ರಿಷಬ್ ಶೆಟ್ಟಿಗೆ ಸಿಕ್ಕ ಫಾಲ್ಕೆ ಡಾ.ರಾಜ್`ಗೆ ಸಿಕ್ಕ ಫಾಲ್ಕೆ ಅಲ್ಲ..!

ರಿಷಬ್ ಶೆಟ್ಟಿ ಕನ್ನಡದ ಭರವಸೆಯ ನಟರಷ್ಟೇ ಅಲ್ಲ, ಭರವಸೆಯ ನಿರ್ದೇಶಕ, ನಿರ್ಮಾಪಕರು. ಕಾಂತಾರ, ಇತ್ತೀಚೆಗೆ ಇಡೀ ಇಂಡಿಯಾ ಗುರುತಿಸಿದ ಸಿನಿಮಾ ಅಷ್ಟೆ. ಅದಕ್ಕೂ ಮುನ್ನ ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆ, ರಿಕ್ಕಿ, ಕಿರಿಕ್ ಪಾರ್ಟಿ, ಬೆಲ್`ಬಾಟಂ, ಕಥಾ ಸಂಗಮ ಚಿತ್ರಗಳ ಮೂಲಕ ಬೇರೆಯದೇ ಜಾನರ್ ಸೃಷ್ಟಿಸಿಕೊಂಡಿದ್ದ ರಿಷಬ್ ಅವರು, ಇತ್ತೀಚೆಗೆ ಪ್ರಧಾನಿ ನರೇಂದ್ರ ಮೋದಿ ಭೇಟಿ ಮಾಡಿದ ಗಣ್ಯರಲ್ಲಿ ಒಬ್ಬರು.

ಅಂತಹ ರಿಷಬ್ ಶೆಟ್ಟಿ ಅವರಿಗೆ ಭರವಸೆಯ ನಟ ಎಂದು ದಾದಾ ಸಾಹೇಬ್ ಫಾಲ್ಕೆ ಚಲನಚಿತ್ರೋತ್ಸವದಲ್ಲಿ ಗುರುತಿಸಿ ಗೌರವಿಸಿ ಪುರಸ್ಕಾರ ನೀಡಲಾಗಿದೆ. ಈ ಪ್ರಶಸ್ತಿಯನ್ನು ಫೆಬ್ರವರಿ 20ರಂದು ಪ್ರದಾನ ಮಾಡಲಾಗುತ್ತಿದೆ. ರಿಷಬ್ ಶೆಟ್ಟಿಯವರಿಗೆ ಸಿಕ್ಕಿರುವ ಈ ದಾದಾ ಸಾಹೇಬ್ ಫಾಲ್ಕೆ ಚಲನಚಿತ್ರೋತ್ಸವ ಪ್ರಶಸ್ತಿಗೆ ಕೂಡಾ ಕಾರಣ ಕಾಂತಾರ. ಚಿತ್ರರಂಗದ ಮಂದಿಯಷ್ಟೇ ಅಲ್ಲ, ಹೊರಗಿನವರು ಕೂಡಾ ರಿಷಬ್ ಅವರಿಗೆ ಅಭಿನಂದನೆ ಸಲ್ಲಿಸುತ್ತಿದ್ದಾರೆ. ಕೆಲವರು ಕೊಂಕನ್ನೂ ತೆಗೆದಿದ್ದಾರೆ.

ರಿಷಬ್ ಶೆಟ್ಟಿಯವರಿಗೆ ಈ ಪ್ರಶಸ್ತಿ ಘೋಷಣೆಯೂ ಪ್ರಧಾನಿ ನರೇಂದ್ರ ಮೋದಿ ಅವರ ಜೊತೆಗಿನ ಭೇಟಿಯೂ ಏಕಕಾಲಕ್ಕೆ ನಡೆದಿದ್ದೇ ಇದಕ್ಕೆಲ್ಲ ಕಾರಣ. ದಾದಾ ಸಾಹೇಬ್ ಫಾಲ್ಕೆ ಚಲನಚಿತ್ರೋತ್ಸವ ಪ್ರಶಸ್ತಿ ಘೋಷಣೆಗೂ ಮೋದಿ ಭೇಟಿಗೂ ತಳುಕು ಹಾಕಿ ಕೆಲವರು ಮಾತನಾಡಿದ್ದೂ ಇದೆ. ಆದರೆ ವಾಸ್ತವ ಸಂಗತಿ ಏನು ಗೊತ್ತೇ?

