ಕನ್ನಡಿಗರ ಹೆಮ್ಮೆಯ ಕಾಂತಾರ ಈಗ ಹಿಂದಿಯಲ್ಲೂ ಶತದಿನವೋತ್ಸವ ಆಚರಿಸಿದೆ. ಕಾಂತಾರ ಕನ್ನಡದಲ್ಲಿ 100 ದಿನ ಪೂರೈಸಿದ ಬೆನ್ನಲ್ಲೇ, ಚಿತ್ರ ಆಸ್ಕರ್ ಅಂಗಳಕ್ಕೆ ಜಗಿದಿತ್ತು. ಪ್ರಶಸ್ತಿ ನಾಮನಿರ್ದೇಶನದ ಪೈಪೋಟಿಗೆ ಹೋಗುವ ಅರ್ಹತೆ ಗಿಟ್ಟಿಸಿಕೊಂಡಿತ್ತು. ಆ ಫಲಿತಾಂಶ 24ರಂದು ತಿಳಿಯಲಿದೆ. ಇದರ ನಡುವೆಯೇ ಚಿತ್ರ ಹಿಂದಿಯಲ್ಲೂ ಶತದಿನೋತ್ಸವ ಆಚರಿಸಿದೆ. ಕಾಂತಾರ ಕನ್ನಡದಲ್ಲಿ ರಿಲೀಸ್ ಆಗಿ ಯಶಸ್ಸಿನ ನಾಗಾಲೋಟದಲ್ಲಿದ್ದಾಗ ಹಿಂದಿಯಲ್ಲೂ ರಿಲೀಸ್ ಮಾಡುವ ಡಿಮ್ಯಾಂಡ್ ಸೃಷ್ಟಿಯಾಯ್ತು.
ಮೊದಲು ತೆಲುಗಿನಲ್ಲಿ, ತಮಿಳಿನಲ್ಲಿ, ನಂತರ ಹಿಂದಿಯಲ್ಲಿ ಆನಂತರ ಮಲಯಾಳಂನಲ್ಲಿ ಹೀಗೆ ಹಂತ ಹಂತವಾಗಿ ಬೇರೆ ಭಾಷೆಗಳಲ್ಲಿ ರಿಲೀಸ್ ಆದ ನಂತರ ಕೊನೆಗೆ ಓಟಿಟಿಯಲ್ಲಿ ಇಂಗ್ಲಿಷ್`ನಲ್ಲೂ ರಿಲೀಸ್ ಆಗಿ ಗೆದ್ದಿತು. ಆಗ ಚಿತ್ರವನ್ನು ಹಿಂದಿಯಲ್ಲಿ ಡಬ್ ಮಾಡಿ ರಿಲೀಸ್ ಮಾಡಿದ್ದು. ಚಿತ್ರವೊಂದು ಬಿಡುಗಡೆಯಾದಾಗ ಆತುರದಲ್ಲಿಯೇ ಸಂಭಾಷಣೆ, ಸಾಹಿತ್ಯವನ್ನೆಲ್ಲ ಅನುವಾದ ಮಾಡಿ, ಡಬ್ಬಿಂಗ್ ಮಾಡಿ ರಿಲೀಸ್ ಮಾಡಿದ ಚಿತ್ರ. ಸ್ಟಡಿಯಾಗಿ ಬಾಕ್ಸಾಫೀಸ್ ದಾಖಲೆ ಕಾಯ್ದುಕೊಂಡು ಹೋದ ಕಾಂತಾರ, ಹಿಂದಿಯಲ್ಲೂ ಕಲೆಕ್ಷನ್ 100 ಕೋಟಿ ದಾಟಿತು.
ಕಾಂತಾರ ಎಂದರೆ ಅರ್ಥ ನಿಗೂಢತೆ. ಅದಕ್ಕೆ ತಕ್ಕಂತೆಯೇ ಕಾಂತಾರದ ಯಶಸ್ಸಿನ ಕಾರಣವೂ ನಿಗೂಢ. ಏಕೆಂದರೆ ಇದೇ ಕಾರಣ ಎಂದು ವಿಜಯ್ ಕಿರಗಂದೂರು ಅವರಾಗಲೀ.. ನಟ, ನಿರ್ದೇಶಕ ರಿಷಬ್ ಶೆಟ್ಟಿ ಅವರಾಗಲೀ ಹೇಳೋದಿಲ್ಲ. ಎಲ್ಲವನ್ನೂ ದೈವದತ್ತ ತೋರಿಸುತ್ತಾರೆ. ಕಾಂತಾರ ಸೃಷ್ಟಿಸಿದ ಕ್ರೇಜ್ ಅಂತದ್ದು. ಅಂದಹಾಗೆ ಈಗ ಕಾಂತಾರ 2 ಕಥೆ ಸಿದ್ಧವಾಗುತ್ತಿದೆಯಂತೆ. ಕಾಂತಾರ 2 ಬಗ್ಗೆ ಕೇಳಿದಾಗಲೆಲ್ಲ ರಿಷಬ್ ಶೆಟ್ಟಿ ನಾವು ರೆಡಿ ಎಂದೂ ಹೇಳಿರಲಿಲ್ಲ. ಇಲ್ಲವೇ ಇಲ್ಲ, ಸಾಧ್ಯವಿಲ್ಲ ಎಂದು ಕೂಡಾ ಹೇಳಿರಲಿಲ್ಲ. ಆದರೆ ಈಗ ನಿರ್ಮಾಪ ವಿಜಯ್ ಕಿರಗಂದೂರು ಕಾಂತಾರ 2 ಬರಲಿದೆ. ಪ್ಯಾನ್ ಇಂಡಿಯಾ ರೂಪದಲ್ಲಿಯೇ ಬರಲಿದೆ ಎಂದು ಹೇಳಿದ್ದಾರೆ. ಕಥೆ ಮೇಲೆ ರಿಷಬ್ ಶೆಟ್ಟಿ ವರ್ಕ್ ಮಾಡುತ್ತಿದ್ದು, ಕಥೆ ಸಿದ್ಧವಾದ ಮೇಲಷ್ಟೇ ಕಾಂತಾರ 2 ಸೆಟ್ಟೇರಲಿದೆ ಎಂದಿದ್ದಾರೆ. ಹಾಗಂತ ಇದು ಕಾಂತಾರ ಸೀಕ್ವೆಲ್ ಅಲ್ಲ, ಪ್ರೀಕ್ವೆಲ್ ಎಂಬ ಮಾಹಿತಿ ಹೊರಬಿದ್ದಿದೆ.
