ಧನುಷ್. 40 ವರ್ಷದ ಧನುಷ್ ತಮಿಳು ಚಿತ್ರರಂಗದಲ್ಲಿ ಸ್ಟಾರ್ ಹೀರೋ. ಹಿಂದಿಯಲ್ಲೂ ನಟಿಸಿರುವ ಧನುಷ್, ನಿರ್ದೇಶಕರಾಗಿಯೂ ಗೆದ್ದವರು. ಮೊದಮೊದಲು ಒಂದು ಲೆವೆಲ್ಲಿನ ಹಸಿಬಿಸಿ ಚಿತ್ರಗಳಿಂದಲೇ ಗೆದ್ದ ಧನುಷ್, ಇತ್ತೀಚೆಗೆ ಅಸುರನ್, ಕರ್ಣನ್, ವಾತಿ.. ಮೊದಲಾದ ಚಿತ್ರಗಳ ಮೂಲಕ ಬೇರೆಯದೇ ಸ್ಟಾರ್ ಗಿರಿ ಬೆಳೆಸಿಕೊಂಡಿದ್ದಾರೆ. ಇದರ ನಡುವೆ ರಜನಿಕಾಂತ್ ಅಳಿಯನೂ ಆಗಿದ್ದ ಧನುಷ್, ಈಗ ಮಾಜಿ ಅಳಿಯನಾಗಿದ್ದಾರೆ. ವಯಸ್ಸು 40.
ನಟಿ ಮೀನಾ. ಹಿರಿಯ ನಟಿ. ಸ್ಟಾರ್ ನಟಿ. ವಯಸ್ಸು 46 ಆಗಿದ್ದರೂ ಸೌಂದರ್ಯ ಮಾತ್ರ ಮಾಸಿಲ್ಲ. ದಕ್ಷಿಣ ಭಾರತದ ಬಹುತೇಕ ಸ್ಟಾರ್ ನಟರ ಜೊತೆ ನಟಿಸಿರುವ ಮೀನಾ ಪುಟ್ನಂಜ ಚಿತ್ರದ ಕನ್ನಡದಲ್ಲಿ ಮನೆ ಮನೆ ಮಾತಾದವರು. ದಶಕಗಳ ಕಾಲ ದಕ್ಷಿಣ ಭಾರತದ ಸ್ಟಾರ್ ನಟಿಯಾಗಿದ್ದ ಮೀನಾ, 2000ರಲ್ಲಿ ಬೆಂಗಳೂರಿನವರೇ ಆಗಿದ್ದ ವಿದ್ಯಾಸಾಗರ್ ಅವರನ್ನು ಮದುವೆಯಾಗಿದ್ದರು. ಸಾಫ್ಟ್‍ವೇರ್ ಉದ್ಯಮಿಯಾಗಿದ್ದ ವಿದ್ಯಾಸಾಗರ್ ಇತ್ತೀಚೆಗೆ ಅನಾರೋಗ್ಯದಿಂದ ನಿಧನರಾಗಿದ್ದಾರೆ. ಒಬ್ಬ ಮಗಳೂ ಇದ್ದಾಳೆ. ತೇರಿ ಚಿತ್ರದಲ್ಲಿ ನಟಿಸಿರುವ ಪುಟ್ಟ ಬಾಲಕಿಯೇ ಮೀನಾ ಮಗಳು.
ಈಗ ಇವರಿಬ್ಬರೂ ಮದುವೆಯಾಗಲಿದ್ದಾರೆ ಎಂಬ ಸುದ್ದಿ ಹೊರಬಿದ್ದಿರುವುದು ತಮಿಳು ಚಿತ್ರರಂಗದಿಂದಲೆ. ಬೈಲ್ವಾನ್ ರಂಗನಾಥನ್ ಎಂಬ ನಟ ಇವರಿಬ್ಬರೂ ಶೀಘ್ರದಲ್ಲೇ ಮದುವೆಯಾಗಲಿದ್ದಾರೆ ಎಂಬ ಸುದ್ದಿ ಹರಿಬಿಟ್ಟಿದ್ದಾನೆ.