ಈ ದಾದಾ ಸಾಹೇಬ್ ಫಾಲ್ಕೆ ಚಲನಚಿತ್ರೋತ್ಸವ ಪ್ರಶಸ್ತಿ, ಕೇಂದ್ರ ಸರ್ಕಾರ ಕೊಡುವ ಪ್ರಶಸ್ತಿ ಅಲ್ಲ. ದಾದಾ ಸಾಹೇಬ್ ಫಾಲ್ಕೆ ಹೆಸರಿನಲ್ಲಿ ಅನೇಕ ಪ್ರಶಸ್ತಿಗಳು ಬಂದಿವೆ. ಈ ಹಿಂದಿನ ವರ್ಷಗಳಲ್ಲಿ ದಾದಾ ಸಾಹೇಬ್ ಫಾಲ್ಕೆ ಹೆಸರಿನಲ್ಲಿ ಬೇರೆ ಬೇರೆ ಸಂಸ್ಥೆಗಳು ಪಾರ್ವತಮ್ಮ ರಾಜ್ಕುಮಾರ್, ಯಶ್, ಸುದೀಪ್, ರಕ್ಷಿತ್ ಶೆಟ್ಟಿ, ತಾನ್ಯಾ ಹೋಪ್, ನಿರ್ದೇಶಕ ರಮೇಶ್ ಇಂದಿರಾ, ಸಂಗೀತ ನಿರ್ದೇಶಕ ವಿ ಹರಿಕೃಷ್ಣ, ನಿರ್ದೇಶಕ ಪಿ ಶೇಷಾದ್ರಿ ಅವರಿಗೆ ಪ್ರಶಸ್ತಿಯನ್ನು ನೀಡಿದ್ದವು. ‘ರಾಕಿಂಗ್ ಸ್ಟಾರ್’ ಯಶ್ ಅವರಿಗೆ ದಾದಾ ಸಾಹೇಬ್ ಫಾಲ್ಕೆ ಫೌಂಡೇಶನ್ ಪ್ರಶಸ್ತಿ, ಪಾರ್ವತಮ್ಮ ರಾಜ್ಕುಮಾರ್ ಅವರಿಗೆ ದಾದಾ ಸಾಹೇಬ್ ಅಕಾಡೆಮಿ ಪ್ರಶಸ್ತಿ ಸಿಕ್ಕಿತ್ತು.

ಕೇಂದ್ರ ಸರ್ಕಾರ ನೀಡುವ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ಕನ್ನಡದಲ್ಲಿ, ಕನ್ನಡ ಚಿತ್ರರಂಗದಲ್ಲಿಯೇ ಮಾಡಿದ ಸಾಧನೆಗೆ ನೀಡುವ ಪ್ರಶಸ್ತಿ ಸಿಕ್ಕಿರುವುದು ಡಾ.ರಾಜ್ ಕುಮಾರ್ ಅವರಿಗೆ ಮಾತ್ರ. ಕನ್ನಡಿಗರೇ ಆಗಿದ್ದ ವಿ.ಕೆ.ಮೂರ್ತಿಯವರು ಈ ಪ್ರಶಸ್ತಿ ಪಡೆದಿದ್ದರೂ, ಬೆಂಗಳೂರಿನವರೇ ಆಗಿದ್ದರೂ ಕೆಲಸ ಮಾಡಿದ್ದೆಲ್ಲ ಬಾಲಿವುಡ್ ಚಿತ್ರಗಳಲ್ಲಿ. ಫಾಲ್ಕೆ ಪ್ರಶಸ್ತಿ ಪಡೆದ ಮೊದಲಿಗರಾದ ದೇವಿಕಾ ರಾಣಿ, ಕೊನೆಯ ದಿನಗಳನ್ನು ಬೆಂಗಳೂರಿನಲ್ಲಿ. ಆದರೆ ಸಾಧನೆಯ ಲಿಸ್ಟಿಗೆ ಬಂದರೆ ಈ ಪ್ರಶಸ್ತಿ ಪಡೆದ ಏಕೈಕ ಕನ್ನಡಿಗ ಡಾ.ರಾಜ್ ಕುಮಾರ್ ಮಾತ್ರ. 1995ರಲ್ಲಿ ಡಾ.ರಾಜ್ ಅವರಿಗೆ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ಬಂದಿತ್ತು.

ಅಂದಹಾಗೆ ಟೀಕೆ ಮಾಡುತ್ತಿರುವವರಲ್ಲಿ ಕೆಲವು ಸೆಲಬ್ರಿಟಿಗಳೂ ಇದ್ದಾರೆ. ಸಿನಿಮಾ ಪತ್ರಕರ್ತರೂ ಇದ್ದಾರೆ. ಬುದ್ದಿಜೀವಿಗಳೆನ್ನಿಸಿಕೊಂಡವರೂ ಇದ್ದಾರೆ. ರಾಹುಲ್ ಗಾಂಧಿ ಬಗ್ಗೆ ನೋ ಕಮೆಂಟ್ಸ್ ಎಂದು ಹೇಳಿದಾಗಿನಿಂದ ಶುರುವಾಗಿರುವ ಹೆಚ್ಚುವರಿ ಪ್ರೀತಿಯ ಫಲಿತಾಂಶ ಇದು. ಅಷ್ಟೆ.