ಈಗ ಮಾಡಲು ಹೊರಟಿರುವ ಕಥೆ ‘ಕಾಂತಾರ 2’ ಸಿನಿಮಾವು ಪ್ರೀಕ್ವೆಲ್ ಆಗಿರುವುದರಿಂದ, ‘ಕಾಂತಾರ’ ಸಿನಿಮಾದಲ್ಲಿ ಆರಂಭದಲ್ಲಿ ಬರುವ ಶಿವನ ತಂದೆಯ ಪಾತ್ರದ ಮೇಲೆ ಹೆಚ್ಚು ಕಥೆ ಇರಲಿದೆಯಂತೆ. ಶಿವನ ತಂದೆ ಕೋಲ ಕಟ್ಟಿಕೊಂಡು ಕಾಡಿನೊಳಗೆ ಹೋಗಿ ಕಾಣೆಯಾಗುತ್ತಾರೆ. ಅವರು ಹೋಗಿದ್ದೆಲ್ಲಿಗೆ? ಆ ನಂತರ ಏನಾಯಿತು ಎಂಬ ಬಗೆಗಿನ ಕಥೆಯನ್ನು ಈ ಬಾರಿ ತೆರೆಮೇಲೆ ತರಲು ರಿಷಬ್ ಸಜ್ಜಾಗಿದ್ದಾರೆ ಎಂಬ ಮಾಹಿತಿ ಸಿಕ್ಕಿದೆ. ತಮ್ಮ ಹುಟ್ಟೂರು ಅಥವಾ ನೆಟ್ವರ್ಕ್ ಸಿಗದೇ ಇರುವಂತಹ ಜಾಗಕ್ಕೆ ಹೋಗಿ ಸ್ಕ್ರಿಪ್ಟ್ ಕೆಲಸ ಮುಗಿಸಿಕೊಂಡು 2023ರ ಮಧ್ಯದಿಂದ ಚಿತ್ರೀಕರಣ ಆರಂಭಿಸಲಿದ್ದಾರೆ ರಿಷಬ್.
ಅಷ್ಟೇ ಅಲ್ಲ, ದಿಗಂತ್ ನಟಿಸಬೇಕಿದ್ದ ಬ್ಯಾಚುಲರ್ ಪಾರ್ಟಿ ಚಿತ್ರದಿಂದಲೂ ರಿಷಬ್ ಹೊರಬಿದ್ದಿದ್ದಾರೆ. ಸದ್ಯಕ್ಕೆ ರಿಷಬ್ ಶೆಟ್ಟಿ ಕಾಂತಾರದಂತೆಯೇ ಒಂದು ನಿಗೂಢ ಜಾಗದಲ್ಲಿದ್ದಾರೆ. ಅದು ವಿಜಯ್ ಕಿರಗಂದೂರು ಅಥವಾ ಅವರ ಕುಟುಂಬದವರಿಗೆ ಗೊತ್ತಿಲ್ಲದ್ದೇನಲ್ಲ. ಮೊಬೈಲ್ ನೆಟ್ವರ್ಕ್ ಸಿಗದ ಜಾಗದಲ್ಲಿರೋ ರಿಷಬ್ ಶೆಟ್ಟಿ, ಕಾಂತಾರ 2ಗೆ ಸಿದ್ಧವಾಗುತ್ತಿದ್ದಾರೆ. ಕೋಲ ಮುಗಿಯುತ್ತಿದ್ದಂತೆಯೇ ರಿಷಬ್ ಶೆಟ್ಟಿ ಕಾಂತಾರ 2 ಪಯಣಕ್ಕೆ ಹೊರಟಿದ್ದಾರೆ.
ಕಾಂತಾರ 2 ನಲ್ಲಿ ಕೋರ್ಟಿನ ಮೆಟ್ಟಿಲ ಮೇಲೆ ರಕ್ತಕಾರಿಕೊಂಡು ಸಾಯುವ ವ್ಯಕ್ತಿಯ ಪಾತ್ರ ಹಾಗೂ ಶಿವನ ತಂದೆಯ ಪಾತ್ರ ಹೈಲೈಟ್ ಆಗಲಿದೆ. ಅಷ್ಟೇ ಅಲ್ಲ, ಅರ್ಧ ಪ್ರೀಕ್ವೆಲ್ ಹಾಗೂ ಇನ್ನರ್ಧ ಸೀಕ್ವೆಲ್, ಎರಡನ್ನೂ ಬ್ಲೆಂಡ್ ಮಾಡಿ ಚೆಂದದ ಕಥೆ ಸಿದ್ಧ ಪಡಿಸುತ್ತಿದ್ದಾರಂತೆ ರಿಷಬ್ ಶೆಟ್ಟಿ.
