ನಟನಾದವನು ಇಲ್ಲಿ ರಾಜನಾದರೆ ಅಲ್ಲಿ ಭಿಕ್ಷುಕ. ಒಂದೆಡೆ ಕಳ್ಳನಾದರೆ ಮತ್ತೊಂದೆಡೆ ಪೊಲೀಸ್. ಒಂದ್ ಕಡೆ ರೌಡಿಯಾದರೆ ಮತ್ತೊಂದ್ ಕಡೆ ಸಮಾಜಸೇವಕ. ಹೀಗೆ ವಿಭಿನ್ನ ವಿಭಿನ್ನ ಪಾತ್ರಗಳಲ್ಲಿ ಪರಕಾಯ ಪ್ರವೇಶ ಮಾಡುವವನೇ ನಿಜವಾದ ನಟ. ರಾಘವೇಂದ್ರ ರಾಜಕುಮಾರ್ ಅದೇ ರೀತಿ. ಒಂದೆಡೆ ರಾಘವೇಂದ್ರ ರಾಜಕುಮಾರ್ ಅವರು ರಾಜ್ಯಪಾಲರಾಗಿ ನಟಿಸಿರುವ ಧ್ರುವ 369 ಚಿತ್ರದ ಕ್ಲೈಮಾಕ್ಸ್ ಶೂಟಿಂಗ್ ಮುಗಿದಿದ್ದರೆ, ಮತ್ತೊಂದೆಡೆ ಗುಜರಿ ಅಂಗಡಿ ಓನರ್ ಆಗಿರುವ 13 ಚಿತ್ರೀಕರಣವೂ ಮುಗಿದಿದೆ.
13 ಚಿತ್ರದಲ್ಲಿ ರಾಘವೇಂದ್ರ ಅವರದ್ದು ಗುಜರಿ ಅಂಗಡಿ ಓನರ್ ಮೋಹನ್ ಕುಮಾರ್ ಪಾತ್ರ. ಈ ಚಿತ್ರದಲ್ಲಿ ಸಾಯಿರಾಬಾನು ಪಾತ್ರದಲ್ಲಿ ಶೃತಿ ನಟಿಸಿದ್ದಾರೆ. ನೈಜ ಘಟನೆಯೊಂದನ್ನು ಇಟ್ಟುಕೊಂಡು ವಿಭಿನ್ನವಾದ ಕಥೆ ಹೇಳುತ್ತಿದ್ದಾರೆ ನಿರ್ದೇಶಕ ಕೆ. ನರೇಂದ್ರ ಬಾಬು. ಪಲ್ಲಕ್ಕಿ, ಅಮೃತವಾಹಿನಿಯಂತಹ ಚಿತ್ರಗಳನ್ನು ನಿರ್ದೇಶಿಸಿದ್ದ ನರೇಂದ್ರ ಬಾಬು, ಬೇರೆಯದೇ ಜಾನರ್ ಕಥೆ ಹೇಳುತ್ತಿದ್ದಾರೆ. ಇದೊಂದು ಅಂತರ್ ಧರ್ಮೀಯ ಪ್ರೇಮಕಥೆ ಸಿನಿಮಾ.
ಸ್ವಲ್ಪ ಹೊರಳಿದರೆ ಅದೇ ಗುಜರಿ ಅಂಗಡಿ ಮಾಲೀಕ ರಾಘವೇಂದ್ರ ರಾಜಕುಮಾರ್ ಧ್ರುವ 369ನಲ್ಲಿ ಗವರ್ನರ್. ನಿರ್ದೇಶಕರ ಹೆಸರು ಶಂಕರ್ ನಾಗ್. ಪುರಾಣದಲ್ಲಿ ಬರುವ ಧ್ರುವ ನಕ್ಷತ್ರದ ಕಥೆಗೂ, ಈಗಿನ ಖಗೋಳ ಶಾಸ್ತ್ರಕ್ಕೂ ಲಿಂಕ್ ಇರುವ ಕಥೆ. ಸೈಂಟಿಫಿಕ್ ಫಿಕ್ಷನ್.
ಈ ಚಿತ್ರದ ಓಪನಿಂಗ್, ಇಂಟರ್ವೆಲ್ ಹಾಗೂ ಕ್ಲೈಮಾಕ್ಸ್ನಲ್ಲಿ ರಾಘಣ್ಣ ಬರುತ್ತಾರೆ. ಅವರಿಂದಲೇ ಇಡೀ ಚಿತ್ರದ ಕಥೆ. ಅವರು ರಾಜ್ಯಪಾಲರ ಪಾತ್ರ ಮಾಡಿದ್ದಾರೆ ಎಂದು ವಿವರ ನೀಡಿದ್ದಾರೆ ಶಂಕರ್ ನಾಗ್.
ಪುನೀತ್ ನಿಧನದ ನಂತರ ಆತ್ಮವಿಶ್ವಾಸದಿಂದ ಇದ್ದರೂ ರಾಘಣ್ಣ ಏನೆಂದು ಕುಟುಂಬದವರಿಗೆ ಗೊತ್ತಿದೆ. ರಾಘಣ್ಣ ಅವರನ್ನು ಆಕ್ಟಿವ್ ಆಗಿಡಲು ಒಂದರ ಹಿಂದೊಂದು ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಶಿವಣ್ಣ, ಅಶ್ವಿನಿ ಸೇರಿದಂತೆ ಎಲ್ಲರೂ ರಾಘಣ್ಣ ಅವರನ್ನು ಆಕ್ಟಿವ್ ಆಗಿಡಲು ಪ್ರಯತ್ನಿಸುತ್ತಿದ್ದಾರೆ. ಹೀಗಿರುವಾಗಲೇ ರಾಘವೇಂದ್ರ ರಾಜಕುಮಾರ್ ಒಟ್ಟೊಟ್ಟಿಗೇ ಎರಡು ಚಿತ್ರಗಳ ಶೂಟಿಂಗ್ ಮುಗಿಸಿರುವುದು ವಿಶೇಷ.
