ಭೌತಿಕವಾಗಿ ಇಲ್ಲದಿದ್ದರೂ, ಅಭಿಮಾನಿಗಳ ಹೃದಯದಲ್ಲಿ ಇವತ್ತಿಗೂ ಜೀವಂತವಾಗಿರುವ ಡಾ.ಪುನೀತ್ ರಾಜಕುಮಾರ್ ಅವರ ಪ್ರತಿಮೆ ಇಂದು ಬಳ್ಳಾರಿಯಲ್ಲಿ ಅನಾವರಣಗೊಳ್ಳಲಿದೆ. ಬಳ್ಳಾರಿ ಉತ್ಸವದ ಅಂಗವಾಗಿ ಸಿದ್ಧವಾಗಿರುವ ಬೃಹತ್ ಪ್ರತಿಮೆ ಇದು. ಪುನೀತ್ ನಮ್ಮನ್ನು ಬಿಟ್ಟು ಹೋಗಿ ವರ್ಷ ಕಳೆದಿದ್ದರೂ ಪ್ರೀತಿ ಕಮ್ಮಿಯಾಗಿಲ್ಲ. ಬದಲಿಗೆ ಇನ್ನೂ ಇನ್ನೂ ಹೆಚ್ಚುತ್ತಿದೆ. ಈ ಪ್ರೀತಿ ಅಭಿಮಾನಕ್ಕೆ ಅಭಿಮಾನಿಗಳು ನೀಡುತ್ತಿರುವ ಕಾಣಿಕೆ ಅಪ್ಪು ಪ್ರತಿಮೆ.
ಅಪ್ಪು ಪ್ರತಿಮೆಯ ವಿಶೇಷಗಳು ಒಂದೆರಡಲ್ಲ. 23 ಅಡಿ ಎತ್ತರದ ಈ ಪ್ರತಿಮೆಯನ್ನು ಸಂಪೂರ್ಣ ಉಕ್ಕಿನಿಂದ ತಯಾರಿಸಲಾಗಿದೆ. ಜಿಲ್ಲಾ ಕ್ರೀಡಾಂಗಣದ ಎದುರು ತಲೆಯೆತ್ತಲಿರುವ ಈ ಪ್ರತಿಮೆಗೆ ಉಕ್ಕಿನ ಜೊತೆ ಸ್ವಲ್ಪ ಫೈಬರ್ ಮಿಶ್ರಣ ಮಾಡಲಾಗಿದೆ. ಈ ಪ್ರತಿಮೆ ನಿರ್ಮಾಣಕ್ಕೆ ಮಾಡಿರುವ ವೆಚ್ಚ 22 ಲಕ್ಷ.
ಪ್ರತಿಮೆ ನಿರ್ಮಾಣ ಮಾಡಿರುವುದು ಶಿವಮೊಗ್ಗ ಹಿಂದೂ ಮಹಾಸಭಾದ ಬೃಹತ್ ಗಣಪತಿ ಪ್ರತಿಮೆ ಮಾಡುವ ಶಿಲ್ಪಿ ಜೀವನ್ ಅವರ ನೇತೃತ್ವದ ತಂಡ. ಇದಕ್ಕಾಗಿ ಇಡೀ ತಂಡ 3 ತಿಂಗಳು ಶ್ರಮ ವಹಿಸಿದೆ. ರಾಜ್ಯದ ಹಲವೆಡೆ ಬೃಹತ್ ಗಣಪತಿ ಪ್ರತಿಮೆ ನಿರ್ಮಾಣ ಮಾಡಿರುವ ಖ್ಯಾತಿಯೂ ಈ ತಂಡಕ್ಕೆ ಇದೆ. ಕೆಜಿಎಫ್ ಸಿನಿಮಾದಲ್ಲಿ ಬಳಸಲಾಗಿರುವ ಯಶ್ ಅವರ ಪ್ರತಿಮೆಯ ಸೃಷ್ಟಿಕರ್ತರೂ ಇವರೇ.
ಈ ಪ್ರತಿಮೆಯನ್ನು ಶಿವಮೊಗ್ಗದಿಂದ ಬಳ್ಳಾರಿಗೆ ತರುವುದಕ್ಕೆ 40 ಅಡಿ ಉದ್ದದ 18 ಚಕ್ರದ ಉದ್ದನೆಯ ಟ್ರಕ್ ಬಳಸಲಾಗಿದೆ. ಸಾರಿಗೆ ಸಚಿವ ಬಿ.ಶ್ರೀರಾಮುಲು ಅವರಿಂದ ಈ ಪ್ರತಿಮೆ ಉದ್ಘಾಟನೆಯಾಗಲಿದೆ. ಜೊತೆ ಜೊತೆಯಲ್ಲೇ ಬಳ್ಳಾರಿ ಉತ್ಸವವೂ ರಂಗೇರಲಿದೆ.
