ಕನ್ನಡದ ಸೆಂಚುರಿ ಸ್ಟಾರ್ ಮತ್ತು ದ.ಭಾರತದ ಸೂಪರ್ ಸ್ಟಾರ್ ರಜನಿಕಾಂತ್ ಇಬ್ಬರೂ ಒಟ್ಟಿಗೇ ಜೈಲರ್ ಚಿತ್ರದಲ್ಲಿ ನಟಿಸುತ್ತಿರುವುದು ಗೊತ್ತಿರುವಂಥದ್ದೇ. ಆ ಮೂಲಕ ತಮಿಳಿಗೆ ಎಂಟ್ರಿ ಕೊಡುತ್ತಿರುವ ಶಿವಣ್ಣ, ರಜನಿ ಜೊತೆ ಸ್ಕ್ರೀನ್ ಶೇರ್ ಮಾಡುತ್ತಿದ್ದಾರೆ. 
ಜೈಲರ್ ಚಿತ್ರದ ಕೆಲವು ದೃಶ್ಯಗಳು ಕರ್ನಾಟಕದಲ್ಲಿ ನಡೆಯುತ್ತಿವೆ. ಎರಡು ದಿನಗಳ ಚಿತ್ರೀಕರಣಕ್ಕಾಗಿ ಈಗಾಗಲೇ ಶಿವಣ್ಣ ಮತ್ತು ರಜನಿ ಒಟ್ಟಿಗೇ ಸೇರಿದ್ದಾರೆ. ಶೂಟಿಂಗ್ ಮಧ್ಯೆಯೂ ಅವರು ಮಂಗಳೂರಿನ ಪ್ರಮುಖ ದೇವಸ್ಥಾನಕ್ಕೆ ತೆರಳಿ ಪೂಜೆ ಸಲ್ಲಿಸಲಿದ್ದಾರೆ. ರಜನಿ ತಮ್ಮ ಚಿತ್ರಗಳಲ್ಲಿ ಕರ್ನಾಟಕದ ಅದರಲ್ಲೂ ವಿಶೇಷವಾಗಿ ಮೈಸೂರಿನ ಒಂದಾದರೂ ದೃಶ್ಯ ಇರಬೇಕು ಎಂದು ಬಯಸುತ್ತಾರೆ. ಹೀಗಾಗಿಯೇ ಈಗಾಗಲೇ ಮೈಸೂರಿನ ಚಿತ್ರೀಕರಣ ಮುಗಿಸಿದ್ದು, ಇದೀಗ ಮಂಗಳೂರಿನಲ್ಲಿ ಜೈಲರ್ ತಂಡ ಬೀಡುಬಿಟ್ಟಿದೆ. ಭದ್ರತೆಯ ದೃಷ್ಟಿಯಿಂದ ಚಿತ್ರತಂಡ ಯಾವುದೇ ಮಾಹಿತಿಯನ್ನು ಹಂಚಿಕೊಂಡಿಲ್ಲ.
ಖಳನಾಯಕರಾಗಿದ್ದಾರಾ ಶಿವಣ್ಣ?
ಜೈಲರ್ ಚಿತ್ರದಲ್ಲಿ ಶಿವಣ್ಣ ಮತ್ತು ರಜನಿಕಾಂತ್ ಪಾತ್ರವೇನು ಎಂಬ ಬಗ್ಗೆ ಖಚಿತ ಮಾಹಿತಿ ಸಿಕ್ಕಿಲ್ಲ. ಚಿಕ್ಕ ಪಾತ್ರವಾದರೂ ಪ್ರಮುಖ ಪಾತ್ರ ಎಂದಷ್ಟೇ ಶಿವಣ್ಣ ಹೇಳಿದ್ದಾರೆ. ಆದರೆ ಗಾಂಧಿನಗರದ ಮೂಲಗಳು ಶಿವಣ್ಣ ವಿಲನ್ ಆಗಿದ್ದಾರೆ ಎನ್ನುತ್ತಿವೆ. ಇದೇ ಮೊದಲ ಬಾರಿ ಇಬ್ಬರೂ ಒಟ್ಟಿಗೇ ನಟಿಸುತ್ತಿದ್ದು, ಶಿವಣ್ಣ ವಿಲನ್ ಆಗಲು ಒಪ್ಪಿಕೊಂಡಿದ್ದಾರೆಯೇ ಎಂಬ ಕುತೂಹಲವಿದೆ. ಮುತ್ತಣ್ಣ ಚಿತ್ರದ ಒಂದು ಪಾತ್ರ, ಓಂನ ಸತ್ಯ… 
