುಗಿನ ಪುಟ್ಟಿಲು ಸಿನಿಮಾ ಅವರ ಮೊದಲ ಸಿನಿಮಾ. 1954ರಲ್ಲಿ ತೆರೆ ಕಂಡ ಆದರ್ಶ ಸತಿ ಕನ್ಡನದಲ್ಲಿ ಮೊದಲ ಸಿನಿಮಾ. ಜಮುನಾ ಅವರು 1965ರಲ್ಲಿ ಪ್ರೊಫೆಸರ್ ಜುಲುರಿ ರಮಣ ರಾವ್ ಅವರನ್ನು ಮದುವೆ ಆಗಿದ್ದರು. 2014ರಲ್ಲಿ ಪತಿ ಮೃತಪಟ್ಟ ನಂತರ ಮಕ್ಕಳ ಜೊತೆ ನೆಲೆಸಿದ್ದರು.