ನಟಿ ಮೀನಾ ಹಾಗೂ ಧನುಷ್ ಮದುವೆಯಾಗಲಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಇದೇ ವರ್ಷದ ಜುಲೈ ತಿಂಗಳಿನಲ್ಲಿ ಧನುಷ್ – ಮೀನಾ ಮದುವೆ ನಡೆಯಲಿದೆ. ಅದು ವರ್ಕೌಟ್ ಆಗಲಿಲ್ಲ ಅಂದ್ರೆ ಇಬ್ಬರೂ ಲಿವ್ ಇನ್ ರಿಲೇಶನ್ಶಿಪ್ನಲ್ಲಿರಲಿದ್ದಾರೆ ಎನ್ನುವುದು ಈತನ ಮಾತು. ಆ ಮಾತಿಗೇನಾದರೂ ಪ್ರೂಫ್ ಇದೆಯಾ..? ಇಲ್ಲ. ದಾಖಲೆ ಇದೆಯಾ? ಇಲ್ಲ. ಫೋಟೋ..ವಿಡಿಯೋ.. ಏನಾದರೂ ಇದೆಯಾ..? ಇಲ್ಲ. ಧನುಷ್ ಮತ್ತು ಮೀನಾ ಮಧ್ಯೆ ಫ್ರೆಂಡ್‍ಶಿಫ್ ಇದೆಯಾ ಎಂದು ನೋಡಿದರೆ ಅದೂ ಇಲ್ಲ. ಚಿತ್ರರಂಗದ ಕಲಾವಿದರು ಎಂಬ ವಿಷಯದ ಹೊರತಾಗಿ ಆತ್ಮೀಯತೆಯೂ ಇಲ್ಲ. ಪರಿಚಯ ಇದೆ ಅಷ್ಟೆ.
ಬೈಲ್ವಾನ್ ರಂಗನಾಥನ್ ಇಷ್ಟಕ್ಕೇ ಸುಮ್ಮನಾಗಿಲ್ಲ. ರಜನಿಕಾಂತ್ ಮಗಳು ಐಶ್ವರ್ಯಾ, ಪ್ರಭುದೇವ ಜೊತೆ ಮದುವೆಯಾಗ್ತಾರೆ. ಅಥವಾ ಆಗದಿದ್ದರೆ ಅವರಿಬ್ಬರೂ ಲಿವ್ ಇನ್ ರಿಲೇಷನ್`ಶಿಪ್‍ನಲ್ಲಿರುತ್ತಾರೆ ಎಂದಿದ್ದಾರೆ. ಅದಕ್ಕೂ ಅಷ್ಟೆ..ದಾಖಲೆಗಳಿಲ್ಲ. ಪುರಾವೆಗಳಿಲ್ಲ. ಒಟ್ಟಿನಲ್ಲಿ ಬೈಲ್ವಾನ್ ರಂಗನಾಥನ್ ಈ ಹೇಳಿಕೆ ನೀಡಿದ್ದ ಕಾರಣಕ್ಕೆ ಸಿಕ್ಕಾಪಟ್ಟೆ ಫೇಮಸ್ ಆಗಿದ್ದಾರೆ.
ಸದ್ಯದ ಮಟ್ಟಿಗೆ ಒಂದಂತೂ ಸತ್ಯ. ಮೀನಾ ಮತ್ತು ಧನುಷ್ ಮಧ್ಯೆ ಲವ್ ಇಲ್ಲ. ಲಿವ್ ಇನ್ ರಿಲೇಷನ್ ಶಿಪ್ ಕೂಡಾ ಇಲ್ಲ. ಮದುವೆಯ ಸುದ್ದಿಯಂತೂ ಸುಳ್ಳು. ಧನುಷ್ ಹೆಸರು ಒಬ್ಬ ಟಿವಿ ಅಂಕರ್ ಜೊತೆ ಕೇಳಿ ಬರುತ್ತಿದೆ. ಮೀನಾ ಮಗಳ ಜೊತೆ ಬದುಕುತ್ತಿದ್ದಾರೆ. ನಿಧಾನವಾಗಿ ಮತ್ತೆ ಬಣ್ಣದ ಬದುಕಿನಲ್ಲಿ ತೊಡಗಿಸಿಕೊಳ್ಳುತ್ತಿದ್ದಾರೆ. ಕೆಲಸ ಮತ್ತು ಮಗಳಲ್ಲಿಯೇ ಪ್ರಪಂಚ ನೋಡಲು ಬಯಸುತ್ತಿದ್ದಾರೆ. ಇಷ್ಟಕ್ಕೂ ಹೇಳಿಕೆ ನೀಡಿರುವ ಬೈಲ್ವಾನ್ ರಂಗನಾಥನ್ ಅವರಿಗೂ ಮೀನಾ-ಧನುಷ್ ಅವರಿಗೂ ಸಂಬಂಧ ಏನು? ಆತ್ಮೀಯರಾ ಎಂದರೆ ಅದೂ ಅಲ್ಲ. ಒಟ್ಟಿನಲ್ಲಿ ಮದುವೆಯ ಸುದ್ದಿ ಸದ್ಯಕ್ಕೆ ಸುಳ್ಳು.