ಹೀಗೆ ಕೆಲವೇ ಕೆಲವು ಚಿತ್ರಗಳಲ್ಲಿ ಶಿವಣ್ಣ ವಿಲನ್ ಶೇಡ್ ಚಿತ್ರಗಳಲ್ಲಿ ನಟಿಸಿದ್ದರೂ, ಅವೂ ಕೂಡಾ ಸಂಪೂರ್ಣ ವಿಲನ್ ಪಾತ್ರಗಳಲ್ಲ. ಫೈನಲಿ ಒಳ್ಳೆಯನಾಗುವ ಪಾತ್ರಗಳೇ. ಹೀಗಿರುವಾಗ ವಿಲನ್ ಪಾತ್ರಕ್ಕಾಗಿ ಶಿವಣ್ಣ ತಮಿಳಿಗೆ ಹೋಗಬೇಕಿತ್ತಾ ಎಂಬುದು ಕೆಲ ಅಭಿಮಾನಿಗಳ ಪ್ರಶ್ನೆ. ಆದರೆ, ರಜನಿ ಜೊತೆ ನಟಿಸುವ ಅವಕಾಶ ಸಿಕ್ಕರೆ ಸಾಕು, ಹೇಗಿದ್ದರೂ ಮಾಡುತ್ತೇವೆ ಎನ್ನುವ ಕಲಾವಿದರ ಲಿಸ್ಟಿನಲ್ಲಿ ಶಿವಣ್ಣ ಕೂಡಾ ಇದ್ಧಾರೆ. ಅದನ್ನು ಮರೆಯುವಂತಿಲ್ಲ. ಹೀಗಾಗಿಯೇ ಕುತೂಹಲವಿದೆ. ಈ ಚಿತ್ರದಲ್ಲಿ ರಜನಿಗೆ ತಮನ್ನಾ ಹೀರೋಯಿನ್. ಬೀಸ್ಟ್ ಚಿತ್ರ ಮಾಡಿದ್ದ ದಿಲೀಪ್ ಡೈರೆಕ್ಷನ್ ಇದೆ.
ಮತ್ತೆ ಕನ್ನಡಕ್ಕೆ ರಜನಿ : ಅಷ್ಟೇ ಅಲ್ಲ, ಈ ನಡುವೆ ರಜನಿಕಾಂತ್ ಕನ್ನಡ ಚಿತ್ರದಲ್ಲಿ ನಟಿಸುವ ಬಗ್ಗೆಯೂ ಸುದ್ದಿಯಾಗಿದೆ. ಕಥಾಸಂಗಮ, ಸಹೋದರರ ಸವಾಲ್, ಕಿಲಾಡಿ ಕಿಟ್ಟು, ಮಾತು ತಪ್ಪದ ಮಗ, ತಪ್ಪಿದ ತಾಳ, ಗಲಾಟೆ ಸಂಸಾರ, ಒಂದು ಪ್ರೇಮದ ಕಥೆ, ಕುಂಕುಮ ರಕ್ಷೆ, ಬಾಳು ಜೇನು ಚಿತ್ರಗಳಲ್ಲಿ ನಟಿಸಿದ್ದಾರೆ. 1981ರಲ್ಲಿ ರಜನಿಕಾಂತ್ ಗರ್ಜನೆ ಎಂಬ ಚಿತ್ರದಲ್ಲಿ ನಟಿಸಿದ್ದರು. ಅದಾದ ನಂತರ ಕನ್ನಡದ ಸಿನಿಮಾಗಳಲ್ಲಿ ರಜನಿ ನಟಿಸಿಯೇ ಇಲ್ಲ. ಇದೀಗ ಹೊಂಬಾಳೆಯವರ ಜೊತೆ ರಜನಿಕಾಂತ್ ಮಾತುಕತೆ ನಡೆಸಿದ್ದಾರೆ ಎಂಬ ಸುದ್ದಿ ಹಬ್ಬಿದ್ದು, ರಜನಿಕಾಂತ್ ರಾಜ್ಯಕ್ಕೆ ಬಂದಿರುವ ಸಮಯದಲ್ಲಿಯೇ ಈ ಮಾತುಕತೆಯೂ ಫೈನಲ್ ಆಗಲಿದೆ ಎನ್ನಲಾಗುತ್ತಿದೆ. ಆದರೆ ಈ ಬಗ್ಗೆ ಅಧಿಕೃತ ಮಾಹಿತಿ ಇಲ್ಲ.
